พี่น้องเอ้ย..สิได้เผยคำเว้า.. เรื่องผู้เฒ่านี้สาก่อน

จริงหรือเท็จ อย่าเดือดฮ้อน..ผญากลอน..ให้ฮับฟัง

เพิ่นว่าไว้ เป็นควมฮู้ พิเคราะห์ดู ให้ถ้วนถี่

ปากกะดี หูกับตา กะมี..ซอมเบิ่งให้ฮู้แจ้ง..จ่างป่าง..ซั่นแหล้ว

ตั้งแต่จำควมได้ เห็นกองไฟ กะฮู้อยู่

แต่สิ่งที่บ่ฮู้ คือไฟแท้ มาแต่ไส

ถามเพิ่นพอส่ำนี้ กะวีไฟ ให้ลุกตื่ม

ลืมกะลืมบ่ได้ ไฟกะลุก ลามก้น..ซั่นแหล้ว

อันว่าก้น บ่แม่นก้น ผู้ข้า..เด้อ พ่อใหญ่

แม่นก้นหม้อ ก้นไห อันอยู่เทิง ก้อนเส้า ผู้เฒ่าเอิ้นว่า เตา

เบิ่งไปโดน แฮ่งอยากฮู้ กะเลยจุ๋ไฟใส่

อีหยังนอ อยู่ทางใน หม้อไหที่ตั้งเส้า

คือสิอุก อั่งเอ้า สิจาเว้า ว่าจั่งได๋..

พากันฮ้อน จนเป็นไอ ทะลักล้นออกมาฟ้อง..ซั่นแหล้ว

นี่ละเด้อพี่น้อง มาฮอดหม่อง หว่างข้องใจ

เพิ่นว่าน้ำกับไฟ ต่างไป คนละก้ำ

คันมีไฟ มาซ้ำ ตำตื่มกะลืมเย็น

น้ำกะอยู่บ่เป็น ย้อนว่าไฟ..มาลนก้น

เปรียบกับคน ให้คือหม้อ พอให้เห็น เป็นโตอย่าง

ไฟกะอยู่ตะล่าง น้ำกะอยู่ในหม้อ พอสิฮู้หว่างเฉลย..แล้วติ้นอ

จารนัย ไว้ส่ำนี้ ฮ้ายหรือดี ให้ติกล่าว

คึดนำฮอย ผู้เฒ่า พอได้เว้าสู่ฟัง..ซั่นแหล้วพี่น้องเอ้ย

......................ข้าวก้นบาตร ๒๐๐๔๗๒-๐๕๐๑๕๖..