ยอมือสาธุ์ วันทาไตรรัตน์ ครุอุปัช- ฌายาอาจ๋ารย์
ในโอกาสนี้ จักชี้ไขขาน เล่าถึงตำนาน วันยี่เป็งเจ้า
เป๋นก๋ารศึกษา ล้านนาแบบเบ้า หื้อลูกหลานเฮา ได้ฮู้

ขอตั้งความเปียร เขียนเป๋นกระทู้ น้อมใจ๋หลิ่งหลู้ ทางธัมม์
ยี่เป็งเฮานั้น เล่าขานจื่อจ๋ำ สืบเล่าเก่ากำ ลำนำก่อนกี้
ย้อนเมื่อเก่าก๋าล ล้านนาที่หนี้ บ่มีกระทง ลอยน้ำ

นพมาศี อันนี้ขอย้ำ ห่อนฮีตเก่าก้ำ ล้านนา
ยี่เป็งนาล้าน เหนือหั้นรัฏฐา สิบสี่ค่ำดา ตานาแป๋งป้าน
ประตู๋ป่าแปง แป๋งไว้หน้าบ้าน ของกิ๋นของตาน เหมียดพร้อม

แถมวันถัดมา สิบห้าค่ำน้อม พร้อมกั๋นที่หั้น วัดวา
ในคาบเมื่อเจ๊า เฝ้าพระสัตถา ถวายตานา แด่สังฆาเจ้า
ขวายปล่อยว่าวลม นิยมแบบเบ้า ฮีตของหมู่เฮา เก่าก๊าง

ฮอดค่ำคืนมา จั๋นทาเด่นค้าง ไปวัดแต่งห้าง ฟังธัมม์
เมื่อเทศน์จบแล้ว เฮาก็มาต๋าม ผะตี๊ปโคมงาม สีสายสว่างแจ้ง
ปล่อยว่าวไฟ บอกไฟดอกแถ้ง แสงอร่ามเรือง ส่องฟ้า

ต่างแซ่ซ้องเสียง สำเนียงสง้า สาตุ๊ทั่วหล้า ยี่เป็ง
แบบนี้เนอเล้า ฮีตเก่าถูกเผ็ง อย่ามัวไปเล็ง ครื้นเครงเอกอ้าง
ลอยกระทง ลงน้ำแม่กว้าง นพมาศนาง แถมเล้า

ในถิ่นล้านนา เมินมาแต่เก๊า บ่มีเน่อเจ้า ฮีตฮอย
หากเฮาจักฟื้น คืนมาใจ๊สอย ขอหื้อสืบฮอย ค้อยผ่อแบบเบ้า
ยี่เป็งล้านนา ปู๋จาพระเจ้า ป๋างเมื่อพระลง จากฟ้า

เนื้อแต๊ยี่เป็ง เล็งหื้อสง้า ต้องมีใจ๋กล้า เลือกเอา
จบลำเนา ค่าวลงเปียงอี้ เท่านี้ของวางลง ก่อนแลนายเหย.

หมายเหตุ
ฮีตเฮาจาวเหนือ :
สิบสี่ค่ำดา แป๋งประตู๋ป่าหน้าบ้าน สิบห้าค่ำตาน ใส่บาตรหยาดน้ำ ฮับศีลฟังธรรม ต๋ามประทีปสีสาย จิบอกไฟ ปล่อยว่าว