ภาพ : http://www.dmc.tv/images/highlight/Vesak_Day_Lord_Buddha_Day/1.jpg

ขอยอมือสา วันตาไตรรัตน์ คะรุอุปัช ฌายะอาจ๋ารย์
เครือออนม่อนน้อย จักร้อยไขขาน อู้เถิงต๋ำนาน วันวิสาข์เจ้า
ย้อนหลังเติงตัน สองปันขวบเข้า ปล๋ายแถมบ่เบา หกร้อย

สามสิบสองปี๋ วันดีบ่น้อย เป๋นวันเปล่งป้อย ก๋าลา
วันศุกร์เมื่อเจ๊า เนาปี๋จอหมา เดือนแปดเหนือนา สิบห้าค่ำขึ้น
เกิดอัศจ๋รรย์ ปากั๋นเต่นตื้น สิทธัตถะยืน เกิดแล้ว

ลุมพินีวัน เนืองนันบ่แคล้ว ในประเทศแก้ว อินเดีย
เจ็ดก้าวย่างย้าย เตวได้บ่เสีย บ่อ่อนบ่เปีย บ่เปี๋ยเกาะเส้า
เจริญพระชน มายุซาวเก้า สละราชเอา บวชพระ

ป้ำเป็งเปียรศรี หกปี๋วาระ เดือนวิสาขะ แปดเป็ง
วันปุ๊ดเมื่อเจ๊า ปี๋เล้าไก่เก๋ง ตรัสรู้เอง เป๋นพุทธเจ้า
เนรัญชรา ฝั่งนทีเหย้า อริยสัจจ์เอา สี่ตั๊ด

สี่สิบห้าปี๋ มุนีเลาะลัด โปรดสัตว์ทั่วถ้วน โลกา
สั่งสอนธัมมะ ด้วยพระเมตต๋า พระกรุณา สัตต๋าโลกกว้าง
เว้นชั่วทำดี มีจิตสล้าง ตั้งใจ๋แป๋งตาง สู่ฟ้า

หื้อฮักษาศีล กิ๋นตานสง้า ภาวนาถ้า ตางบุญ
หมายเลยจากฟ้า ป๋ารมีหนุน นิปปานเมืองบุญ อุดหนุนเตื่อมแถ้ง
สอนหื้อเชื่อกั๋ม น้อมนำไป่แสร้ง บาปบุญใดแฮง ส่งยู้

องค์พระสัตถา เล็งมาฮับฮู้ จะเถิงฮอดจู้ นิปปาน
จึงปล๋งวาต๊ะ อายุสังขาร สามเดือนประมาณ นิปปานจักเข้า
ฮอดภูมมวาร อังคารวันเศร้า เดือนแปดเหนือเฮา เป็งตั๊ด

พุทธะนิปปาน กุสินารัฐ มนุษย์เทพสัตว์ โศกา
ละธรรมเอาไว้ วินัยแถมหนา เป๋นศาสดา แห่งสาวกเจ้า
พระปัญญาคุณ การุณเหนือเกล้า วิสุทธิเลา สง้า

สหประชา ชาติเล็งบ่จ๊า ประกาศทั่วหล้า สากล
วิสาขะนั้น สำคัญจุ้หน ทั่วทั้งสากล แต่ต้นไปหน้า
สิบห้าธันวา ปี๋สองปันห้า สี่สิบสองนา เป๋นเก๊า

น่าอัศจ๋รรย์ งงงันแต๊เล้า วันประสูติเจ้า สิทธา
วันตรัสรู้ แลวันนิปป๋าน์ วันเดียวกั๋นนา แปดเป็งว่าอั้น
ฮอดเถิงวันศรี ปี๋นี้แม่นหมั้น มาตรงกับวัน สุกก๊ะ

แปดพฤษภา นั้นหนาวันพระ วันวิสาขะ ปู๋จา
ยอตานสำรับ ศีลฮับฮักษา แลภาวนา ฮักษาจิตหมั้น
เวียนเตียนแถมนา วัดวาตี้หั้น ใกล้บ้านใผมัน เน้อครับ

สุขสามผะก๋าร จักพลันได้ฮับ ทรัพย์สินจักได้ มูลมา
อุดมพละ วรรณะงามต๋า อายุทีฆา ไหลมาสู้เจ้า
จักอู้ไปหลาย กลัวอายคนเถ้า จึงขอวางเนา เบายั้ง

ไปก่อนเนอรา จักมาแถมครั้ง เมื่อจิตใจ๋ตั้ง ก่อนเฮย
วางลงเลย จบเฉยเปียงอี้ เต้านี้ขอลาไป ก่อนแลนายเหย.