ค่าวยาว “งานยกสิงห์และสืบจาต๋าวัดป๋างเคาะ”
...
ขอวันตา ไหว้สาปี่น๊อง ทุกโขงเขตห้อง หมู่เฮาจาวเหนือ
ปี่น้องป๋างเคาะ ได้มาจ่วยเหลือ ทำบุญจุนเจือ ฮ่วมกั๋นหมั่นสร้าง
จ่วยกั๋นยกสิงห์ เงินคำสองข้าง ขึ้นแต่นข้างตาง เมื่อเจ๊า
หละอ่อนสดใส เต้นไหวหยอกเย้า ม่วนจื่นหมู่เฮา งามดี
สาวงามรำฟ้อน อวยพรเสริมศรี แม่บ้านเข้าที รวมกั๋นรำได้
ขอบคุณน้ำใจ๋ คนไทยไกล๋ใกล้ มาฮ่วมงานใน ฮ่มวัด
เข้าสืบจาต๋า ครูบาเคร่งครัด สะเดาะห์ต่อได้ จีวี
ผ่านกั๋นไปแล้ว แว่นแก้วเสริมศรี ของเซ่นของพลี แบ่งกั๋นทุกผู้
อาหารของกิ๋น เหมือนหมิ่นบ่อู้ นำมาสู่จู จ๋นครบ
มีของคาวหวาน โฮงตานตี่พบ น้ำดื่มหยิบได้ ง่ายดี
ไอติมก๋วยจั๊บ น้อมฮับสุขศรี จ่วยกั๋นอย่างดี บ่ามีอดกั้น
ขอบคุณหลากหลาย ทุกสายเตี่ยงหมั้น ส่งเสริมบุญตัน หันป๊บ
กือสามัคคี หมู่ดีเคารพ พร้อมใจ๋จ่วยด้วย ศรัทธา
ดั่งจื่อของวัด “ศรีบุญเรือง” นั่นหนา ก่อเกิดธรรมา ปั๋ญญาแผ่กว้าง
ตัวหนานยกมา ใจ่ว่ากล่าวอ้าง เกิ๋นตางกำครู ตุ๊พระ
ใจปรารถนา กถาวาทะ บอกข่าวหื้อได้ ทำบุญ
ขอบคุณปี่น้อง จ่วยกั๋นเสริมหนุน ขอบุญก๊ำกูล เพิ่มพูนปายหน้า
เล่ามาจาดเมิน อู้เพลินแล้วข้า ได้แต่นำมา รื้อฟื้น
หื้อเต้นรำวง โค้งกั๋นครึกครื้น ความสุขเกิดขึ้น เนอนาย
เย็นสบาย ม่วนกั๋นทั่วหน้า ขอพักสักครา ก่อนแหล่นายเหย.
...
“พี่หนาน”
17/4/2559
…
หมายเหต...เขียนให้พ่อหนานเย็น กอบรูป ใช้จ๊อยในงานวัดศรีบุญเรือง ที่บ้านปางค้อ บ่อทอง ทองแสนขัน อุตรดิตถ์ เมื่อวันที่ 14 เมษายน 2559 เวลาประมาณ เที่ยงวัน (พี่หนานคนถือไมค์ครับผม)..
แต่ง ได้ดี มีความหมายมากๆ ค่ะ
ขอบคุณคุณหมอเปิ้ลมากคร้าาบบบ