ค่าวบวชพระฉลองโบสถ์

๑๑/๐๓/๒๕๕๗

**********

ค่าวบวชพระฉลองโบสถ์

ขอสวัสดี เจ้าปี่นายน้อง ทุกโขงเขตห้อง ปี่น้องตังหลาย

มางานวันนี้ มาจ่วยสืบสาย ปี่น้องป่อจาย นาคหลายต๋นเจ้า

เกิดเป๋นชาวพุทธ ผ่องผุดบ่อเศร้า ยี่สิบปี๋เอา ปอครบ

สามสิบสองขวัญ ผ่อหันขันธ์ป๊บ บ่อขาดสักหน้อย เลยนา

มีศรัทธาล้น ในศาสนา มุ่งสู่ธรรมา ก๋ายามาเข้า

สละบ้านต๋น ผู้คนตี่เฝ้า ป้อแม่บ้านเฮา คนฮัก

มาเป๋นพระสงฆ์ ทรงศีลยิ่งนัก สะอาดหมดเกลี้ยง ก๋ามา

ได้บุญมากล้น กุศลนักหนา บุญหนักแต๊นา แผ่มาใหญ่กว้าง

ผลบุญมาถึง คนตี่ฮ่วมสร้าง ป่อแม่ญาติตาง ปี่น้อง

เมื่อต่านได้หัน ตุ๊นั่นบาตรก๊อง ต๋าลปัตรป้อง หน้ามา

จื่นใจ๋เต๋มล้น จ๋นน้ำออกต๋า กุศลนำพา ไหว้สาตุ๊เจ้า

ลูกครองผ้าเหลือง งามบ่อหมองเศร้า ปลื้มใจ๋ตี่เฮา หล่อเลี้ยง

อุ้มต้องหลายปี๋ บ่อมี๋หมดเสี้ยง เพื่อลูกในใส้ นั่นนา

ถึงบ่อรวยล้น ยากจ๋นนักหนา เพื่อลูกแล้วนา ป่อแม่หาได้

ลูกมีศรัทธา บรรพชาบวชใต้ พระรัตนตรัย เต๋มล้น

ป่อแม่นั่นหนา เปิ่นก่าบ่อป้น เป๋นญาติกู้คน ตันใด

อานิสงส์นั้น บ่อหนีไปไหน มรรคผลภายใน ไผไหนเกี่ยวข้อง

จะสร้างกุศล ผลใดใหญ่จ้อง หื้อเถิงแห่งห้อง บุญญา

เช่นกุฏินั้น พระจ๋ำพรรษา งามเลิศแต้นา ยกมาเปรียบอ้าง

บ่อมีบุญไหน เต่าบุญตี่สร้าง เป๋นสงฆ์องค์กุณ คุณพระ

ป่อแม่แก่หลาย บ่อดีกวรละ จั๊กจู๋งเข้าใกล้ วัดวา

ทานศีลว่าไว้ บ่อใส่ใจ๋หนา บ่อเต่าลูกยา มาเป๋นตุ๊เจ้า

ได้สาธุก๋าร ยกมือขึ้นเกล้า อนุโมทนาเอา ใจ๋ก๊อง

ดั่งทอดสะพาน วิมานแซ่ซร้อง เถิงหอแห่งห้อง เทวา

เหตุดังนี้แล้ว อย่าลืมกั๋นหนา นำตั๋วบรรพชา มาเป๋นตุ๊เจ้า

เกิดเป๋นป่อจาย เร่งขวนขวายเข้า อย่าหลงมัวเมา กั๋นนัก

ฮักป่อแม่กั๋น หื้อหมั่นฟูมฟัก เลี้ยงใจ๋ของท่าน สักครา

บุญอื่นหมื่นแสน บ่อแม้นดอกหนา ดั่งบุญบรรพชา หาไหนแถมได้

ถ้าผมล่วงเกิ๋น สูมายกไหว้ ขอหื้ออภัย แต่นี้

ขอจบกำปอ วาจ๋ากล่าวจี้ ขอหื้อทุกท่าน รุ่งเรือง

มโนเนือง สุดเสี้ยงเต่าอี้ เท่านี้เล่าหื้อฟัง ก่อนแลนายเหย...

เขียนใน GotoKnow โดย "พี่หนาน"
ใน กาพย์ กลอน โคลง ฉัน ค่าว

คำสำคัญ (Tags): #ค่าวบวชพระฉลองโบสถ์#ค่าว กำเมือง#งานผูกพัทธสีมาปิดทองฝังลูกนิมิต#บ้านแพะ ม.7 บ่อทอง ทองแสนขัน

หมายเลขบันทึก: 563679เขียนเมื่อ 11 มีนาคม 2014 20:08 น. ()แก้ไขเมื่อ 11 มีนาคม 2014 20:08 น. ()สัญญาอนุญาต: ครีเอทีฟคอมมอนส์แบบ แสดงที่มา-ไม่ใช้เพื่อการค้า-ไม่ดัดแปลงจำนวนที่อ่าน