สันติภาพ ไทย กำปูเจีย จงบังเกิด

อันว่าทุกข์อ้าโอ้ โหดร้ายปานเหลือ
โพยภัยพาลรุกรานอย่างฮ้าย
เป็นจั่งใดแท้ คือคึดอ่าน เข่นฆ่า น้อท่าน
ปรารถนา ชนะได้พ่ายแพ้ ท่อกัน

บ่มีสงครามใด ลุแม่ง ชนะศึก น้อพ่อ
บ่เคยมีบ่ตายม้างหลายศพล้น ท่อนั่นแหล่ว
เคยอยู่ดีกันแล้วไปมาหาสู่  ท่อนตั่ว
พอเคียดขม กันแล้ว ศัตรูล้วนมิตรหาย แม่นละบ้อ

โอ้นอ สุ่มไทยเจ้า กำปูเจีย หมู่แพง  สหายเฮย
เป็นจั่งใดน้อลุง จั่งมาผิดกันซ้ำ
อยู่กันดีสุขล้น สราญอยู่ บ่เคยเปลี่ยน
ให้พวกดังโม ตั๋วต้ม  แผ่นดินเจ้า ลุกเป็นไฟ ซั่นละบ้อ

เป็นเพื่อนบ้านพี่น้อง ย้ายหนีได้ละบ้อ ลุงเฮย
บ่ฮักแพงแบ่งปัน เฮ็ดแนวใดเป็นได้
โบราณเก่าอดีต บ่มีเขตแบ่งปัน ดอกพ่อ
อยู่กันคือพี่น้องสุ่มเซื้อป้าลุง

ไทยเขมรนั่น อื่นไกลอยู่บ้อ  ท่านเฮย
คือได้พากันก่อสร้างสาโดนแล้ว
น้ำเต้าปุงหน่วยเดียวคลานกันออกมา
เป็นทั้งน้องกับอ้าย ใหญ่กล้าฮ่วมเฮียง ท่อนั้นแล้ว

สะแม่นตาหัวร่อ ถืกต้มผิดกัน คักน้อ
บักดังโม ซุ่มมัน วางแผน ดักเจ้า
ผิดกันทั่วทุกซอก ความเจริญหนีห่าง
ทุกข์ยากเข็ญเกิดได้  อุบายล้นเสวยสุข

ขายสินค้าเสพล้นทุกอย่างมันทำ แม่นบ้อ
ความระยำสุ่มหัวเกิดทั่วทุกคุ้ม เบิ่งเอาตี้
ความรุ่งเรืองกำลังเกิด หลายหลากหลุดหนี
จักรพรรดินิยมนี้แผนฮ้าย ม้างเฮา พี่น้องเอย

จึงควรฮู้ทันแท้ อย่าหลงได้ หมู่เฮา
พากันค่อยโอ้โลม โสกัน อย่างแท้
อดส่าเจ้าอดสา อดทนแน่  หมู่เฮย
มีแต่สุ่มซาวเซื้อ หลานลูก พญาแถน ท่อนั้นแหล่ว

ฮักกันไว้ ดีกว่า ซังกัน พี่น้องเฮย
หมู่ประสงค์แนวใด คอยจาโลมไว้
ถอยกันคนละก้าว จั่งคึด เจรจา
ไทย เขมร คงไว้ สันติภาพ ฮ่วมกัน
เด้อพี่น้องเอย
สาธุ

อิศรา ประชาไท

23 กรกฎาคม 2008

ศัพท์ยาก

เคียดขม  แปลว่า โกรธ

พวกดังโม แปลว่า พวกจมูกโต หมายถึง ฝรั่ง

ตั๋วต้ม แปลว่า หลอกลวง

สร้างสาโดนแล้ว แปลว่า สร้างสรรค์มาอย่างยาวนาน

น้ำเต้าปุง คือ ต้นกำเนิดของคนในอุษาคเนย์

สะแม่น แปลว่า  ดั่งว่า
โอ้โลม แปลว่า พูดคุยกันอย่างมีอัธยาศัย

 

โสกัน แปลว่า พูดจานำเสนอแนวคิด

แถน แปลว่า เทวดาสูงสุดที่คนอุษาคเนย์มีความเชื่อร่วมกัน แถนหลวงฟ้าคื่น คือเทวดาสูงสุด หาความรู้เพิ่มเติม ใน ตำนานขุนบูฮม , ปูสังกะสา ย่าสังกะสี ,          มหากาพย์ท้าวฮุ่งหรือเจือง

ขอบคุณ  www.geocities.com เอื้อเฟื้อรูปภาพ

ปราสาทพระวิหาร มรดกมนุษยชาติ