ยอมือสา วันตาท่านไท้ ข้าขอน้อมไหว้ ในครูอาจ๋ารย์
อันตั๋วข้านี้ ขอจี๊ไขขาน เถิงฮีตโบราณ ต๋ำนานแบบเบ้า
อันก๋ารไหว้ครู งามหรูบ่เศร้า เป๋นฮีตของเฮา เก่าจั๊น

ก๋ารจักฮ่ำเฮียน อ่านเขียนใดนั้น ศิลปะอั้น วิชชา
จักต้องยอไท้ ไหว้ครูสัตถา ปวารณา หื้อว่ากล่าวได้
นบด้วยหัวใจ๋ น้อมก๋ายเข้าไหว้ ฝากเป๋นศิษย์ใน ครูจั๊น

หญ้าแพรกดอกเข็ม ดอกบ่าเขือนั้น อย่าหื้อขาดอั้น เนอเฮา
แพรกจักขาดน้ำ แดดซ้ำมาเผา แพรกอดทนเอา เฮาก็เป๋นอั้น
ดอกเข็มเข็มแหลม แตงแนมสอดดั้น หมายหื้อเตียมตัน ปัญญะ

อันดอกบ่าเขือ เมื่อเถิงก๋าละ จักออกหน่วยอั้น คว่ำลง
หมายเอาเฮาไซร้ จักได้ผะสงค์ ต้องน้อมถ่อมองค์ ลงคนหื้อได้
หากศิษย์ตังหลาย ใส่ใจ๋ไจ้ไจ้ ทำตั๋วโดยนัย หมายจี้

จักได้เป๋นดี ในจีวิตนี้ ปราชญ์สอนจ้ะอี้ เมินมา
ก็แถมนั้นแหละ ขอแนะไว้หนา จักไหว้วันตา อย่างเดียวบ่ได้
บูชาเชิดชู คุณครูไจ้ไจ้ ทำได้สองตาง เน้อครับ

อามิสบูชา โภคาสินทรัพย์ สำรับกับข้าว ดอกเตียน
ยึดคำครูไท้ เทิดไว้เหนือเศียร เปียรกระตำไป ได้ดีฮอดเฒ่า
องค์พระพุทธา พระสัมมาเจ้า ทรงสรรเสริญเอา สองวัตร

เดือนมิถุนา บุราณาณัติ วันพฤหัส ไหว้ครู
ฮอดแล้ววันนี้ วันดีงามหรู ข้าขอกราบครู บูชาน้อมไหว้.
( กราบ )