อันว่าข้าเจ้า นั้นเป๋นจาวเหนือ บ่ได้อยู่เฟือ เมินล้ำ
ไปอยุ่เมืองใต้ ได้สามสิบปี๋ แต่ใจ๋ยังมี เติงหา
ใคร่อู้ฟู่ กำเมือง หื้อเก่ง หื้อม่วน ทุกเวลา
ได้ปะ นักค่าว แต่งกำบ่เก่า ข้าเจ้าสุดแสนจะยินดี
สวัสดีเจ้า
ปี๋ใหม่เมือง
http://www.bloggang.com/data/sasis/picture/1238831151.jpg
กราบสามรา วันตาไตรรัตน์ แลพระอุปัช- ฌยาอาจ๋ารย์
อันตั๋วม่อนนี้ ขอจี๊ไขขาน ลำดับก๋ารงาน วันปี๋ใหม่อ้าง
สิบสามเมษา วันมาฮอดจั้ง สังขารล่องวาง แต่เก๊า
สินาดโต๋มต๋าม ยามคืนฮอดเจ๊า ส่งสังขารเจ้า ล่องไป
วันเผ้วกวาดปั๊ด สะอาดหมดใส ปายนอกปายใน หมดใสสว่างแจ้ง
วันเน่าถัดมา อู้จ๋าอย่าแกล้ง อย่าด่ากำแฮง แช่งชัก
ปากั๋นดาครัว หน่อหัวแฟงฟัก ตักแบ่งกิ๋นปุ้น หุ้นตาน
วันอ่อนแสงล้า ปากั๋นสืบสาน ขนทรายเป็นตาน ใส่ลานวัดเจ้า
สิบห้าเมษา ผะญาวันเข้า วันนี้หมู่เฮา ไปวัด
ตานข้าวเป๋นขัน พร้อมกั๋นเหมือนนัด ผัดเปลี่ยนเวียนเข้า เกนตาน
ขวายมาซะน้อย คล้อยเข้าวิหาร ไหว้พระสมาทาน ขานฮับศีลห้า
ตานเจดีย์ทราย ตุงลายดั่งผ้า ต่างโมทนา สาธุ
สิบหกเมษา ปากปี๋มาจุ๊ ลุตั๋วเปิ้งอั้น ใหม่นา
วันนี้ตึงเหมาะ ส่งเคราะห์เคหา เคราะห์บ้านพารา ดาส่งหื้อเสี้ยง
จากนี้ต่อไป โรคภัยหายเกลี้ยง โชคลาภจะเอียง มาไซร้
บัดนี้ม่อนขอ ยอมือกราบไท้ ประสาธน์พรได้ ยินยล
หื้อสุขสวัสดิ์ พิพัฒน์พูนผล บุญบันดาลดล กุศลเตื่อมแถ้ง
ปี๋ใหม่เมืองมี ศะหรีส่องแจ้ง เต๋จ๊ะเรืองแฮง เน้อครับ
จงอยู่สุขี มั่งมีสินทรัพย์ อายุนับได้ ทีฆา
พละเลิศล้ำ วรรณะงามต๋า อุดมปั๋ญญา วาทะเก่งถ้อย
เหล่าบริวาร ลูกหลานเหลนหน้อย ครอบครัวก็พลอย สุขล้ำ
ลาก่อนละหนอ ขอไปเล่นน้ำ ตกเหนือออกก้ำ ต๋ามตาง
ปล๋งลงวาง ไว้เปียงเต้าอื้ เต้านี้ขอลาไป ก่อนแลนายเหย.
หมายเลขบันทึก: 255468เขียนเมื่อ 14 เมษายน 2009 13:03 น. ()แก้ไขเมื่อ 6 กันยายน 2013 20:36 น. () สัญญาอนุญาต: ครีเอทีฟคอมมอนส์แบบ แสดงที่มา-ไม่ใช้เพื่อการค้า-อนุญาตแบบเดียวกันจำนวนที่อ่านจำนวนที่อ่าน:
ความเห็น (56)
สวัสดีปีใหม่ค่ะ เพื่อนรัก
สบายดีนะคะ ขอความสุขความเจริญจงมีแด่เพื่อนและครอบครัวค่ะ
ครูอ้อย
กราบสวัสดีปี๋ใหม่ท่าน ผอ. ค่ะ
- กราบขอบพระคุณสำหรับคำประพันธ์ค่าวที่ส่งไปอวยพรให้ค่ะ
- เขียนได้ไพเราะ มีความหมายดีมากค่ะ
กราบสวัสดี ปี๋ใหม่ ป๋ออาจ๋าน ครับ
มาฮับปอน ปี๋ใหม่ครับผม
.
สวัสดี เพื่อรัก...ครูอ้อย แซ่เฮ
- ยินดียิ่งแล้ว เพื่อแก้วแดนไกล๋ มาทักมาทาย ขอบใจ๋ครูอ้อย
หันเพื่อนแดนไกล๋ ดีใจ๋บ่หน้อย แวะเวียนมาคอย ทายทัก
เปิ้นเก่งภาษา แต่ว่าใจ๋ฮัก ทางสื่อลายลักษณ์ สือไทย
ปิ๊กมาแถมเน้อ อย่าเผลอหนีไกล๋ มาบ่อยเพียงใด ดีใจ๋เพียงอั้น - โชคดีมีสุขครับ
สวัสดีค่ะ
- ขอให้มีความสุข มีสุขภาพแข็งแรง
- ในเทศกาลวันปีใหม่เมืองค่ะ
.
สวัสดีครับ ดาวลูกไก่ ชื่นชมยินดี
- ดาวลูกไก่ฟ้า สกุลาศรี ชื่นชมยินดี วันทีผู้เฒ่า
โอกาสมหา สงกรานต์ล่วงเข้า ปี๋ใหม่เมืองเฮา เวียนครบ
ขอหลานสุขสันต์ ทุกวันพลันพบ คนนบน้อมไหว้ วันทา
สินทรัพย์นั้นไซร้ หลั่งไหลมาหา ก๋ายะมนา หรรษาเนอเจ้า.
.
สวัสดีครับ วราภรณ์ ธรรมทิพย์สกุล
- วราภรณ์น้อง เอ่ยถ้องคำหวาน ชมบทประพันธ์ ที่ฉันเขียนด้น
กำลังฝึกเขียน ร่ำเรียนเบื้องต้น ลองเขียนนิพนธ์ ฝากไว้
ยังอ่อนภาษา อรรถารสไซร้ ยังใช่บ่ได้ เนอครู
สงกรานต์ปีนี้ ชีวีเลิศหรู จงเป็นของครู วราภรณ์เจ้า.
สวัสดีครับ krutoi
- ครูส่งดอกไม้ หลายหลากมากสี แลคำวลี อธิบายถ้อย
ล้วนเป็นความหมาย จากใจ๋ครูต้อย ฝากลมล่องลอย ลัดฟ้า
มาสู่คนเหนือ ไกล๋เหลือสุดล้า เหนือสุดแผ่นหล้า แดนไทย
ความดีทั้งนั้น คืนพลันทันใจ๋ ปรารถนาใด สมใจ๋ครูต้อย.
· สรีสวัสดี ปีใหม่เมืองเจ้า
· ศิษย์น้อยนำรูปแห่ไม้ค้ำสรี ที่พะเยามาฝากเจ้า
· ปีนี้แห่ไม้ค้ำสรี ท่ามกลางสายฝน
· ปีใหม่ปีนี้ ขอยกสองมือกราบไหว้ พร้อมใจ๋ แทนข้าวตอกดอกไม้รดน้ำดำหัว ขอความสุขความเจริญ สุขภาพแข็งแรงเน้อเจ้า
.
สวัสดีครับท่าน ผอ.ประจักษ์~natadee
- นางโคราคะ เทวีขี่หลัง เสือทรงพลัง นางสงกรานต์เจ้า
ขอบคุณแต๊หนอ ผอ.หล่อเบ้า ส่งมาหื้อเฮา คราวนี้
คำพรอันใด ท่านได้บ่งชี้ กลับคืนเป็นยี่ ทวีแรง
สู่ ผอ.ไซร้ ร่างกายเข้มแข็ง จิตพลังแรง รัศม์แสงส่องจ้า
มากราบสวัสดีปีใหม่สงกรานต์ไทยค่ะ
ลูกศิษย์คนนี้หายไปนาน...คงต้องหาเวลาเขียนการบ้านมาส่งคุณครู...ค่ะ(สงสัยต้องค้นผังก่อนค่ะ)
.
สวัสดีครับท่าน จตุพร วิศิษฏ์โชติอังกูร
- องค์พระพุทธะ ใสยัวะส่องแสง พาลาละแข่ง นามแห่งองค์เจ้า
จตุพร อ่อนหนุ่มหล่อเบ้า ส่งมาหื้อเฮา ฮูปนี้
วัดทุ่งโป่งปาย อยู่ไกล๋หลายลี้ แม่ฮ่องสอนอี้ นามเมือง
แสงแห่งองค์พระ อร่ามงามเหลือง ส่องความรุ่งเรือง เอกเฟื่องฟูขึ้น.
สวัสดีปี๋ใหม่เจ้า
- ก่อนอื่นขอรดน้ำดำหัวท่านผอ.ผ่าน blog เน้อเจ้า
- ขออื้อท่านผอ.มีความสุขก๋ายสบายใจ๋นักๆเจ้า
สวัสดีเจ้า
กึ้ดเติงหาบ้านจ้าดนักเจ้า
- พ่อครูทนันเจ้า..
ขอกราบสวัสดีปี๋ใหม่เมืองเจ้า ^^ ขอหื้อพ่อครูสุขก๋ายสุขใจ๊เน้อเจ้า
.
สวัสดีครับคุณครูคิม
- ขอบคุณเน้อครับ สำหรับคำขาน อวยพรเนื่องวาร สงกรานต์หนาเจ้า
สุขภาพดี มีสุขหายเศร้า ผมได้รับเอา ไว้แล้ว
ครูคิมครือกั๋น คืนวันบ่แคล้ว สุขเหมือนได้แก้ว มณี
อุดมพละ วรรณะผ่องศรี โภคะมากมี ทีฆายุมั่น
.
สรีสวัสดิ์ คำแสนดอย
- หลากสีงามล้ำ ไม่ก๊ำสะหรี งามป๋าเวณี ศรีพะเยาสร้าง
คำแสนดอย ศิษย์หน้อยที่อ้าง ถ่ายฮูปมาวาง พล็อกไว้
ได้บุญกุศล ส่งย้นแน่ไซร้ ก๊ำจีวิตได้ ปายลูน
สะสมบุญนัก บุญจักอุดหนุน ธรรมจักก๊ำจุน เกื้อหนุนศิษย์หน้อย.
สวัสดีครับคุณหมอ ภูสุภา
- ยินดีเน้อครับ สำหรับคุณหมอ ตั๋วผมยังรอ ตรวจข้อค่าวสร้อย
วันนี้คุณหมอ มาขอพรข้อย ผ่านเน็ตล่องลอย ลัดฟ้า
ขอหมอสุขใจ๋ เร็วไวอย่าช้า ก๋ายะแกร่งกล้า แข็งแรง
ร่ำรวยเลิศแล้ว มีแก้วมีแสง มีคนรักแปง ทุกหนแห่งห้อง.
.
สวัสดีครับ พิชชา
- ปี๋ใหม่เถิงแล้ว พิชชาแอ่วไหน จักปิ๊กป้อกไป เจียงใหม่ก่อเจ้า
กาว่างานหลาย มากมายต้องเฝ้า เจ้านายทวงเอา เร่งรัด
จักอยู่ที่ไหน ขอพระไตรรัตน์ ป้องหื้อสวัสดิ์ อยู่ดี
สุขะพละ วรรณะผ่องศรี โภคะมากมี ทีฆายุมั่น.
- ก่อนหน้านี้บ่ค่อยสบ๋ายใจ๋
- บ้านเมืองวุ่นวาย
- วันนี้ฟ้าสาง
- ถือโอกาสมาฮับปอนเจ้า
.
สวัสดีครับท่านรองฯ แม่ต้อย
- ปี๋ใหม่ปี๋นี้ ดีใจ๋แต๊หนา แม่ต้อยเปิ้นมา อู้จ๋าเอ่ยถ้อย
ว่ากึ๊ดเติงหา บ้านเฮาบ่าหน้อย ยังจ๋ำฮีตฮอย เก่าก๊าง
จึ่งขออวยชัย อย่าได้เหว่ว้าง สุขสมใจ๋อ้าง จุ้ปาย
บุญกิ๋นก็นัก บุญตานก็หลาย หื้อเปี่ยมอยู่ใน ก๋ายใจ๋แม่ต้อย.
.
สวัสดีปี๋ใหม่เน้อหลานเนปาลี
- ได้ดีย้อนลูก ได้สุขย้อนหลาน ได้ใจ๋เจยบาน ย้อนหลานศิษย์หน้อย
เนปาลี พาทีเอ่ยถ้อย วันทาครูดอย คนนี้
จึงขอกุศล ส่งย้นช่วยจี๊ หื้อป๊นจากหนี้ ร่ำรวย
อายุทีฆะ วรรณะขาวสวย พละอำนวย บ่ป่วยบ่ไข้.
สรีสวัสดิ์พี่ มนัญญา ~ natachoei ( หน้าตาเฉย)
- อายุทีฆะ วรรณะผ่องศรี พละแฮงดี สุขีเตี้ยงมั่น
ในเทศก๋าล วารปี๋ใหม่หั้น ขอปี้มนัญญ์ ได้ฮับ
ปอนสี่ผะก๋าร ถ้วนด้านเน้อครับ อุดมสินทรัพย์ โภคา
ซาวสี่เมษ์นี้ น้องปี้เซาะหา อย่าลืมเนอรา มนัญญาเจ้า.
- เจ้า
- แล้วจะเซาะหื้อเจอ
- สุขกายสบายใจ๋เนอเจ้า
สรีสวัสดิ์ครับ พี่มนัญญา ~ natachoei ( หน้าตาเฉย)
- ซาวสี่เมษ์นี้ น้องปี้เซาะหา อย่าลืมเนอรา มนัญญาเจ้า
หน้าหอศิลป์หรู ประตู๋ออกเข้า กล๋างขบวนเฮา ลัดเลาะ
เตวล่นวนก๋วน อ้วนพ่องนั่นเนาะ ต่างคนต่างเซาะ แลนา
ดีใจ๋แต๊ตั๊ก จักหันหน้าต๋า ปี้มนัญญา ผอมกาว่าอ้วน.
ป้อครูเจ้า..
.
สรีสวัสดิ์ครับ ท่าน ศน.อ้วน
- น้อมคารวะ วาทะขับขาน เนื่องวันสงกรานต์ คำหวานครูอ้วน
แถมฮ้องป้อครู มันหรูเกินถ้วน มันบ่เปิงกวร แต๊ละ
แต่ก็ดีใจ๋ ในคารวะ ฮับไหว้แล้วจ้ะ คนดี
ขอครูอ้วนนั้น จุ้วันสุขี จุ้คืนมั่งมี จุ้ปี๋เตี้ยงหมั้น.
มากราบสวัสดีปี๋ใหม่เมืองเจ้า...
(^___^)
.
สวัสดีครับ คนไม่มีราก
- ขอบคุณมากที่แวะมาเยี่ยมอีกครั้งครับ
- ใบกล้วยเขียวคล้ำ หยดน้ำขาวใส ผ่อเย็นสบาย สายต๋าแห่งข้า
จวนหื้อกึ๊ดเถิง ร่ำเปิงพรกล้า ของจาวล้านนา เก่าก๊ำ
ขอหื้อเคราะห์ภัย หายไปดั่งน้ำ ไหลหลุดง่ายได้ ใบบัว
ไม่มีรากครับ เคราะห์ลับจากตั๋ว มีแต่โชคชัวร์ ทั่วหนแห่งห้อง.
- สวัสดีปี๋ใหม่เมืองเจ๊าอ้ายหนานทนัน
- จุ้มอกเย๋นใจ ปลอดเหล้า ปลอดภัย ตลอดปี๋เจ๊า
.
สรีสวัสดิ์ครับท่าน เอื้องแซะ
- วันนี้เอื้องแซะ เปิ้นแวะมาหา มาเอ่ยวาจา สาวัสดีเจ้า
ฮ้องเฮาอ้ายหนาน ท่านยกหม้อข้าว อันน้อยอย่างเฮา เขินครับ
เมื่อถูกขับเข็น จ๋ำเป๋นต้องฮับ หนานก็หนานอั้บ เอื้องเอย
ขอหื้อเอื้องแซะ และจายผู้เขย ลูกหลานแถมเฮย เสบยใจ๋เจ้า.
ทรงมณีรัตน์ ปพาฬสดใส เปล่งรัศม์เรืองไร สุกใสผ่องแผ้ว
หัตถ์ซ้ายลุ่มถือ คือกระออมแก้ว ประคำสายแลว บนซ้าย
หัตถ์ลุ่มขวา ป๊าดตั้กแห่งไท้ หัตถ์ขวาบนได้ จักรี
เด็จยืนก้มพักตร์ หลังราชสีห์ จากเหนือจรรี สูอีสานก้ำ
จากมีนสิบสาม เมษนามฮอดจ้ำ สิบสี่เนาพำ- นักแล้ว
สิบห้าเมษา พระญาวันแพร้ว นับเป๋นวันแก้ว แห่งวัน
สิบหกเมษนั้น ตั๋วเปิ้งเปลี่ยนผัน หนูเป๋นงัวพลัน ปี๋เป๋นกัดเป้า
ความสวัสดี จงมีแก่เจ้า ตึงเปิ้นตึงเฮา เหล่าล้วน
สุขก๋ายสุขใจ๋ คนไทยทั่วท้วน คนโลกทั่วถ้วน ปฐพี
อายุวรรณะ พละสุขี โภคะมากมี ทีฆายุหมั้น
แดงเหลืองสลาย ลายก็อดกั้น น้ำเงินหยุดพลัน เลิกแล้ว
แต่นี้ต่อไป ไทยคงคลาดแคล้ว ไต้ป๋ารมีแก้ว นวมินทร์
ฮ้อนจงปลีกเว้น เย็นถั่งดั่งสินธุ์ หื้อโลกยลยิน ถิ่นไทยโอบอ้อม.
โคราคะ เทวีสังขานต์ ไทยกล๋างโบราณ เล่าขานสืบถ้อย
อาภรณ์มุกดา พาหุรัดสร้อย ดอกปีบหอมลอย ทัดไว้
ไสยาสน์หลับต๋า มาหลังเสือไซร้ ภักษาหารได้ น้ำมัน
ไม้เท้าหัตถ์ซ้าย ขวาได้พระขรรค์ จรสู่เมษพลัน วันปากปี๋แถ้ง
ออกตกเหนือกล๋าง ต่างกั๋นใช่แกล้ง บ่ต้องระแวง เน้อครับ
มันอยู่ที่ใจ๋ ปายในจักนับ เอาอรรถฤๅศัพท์ แลนา
มันเป๋นลิขิต ภาษิตภาษา คำโบราณา ครูอาจ๋ารย์เจ้า
คาดไว้หื้อหัน อันเป๋นแบบเบ้า สืบเถิงหมู่เฮา ฮับฮู้
เปื้อได้เตรียมก๋าร งานบุ๋นงานบู๊ จักหลีกจักสู้ ต่อไป
ดำเนินจีวิต ต้องคิดยาวไกล๋ น้ำขุ่นอยู่ใน น้ำใสออกหน้า
ปี้ฮู้สอง น้องฮู้หนึ่งถ้า ฮู้จักเปิ้งปา ฮ่วมคิด
ก็จักได้ดี แลมีชีวิต ลิขิตเป๋นด้วย ตั๋วเฮา
ส่วนลิขิตฟ้า แหล่งหล้าป่าเขา ก็จงเลือกเอา เฮาชอบเปิ้นสู้
โบราณสมัย อยู่ในกำอู้ จักหนีจักจู ปากตั๊ก
ต่อหน้าคนหลาย จะไปอู้นัก เบาจักเป๋นหนัก ระวัง
อู้หื้อเปิ้นฮัก ยากนักจักหวัง อู้หื้อเปิ้นจัง กำเดียวก็ได้
ข้าก็ฮู้ตั๋ว กลั๋วว่าบ้าใบ้ จึงขอลาไป ก่อนครับ
วันนี้ขอลา บ่ใจ๊ลาลับ จักกลับมาอู้ มาไจ
ค่าวซอใย จบไว้เต้าอี้ เต้านี้ของวางลง ก่อนและนายเหย.
สวัสดีปีใหม่เมืองคะอาจารย์
ขอให้อาจารย์ สุขกายสบายใจนะคะ
สวัสดีครับคุณพยาบาล ประกาย~natachoei ที่~natadee
- ดอกบัวดอกนี้ สีออนสดใส ชมพูกลีบใน ถูกใจ๋แห่งข้า
ใบลอยอยู่ใน น้ำใสไร้ฝ้า แสงสุรียา สาดพร้อม
ขอความสดใส ในอุบลน้อม จงแหนแห่ห้อม ประกาย
สวัสดิวัฒน์ พิพัฒน์ขยาย อยู่สุขสบาย ทุกข์หายคลายเศร้า.
สวัสดีเจ้า
มาอ่านกำค่าว แล้ว กึ้ดเติง หาพ่ออุ้ย แม่อุ้ย แต้ว่า
อาจารย์ แต่ง เองแม่นก่อเจ้า
ขอคาระวะ เจ้า
.
สรีสวัสดิ์ครับ แม่ต้อย
- อันตั๋วข้านี้ ยินดีนักหนา แม่ต้อยเปิ้นมา อู้จ๋าเอ่ยถ้อย
ชอบค่าวภาษา แลว่าค่าวสร้อย นี่ข้อยแต่งเอง กาครับ
เรื่องค่าวนี้หนอ ข้าขอยอมฮับ นับว่าฮู้หน้อย เต๋มที
แต่ด้วยใจ๋ฮัก แลเป๋นศักดิ์ศรี ค่าวจ๊อยต้องมี กวีสืบสร้าง
ครูพักลักจ๋ำ ครูตำราอ้าง ครูเสี้ยงสตางค์ ครูเน๊ต
เป๋นเบื้องต้นหนอ ยังบ่ใจ้เพชร แต่งเสร็จก็ไพสต์ บล็อกเลย
ถือเอาบล็อกนี้ เป๋นตี้แผ่เผย เจิญมาอู้เอย ได้เลยเน้อเจ้า.
ไหว้สา วันตา น้อมนบ
ควบครบ ขวบปี๋ ดิถีเถลิง
ลูกศิษย์ ลูกหา ร่ำเปิง
จ๋ำเจิง ป้อครู ผู้วิชา
ขอหื้อ สุขขี หมีหมั้น
อายุยืน หมื่นวัน ปันษา
เป๋นเสาหลัก ลูกหลาน ล้านนา
จื้อ"ทนัน" คู่หล้า ฟ้าไทย
ร่ำเปิงเหลือล้นครับป้อครู
รพี
.
สวัสดีครับท่าน รพี กวีข้างถนน
- รพีมาแวะ และมาขับไข ปั๋นโจ้คปั๋นไจย หื้อหายโศกเศร้า
มีอายุยืน หมื่นปี๋ขวบเข้า หื้อเป๋นฮ่มเงา เสาร์พัก
ของลูกหลานเหลน แลเป๋นตี้ฮัก มากชนคนบ้าน ล้านนา
ขอหื้อปอนนี้ จงรี่คืนหา รพีน้องยา ของข้าพเจ้า.
- เช้านี้อากาศดีจั๊ดนัก
- ฝนยังตกพรำๆ
- เลยเอาภาพสวยๆมาฝากเจ้า
สวัสดีครับ มนัญญา ~ natachoei ( หน้าตาเฉย)
- ตั๊ดตี้แห่งนั้น อันเป๋นสักขี หอผะชุมดี มช.ตี้หั้น
บ่ายโมงปล๋าย จ๋ำได้แม่นหมั้น ปะกับมนัญ- ญาน้อง
ต่างรี่เข้าหา ปากจ๋าเอิ้นฮ้อง สมแล้วตี้จ้อง มาเมิน
ยินดีแต๊ละ บ่คะบ่เขิน ถ่ายฮูปกั๋นเพลิน จนเกินล้นกล้อง (อิอิ) - ขอหื้อโจ้คดีมีความสุขยิ่งๆขึ้นไปเน้อครับ
- วันนี้เปิ้นมีสัมมนาอะหยังเจ้า
- เขี้ยวบ่อฮู้
- ยะก๋านตี้คลินิกตลอดเจ้า
- บังเอิญถ่ายไว้
- ไม่รู้เป็นใคร
- แต่เห็นเดินใกล้สาวงาม อิอิ
สรีสวัสดิ์ครับ มนัญญา ~ natachoei ( หน้าตาเฉย)
- ประชุมสัมมนาเครือข่ายพระสงฆ์เพื่อการส่งเสริมสุขภาพ
- เพื่อสร้างความเข้มแข็งในการประสานงาน
- ระหว่างหน่วยงานภาครัฐ ภาคเอกชนและชุมชนแบบองค์รวม
- ที่โรงแรมอโมรา ท่าแพ เชียงใหม่
- จัดโดยศูนย์อนามัย 10 เชียงใหม่
สีฟั่งสีฟ้าว จ้ำอ้าวไปไหน ผ่อหาผู้ใด หาใผกาเจ้า
ผ่อหาอยู่สอง ส่องหาคนเถ้า คนห้วยแก้วเฮา แม่นตั๊ด
แลผ่อเซาะหา ตี้ว่าต๋ามนัด จะปะกั๋นอั้น ไหนนา
สุดขบวนแล้ว แม่แก้วแก่นต๋า บ่หันเลยนา ปาหื้อใจ๋จ้อย.
สวัสดีเจ้า
ตัวข้าเจ้านี้ บ่เก่งบ่กล้า บ่ร่ำบ่รวย กาว่ามั่งมี
เป๋นหละอ่อน ตี้อำเภอสารภี เจียงใหม่เจ้า
ป้อแม่ย้ายไป หละปุนยะก๋าน ตามสั่งแล
จ๋นจบโฮงเฮียนแล้ว จึ่งได้ย้ายไปใต้ บ่ได้ปิ้กมา
.
สรีสวัสดิ์ครับ แม่ต้อย
- ตั๋วข้าเจ้านี้ บ่มีบ่สวย บ่ร่ำบ่รวย บ่เก่งบ่กล้า
เกยอยู่เวียงไจย เจียงใหม่แหล่งหล้า สารปีมา ก่อนนั้น
ย้ายไปหละปูน โตยบุญป้อจั๊น ต๋ามคำสั่งอั้น นายบน
จบโฮงเฮียนแล้ว แน่วลงใต้หน ไปอยู่เมืองนนท์ กล๋ายเป็นคนใต้. - จ๋าว่าผมเป็นแม่ต้อย ยกเอาค่าวแม่ต้อยมาดัดแปล๋งแต่งใหม่ ถูกใจ๋ก่อครับ
- ขอหื้อโจ้คดีมีจัยตลอดไปเน้อครับ
น้องเป๋นปี้น้องคนหละปูนตี้ชอบฟังคำค่าวปื้นเมือง อยากไค่หัดเฮียนฮู้อ่านเขียนอู้คำค่าวได้ด้วยตั๋วเก่า แต่ว่าบ่มีครูสอน หันป้อครูทนัน และความเห็นของลูกศิษย์ลูกหาป้อครูแล้วปลาบปลื้มตี้ยังมีคนล้านนาเฮา รักและหวงแหน ร่วมอนุรักษ์ฮักษาฮีตบ่ะเก่าไว้อยู่น้องเป๋นคนรุ่นใหม่อยากจะฮักษาไว้สืบลูกสืบหลาน หื้อล้านนาเฮาได้อยู่สืบไปเจ้า ขอฝากเนื้อฝากตั๋วเป๋นลูกศิษย์ป้อครูตวยแหมคนเน้อเจ้า.....
สวัสดีครับ สร้อยแสงฟ้า
หลานสร้อยแสงฟ้า เพิ่นมาเอ่ยขาน ว่าฮักตำนาน โบราณค่าวสร้อย
ฝากตั๋วเป๋นศิษย์ แห่งตั๋วข้าหน้อย บ่ได้มากอย เมินล้ำ
ต้องขอสูมา อย่าได้หน้าง้ำ ขอย้ำว่าข้า สูมา
ขอสร้อยแสงฟ้า สุขสันต์หรรษา เจริญโภคา ทีฆายุหมั้น.
ต้อย-ป่าแดด
สวัสดีเจ้าอาจ๋าร
 |
ต้อย-ป่าแดด
|
สวัสดีครับ คำนับไหว้สาธุ์ ต้อยป่าแดดมา อู้จ๋าข้าเจ้า
ต้องขอสูมา ข้าบ่ได้เข้า มาในบล็อกเมิน เจ้นล้ำ
นับว่าหลายวัน หลายเดือนแถมซ้ำ จรเหียจุ้ก้ำ จุ้ปาย
เข้ามาวันนี้ สุดแสนดีใจ๋ ขอต้อยตั๋วนาย สบายเน่อเจ้า.