ค่อยฟังรา อาวอาพี่น้อง ข้าจักไขข้อง แห่งห้องสังก๋า
กะโลงค่าวจ๊อย เป๋นถ้อยภาษา ของจาวล้านนา มาแต่เก่าเกื้อ
เป๋นวรรณก๋รรม ลำนำใฝ่เอื้อ จดจ๋ารคำเครือ เขียนคัด

บันทึกเหตุก๋ารณ์ ข่าวสารอาณัติ เกร็ดเชิงประวัติ เมินมา
หาอ่านเอาเต๊อะ เป่อเลอะปั๊บสา หรือจากต่ำรา ภาษาค่าวสร้อย
บัดนี้สมัย สนใจ๋มีหน้อย เหมือนไฟเปล๋วมอย ลมพัด

อยากฟื้นคืนมา ญะสารพัด ติดขัดก็ด้วย ศิษย์ครู
ล้ำไปกว่านั้น สถาบันหรู ขาดครูของครู ฟื้นฟูยากใบ้
ลางเทื่อหลับฝัน คนบรรพ์นั่งไห้ ลูกหลานเขาใย บ่คล้อย

ตั๋วเมืองก็หาย ค่าวไยก็ซ้อย กะโลงก็จ้อย ตึงมวล
เอ็นดูเจ้นล้ำ คนบรรพ์กำสรวล ลูกหลานเฮาควร จวนกั๋นสืบสร้าง
เริ่มที่ตัวเฮา ใฝ่เฝ้าเอ่ยอ้าง น้อมใจ๋ไปวาง ซึมซับ

ใจ๋หาญอ่านเขียน ตำเปียรเวียนนับ ศึกษาต่ำหรับ ต่ำรา
ฟื้นฮีตขึ้นจั๊น ช่วยกั๋นฮักษา อักษรล้านนา ภาษาค่าวสร้อย
กะโลงแถมหนา ฟื้นมาเทื่อหน้อย สืบฮีตสืบฮอย เอาไว้

เจ้นลูกเจ้นหลาน ได้หันได้ใจ๊ เขาจักสืบได้ ปายลูน
ฮีตล้านนาไซร้ จักได้บ่สูญ รุ่งเรืองไพบูลย์ ปูนนิรันดร์หั้น
ม่อนสาธยาย มาหลายขีดขั้น มันอาจบ่นัน ม่วนเพราะ

ก็ขอสูมา และลาก่อนเนาะ วันลูนจักเหลาะ มาไจ
สุดสายใย ค่าวไว้เต้าอี้ เต้านี้ขอวางลง ก่อนแลนายเหย.