ประวัติหมู่บ้าน

ประวัติบ้านเมืองเปลือย

อมพุทโธนโมเป็นเค้า ข่อยสิเว้าประวัติเมืองเปลือย ตั้งมานานโบราณบ้านเก่าเพิ่นได้เล่าบันทึกหลักฐาน จากคำนานของเมืองสาเกตุ ว่าเป็นเขตหน้าด่านสำคัญตกลงกันรักษาหน้าด่าน อยู่ทางด้านถ้ำฝ่ายปัจจิม ตั้งอยู่ริมหนองเปลือยหนองเก่าตามคนเล่าป่าเปลือยริมหนอง มาจับจองตั้งบ้านขึ้นใหม่จึง ได้ใส่ชื่อว่าเมืองเปลือยตามอุ่มเฟือยกกเปลือยริมน้ำ คนฝ่ายถ้ำมาจากเมืองลาว ตั้งแต่คราวเวียงจันทน์แดกม้างลาวจากข้างเมืองจำปาสัก มาตั้งหลักตั้งฐานบ้านช่อง มาตั้งหม่องเมืองบ้านขึ้นมามาทำนาทำสวนฝั่วไฮ่ คันต่อไปคราวก่อนพันปี หม่องนี้มีเมืองขอมตั้งอยู่ ตั้งแต่ปู่ชื่อสังกะสา แต่เดิมมาหลักฐานประกอบ อยู่ในขอบเขตบ้านเมืองเปลือยมีหลักฐานโบราณหลายอย่าง สิ่งต่างๆเครื่องปั้นดินเผา โบราณเอาฝังดินใต้พื้นคั่นขุดขึ้นได้เป็นหลักฐาน หนองโบราณคือหนองพระเจ้า เป็นหนองเก่าใกล้ดอนปู่ตาเฒ่าชราเคยเห็นเคยเล่า เป็นหนองเก่าเมวสถาน ของโบราณมีเทวรูป ยังเป็นฮูมของเก่ายังเห็น ที่เคยเป็นดอนของเจ้าปู่ ไผลบหลู่เป็นต้องตาย หรือฉิบหายงัวควายตายห่า คนกะซ่าว่าตอนนี้แข็ง จนออกแสงแสดงฤทธิ์เดช มันเป็นเหตุเกิดแนวบ่ดีต่อมามีหมอธรรมเฒ่าเก่าหมอธรรมเฒ่าวิชาเข็ดคง ได้ตกลงขับพวกผีออก ใหผีหลอกไปเกิดไปขาน หมอธรรมหาญคือพ่อจารย์ทีป ฝูงผีรีบย่านสั่นแล่นหนี ในราวปีสองสี่เจ็ดห้า หมู่ผีป่ารีบแล่นหนีไป ผีจังไรบ่กล้ามาอยู่ ดอนเจ้าปู่ไทบ้านเลยถางเป็นหนทางสร้างวัดมาใส่ สร้างวัดใหม่คือวัดเมืองเปลือย ถางเอาเฟือยเคือไม้ตัดออกข่อยของบอกเถิงความเป็นมา สร้างศาลาอุโบสถใส่ ทั้งเพิ่มพูนรายดีรายได้ ปลูกยาใส่ทำไฮ่ทำนา ฝูงปูปลาบ่อึดบ่อยาก กบปลาหากล้นอั่งหนองผือ ฮาวโงมมือปลาเข็งปลาค่อ อย่าเว้าต่อบ้านข่อยบ่ดี ว่าเคยมีคนเปลือยเสื้อผ้า สังหาว่าบ้านเมืองเปลือยกาย ข่อยอยากอายเซาสาอย่าว่า โอเฮาโอเฮาโอ

อ้างอิงมาจาก คุณพ่อวัฒนา ศรีวิไล