ค่าว เดือนแห่งความตาย
๑๓/๐๙/๒๕๕๗
**********
ค่าว เดือนแห่งความตาย
บ้านเฮาเดือนนี้ คนดีมาต๋าย แม่ญิงป่อจาย ป๋ายเกิ๋นสี่เก้า
ห้าศพติ๊ดกั๋น ตี่หันคนเฒ่า คนแรกนอนยาว เมินนัก
เจ้บในร่างก๋าย บีบคลายนวดพัก ป้อนข้าวหล่อเลี้ยง ก๋ายา
โซหลายปี๋แหล้ว บ่อแคล้วดอกหนา มันเถิงเวลา เซาะหาตุ๊เจ้า
คนตี่สองต๋าย โรคสุมรุมเข้า ยามเมื่อหนุ่มเลา รวบรัด
เหมาบ้านตาสี บ่มี๋ผ้าฮัด ของปิ้ดป้องดัง เลยนา
พ่นยาหญ้าเจ๊า ข้าวโป้ดแถมหนา บ่ได้เปิ่งปา ผ้าปิดสักหน้อย
ปออายุหลาย ร่างก๋ายเสื่อมด้อย มะเร็งปอดคอย เร่งรัด
ห้าสิบเจ้ดปี๋ บอกจี้เด่นชัด เถิงคราวล่วงลัด อำลา
คนตี่สามนั้น ควรหมั่นศึกษา บ่ส่งข่าวมา ล่วงหน้าสักหน้อย
ร่างก๋ายแข็งแฮง เรี่ยวแรงบ่ด้อย คนหนุ่มคนดอย ไปนัก
โรคไต๋เฉียบพลัน หมอต่านบอกตั๊ก ปามาล่าจ้า เนอนาย
ไห้กั๋นท่วมท้น ป่อต๋นมาต๋าย ลูกญิงลูกจาย วำวายอยู่ใกล้
คนตี่สี่หัน สล้บเหมือดได้ รถเครื่องจนไว ยิ่งนัก
ปาไปหาหมอ บอกรอแหมพัก หวังผ่ออาก๋าร สักครา
คนไข้แย่แหล้ว บ่อแคล้วดอกหนา กะโหลกบวมมา ฮ้องหาหมอเจ้า
ผ่าตัดบ่หาย เสียบสายบ่อเข้า อาก๋ารของเรา แย่นัก
สองวันติ้ดกั๋น หมอหมั่นฟูมฟัก ยื้อจั๊กเต๋มตี้ แหล้วนา
ในตี้สุดแล้ว ลาไกล๋ลับต๋า ส่งเธอคืนมา เปิ่งปาตุ๊เจ้า
คนตี่ห้าหนอ บ่รอหื้อเข้า เผาเปิ่นหม้ดไฟ เมรุพัก(เมรุ อ่านว่า เมน)
มาต๋ายควบกั๋น คนนั้นก่ตั๊ก คนนี้จ่มส่าย หัวมา
บ้านเฮาเดือนนี้ หยังอี้กั๋นหา เกิ่งเดือนล่วงลา ห้าศพแล้วเจ้า ๆ...
สำหรับศพที่สามคือ คุณพ่อโพธิ์ชัย วงษ์ปี พนักงานจ้างขับรถของ อบต.บ่อทอง ยกที่ดินที่จับจองให้เป็นบ่อทิ้งขยะของ อบต. จำนวน ๓ ไร่ เป็นเครือญาติกับผู้เขียน ขยันทำงาน วันหยุดก็ไม่ยอมพัก ปลูกผักเผาถ่าน หาเห็ดหาหน่อไม้มาเลี้ยงเมียและหลาน ๓ คน เป็นแฟมิลี่แมน ขับรถส่งหลานไปโรงเรียนและรับกลับทุกวัน เป็นคนคุยเก่งสนุกสนาน สนใจเรื่องการเมืองมาก...
ผมแต่งค่าวยกย่องเกียรติให้ในวันฌาปนกิจที่ ๑๑ กันยายน ๒๕๕๗ ที่ผ่านมาวันนั้น นายก อบต. เชิญนายอำเภอมาเป็นประธานในพิธีให้ด้วยดังนี้...
ค่าว ยกย่องเกียรติพ่อโพธิ์ชัย วงษ์ปี
ฌาปนกิ้จ มวลมิตรตังหลาย แม่ญิงป่อจาย หลากหลายหนุ่มเฒ่า
มาฮ่วมไหว้สา ครูบาองค์เจ้า ต่านสวดฟังเลา จ๋นครบ
วางบังสุ๊กุ๋ล ผ้าป่าสมท้บ เวียนจ้บจ๋นได้ หลายครา
ดอกไม้จั๋นนี้ ทั่วไทยนั่นหนา วางขอสูมา วันทาก็ได้
ป่อชัยเกยหัน ลูกหวันหลานใกล้ เบาะว่าคนใด ก่อฮัก
น้องฟิล์มน้องเต๋า น้องต่ายฟูมฟัก ป่ออุ้มโอบเลี้ยง เมินมา
ป่อชัยเฮานั้น เกยหันติ๊ดต๋า รถเขวขับมา ฮ้องหาหน้าบ้าน
ปลูกผักเผาหลัว ในฮั้วรอบด้าน วันหยุดลนลาน บ่อพัก
หาอยู่หากิ๋น เสริมสินเติ่มนัก หวังจักเก้บได้ ออมนา
บ้านแพะเฮานั้น ฮู้หันกั๋นหนา ป่อชัยจะมา อาสาจ่วยเฝ้า
มาจ่วยจั้ดแจ๋ง แป๋งตี่นึ่งข้าว โฮงครัวชั่วคราว เฮาป๊บ
เปิ่นฮยะกำกิ๋น ต๊องถิ่นได้ครบ งานไหนเฮาได้ เปิ่งปา
วาทศิลป์เน้น โดดเด่นนักหนา เทียบจั้นครูบา ยากหาไผใกล้
ป่อชัยเปิ่นเป๋น เจ่นเฒ่าแก่ได้ ไปขอลูกไท ปี่น๊อง
เป๋นตี่ปรึกษา อาวอาพวกพ้อง อู้จ๋าหื้อได้ ปั๋ญญา
งานบ้านงานบุญ ค้ำคูณแต้หนา โฮงเฮียนวัดวา อาสาเข้าใกล้
ปี่น๊องลูกหลาน ญาติมิตรเหนือใต้ มาส่งป่อชัย กั๋นนัก
มาจ่วยปิ้ดต๋า เถิงเวลาพัก ขอหื้อป่อเจ้า ไปดี
ทำบุญส่งแล้ว จุ่งไปสุขี นิมมานรดี ตี่อยู่ปายหน้า ๆ
ขอหื้อป่อโพธิ์ชัย ไปสู่สุคติสัมปรายภพด้วยเถิด....
ด้วยความรักและอาลัยจาก...
นายพรพจน์เรียงประพัฒน์
ผู้แต่งค่าว.
ขอบคุณทุกท่านที่สนใจ ขอบคุณ GotoKnow
ความเห็น (2)
ขอบคุณกำลังใจ จากคุณครู และอาจารย์ทั้งสองท่านที่ให้กำลังใจมากครับผม
เนาว์นิรันดร์ ครับ