หน้าแรก
สมาชิก
เทพลีลา
สมุด
สัปป๊ะความฮู้อู้เ...
เลือกผู้แทนแบบใดดี
เทพลีลา
นาย เทเวศร์ ปาลี
สมุด
บันทึก
อนุทิน
ความเห็น
ติดต่อ
เลือกผู้แทนแบบใดดี
ได้แต่ตั้งความหวังไว้ว่า เมื่อไหร่ที่บ้านเมืองเรามีนักการเมืองที่ซื่อสัตย์ ไม่กินไม่โกง พัฒนาบ้านเมืองให้เต็มร้อยเปอร์เซนต์ เมื่อนั้นเราคงจะเห็นถนนบ้านเราปูด้วยทองคำ
จะเลือกผู้แทนผ่อหื้อดีดีเน่อ!
เทพลีลา
ยอหัตถา อาวอาปี้น้อง ญิงจายหมายข้อง เปื้อนป๊องหลวงหลาย
อันตั๋วข้านี้ ขอจี๊ขยาย การเมืองการควาย วุ่นวายป่นปี้
ด่ากั๋นบ่เว้น เล่นกั๋นอย่างอี้ เซาะหาคนดี บ่ป๋ะ
กูต้องเป๋นนึ่ง มึงบ่อาละ บ่ยอมสละ ตั๋วเอง
เมื่อมีอำนาจ ฟันฟาดข่มเหง ทำเป๋นนักเลง บ่เก๋งจาวบ้าน
นักเลงหัวไม้ ไผไผก็ย่าน หยังมารำคาญ แต๊ตั๊ก
ปี้น้องตังหลาย ญิงจายหมายฮัก คนลงสมัคร การเมือง
จ๋ำหน้ากั๋นไว้ แป๋งใจ๋หื้อเปลื๋อง ผ่อกั๋นเนืองเนือง จ้างเคืองปายหน้า
เลือกเพราะสงสาร เยียะก๋ารแล่งหน้า ได้แล้วบ่มา ข้องแวะ
ต๋อนตี้หาเสียง ป่ำเปียงมาแว่ ฮ้องป้อฮ้องแม่ กู้กำ
ฮับปากจะสร้าง หนตางประจ๋ำ ประปาจะทำ จ๋ำปอบ่ได
ฮับปากกู้เจื้อ ขึ้นเหนือล่องใต้ ฮับปากเรื่อยไป บ่เว้น
เตียวห่างจ๊าดไกล๋ บ่ได้หลีกเล้น ไหว้มาเป๋นเส้น เนอนาย
เลือกผมเต๊อะครับ จะฮับแป๋งฝาย จะฮับซื้อควาย ฮับขายข้าวหื้อ
กึ๊ดหยังบ่ถอง สมองมืดตื้อ ฟังเสียงล่ำลือ ปี้น้อง
เบอร์ใดก็หมาย สหายพวกพ้อง มันตึงเกี่ยวข้อง กู้คน
ใกล้วันเลือกตั้ง มันหยังสับสน เข้าออกเวียนวน จ๋ำจ๋นบ่เสี้ยง
เบอร์นึ่งเบอร์สอง รับรองจะเลี้ยง สามสี่ห้าเรียง ว่าอั้น
ลางพ่องซื้อเสียง เสี่ยงหมาไล่กั๊น จ่ายแบบบ่อั้น ก็มี
ลางพ่องแจกน้ำ จ้วยก๊ำเผาผี เจ้าภาพพิธี แจกฟรีกู้บ้าน
พ่องแจกหม้อไห ตะไหลแม่บ้าน แถมเต๊นท์ในงาน พร่ำพร้อม
พ่องแจกแผวหวี ทัพพีจ๊อนส้อม น้ำอ๋บน้ำหอม แถมตวย
พ่องแจกเสื้อกั๊ก พ่องลักหื้อหวย ไผตี้ใคร่รวย ก๋าตวยเน่อเจ้า
ข้าขอแถลง ชี้แจ๋งน้องเหน้า ฟังเต๊อะฟังเอา ปี้น้อง
อันว่า ส.ว. ส.ส.ตั้วต๊อง เทศไทยตั้วห้อง เฮานา
ต้องมีความฮู้ ดูก๋ารศึกษา ต้องจ๋บปริญญา จึ่งมาเป๋นได้
มีอุดมก๋าร ผสานเหนือใต้ จ๋บกฎหมายไป ยิ่งยอด
เป๋นคนปากกล้า ฮักษาตั๋วรอด อยู่ได้จุ๋จอด ฮอดเมิน
จ้างเขียนกระทู้ จ้างอู้ฉุกเฉิน บ่าใจ้หาเงิน มาแจกจาวบ้าน
ส.อบจ. อบต.เต๋มบ้าน เป๋นคนประสาน อย่าจ๊า
จาวบ้านเดือดฮ้อน จิ๋ตหลอนเหว่ว้า ผู้แทนหนีหน้า บ่ฟัง
จ้างเป๋นอย่างนี้ หลบลี้หันหลัง บ่มาฮับฟัง ตุ๊กขังโศกเศร้า
สินก๊าเกษตร บ่าเต๊ดบ่าเต้า รากาย่อมเยาว์ แต๊ตั๊ก
น้ำมันก่อแปง ปลูกแต๋งปลูกฟัก บ่กุ้มก้าหัก ปุ๋ยยา
เอ็นดูปี้น้อง เกี่ยวข้องวงศา ปลูกไฮ่ปลูกนา เป๋นข้าเป๋นหนี้
หวังเปิ้งผู้แทน วางแผนล้างหนี้ จะได้กิ๋นดี อิ่มต๊อง
หน้าตี้ของต้าน ร่างสารกำร้อง หื้อผู้เกี่ยวข้อง รัฐบาล
เสนอกระทู้ จ้างอู้จ๋าหวาน ถึงรัฐบาล สั่งก๋ารถูกต้อง
ผู้แทนมีหลาย ส่งสายเกี่ยวข้อง เรื่องบ่ถูกดอง ขว้างละ
ได้ก้าคาดหวัง กู้หยั่งสับป๊ะ คงบ่ลดละ ซว๋ะงาน
เป๋นหลายวษา ก๋รรมาธิก๋าร แบ่งงบประมาณ จัดสรรค์ถ้วนหน้า
ยามม๋ดสมัย แป๋งใจ๋หว่ายหน้า แอ่วหาจาวนา พ่องเต๊อะ
ถ้าได้ผู้แทน มีแผนเป่อเลอะ เยียะก๋ารฟะเฟอะ เต๋มที
บ่เลือกแถมแล้ว ก้าดแก๊วถอยหนี จ่ำจื้อหื้อดี สิบปี๋บ่ใกล้
เงินเดือนสี่ปี๋ ภาษีรายได้ ต้องจ่ายออกไป จ๊าดนัก
ขอเตื๋อนญิงจาย สหายตี้ฮัก ผ่อหื้อนักนัก เป๋นดี
ส.จ.,ส.ส. ส.ว. ถ้วนถี่ อ.บต.ก็ดี เลือกดีหื้อได้
จะไปอยู่เฉย บ่เมื่อยบ่ไข้ ฟั่งฟ้าวออกไป ใจ๊สิทธิ์
ขอจ๋บค่าวลง บรรจงข้อคิด ถึงจะหน้อยนิด เนอนาย
วาดวางลง ป๋ดป๋งลงต๊าย เต้าอี้สหาย ก่อนแหล่นายเฮย.
@@@@@@
เทพลีลา
ชมรมกวีล้านนาหละปูน
อาศรมคนยองหละปูน
20 สิงหาคม 2547
เขียนใน
GotoKnow
โดย
เทพลีลา
ใน
สัปป๊ะความฮู้อู้เรื่องร้อยกรอง โดย..เทพลีลา
คำสำคัญ (Tags):
#จาวบ้านเดือดฮ้อน จิ๋ตหลอนเหว่ว้า ผู้แทนหนีหน้า บ่ฟัง จ้างเป๋นอย่างนี้ หลบลี้หันหลัง บ่มาฮับฟัง ตุ๊กขังโศกเศร้า สินก๊าเกษตร บ่าเต๊ดบ่าเต้า รากาย่อมเยาว์ แต๊ตั๊ก
หมายเลขบันทึก: 464641
เขียนเมื่อ 13 ตุลาคม 2011 15:26 น. (
)
แก้ไขเมื่อ 12 กุมภาพันธ์ 2012 20:58 น. (
)
สัญญาอนุญาต: ครีเอทีฟคอมมอนส์แบบ แสดงที่มา-ไม่ใช้เพื่อการค้า-อนุญาตแบบเดียวกัน
จำนวนที่อ่าน
จำนวนที่อ่าน:
ความเห็น (0)
ไม่มีความเห็น
ชื่อ
อีเมล
เนื้อหา
จัดเก็บข้อมูล
หน้าแรก
สมาชิก
เทพลีลา
สมุด
สัปป๊ะความฮู้อู้เ...
เลือกผู้แทนแบบใดดี
พบปัญหาการใช้งานกรุณาแจ้ง LINE ID
@gotoknow
สงวนลิขสิทธิ์ © 2005-2023 บจก. ปิยะวัฒนา
และผู้เขียนเนื้อหาทุกท่าน
นโยบายความเป็นส่วนตัว (Privacy Policy)
ClassStart
ระบบจัดการการเรียนการสอนผ่านอินเทอร์เน็ต
ทั้งเว็บทั้งแอปใช้งานฟรี
ClassStart Books
โครงการหนังสือจากคลาสสตาร์ท