4 ขอ,4 จะ,4 ไม่...มงคล.. [คุณภาพสูง].mp3

บทที่ ๑ ถวายเทียนพรรษาพระพุทธบาทสี่รอย

ขอยอหัตถา ขึ้นมาหว่างกิ๊ว ยกมือสิบนิ้ว แตนธูปหอมไก๋

ทัศนาแรกเริ่ม ขอเล่าความใน เอาดวงหทัย แตนกำกล่าวอู้

ขอน้อมไขจ๋า บอกกล่าวหื้อฮู้ เจิญจวนกั๋นดู อ่านไปเต๊อะ

เล่าเรื่องแรกเริ่ม ส่งเสริมปะเลอะ ทัศนาธรรม ยอเตียนถวาย

ก่อนเข้าพรรษา ได้บุญมากมาย เสริมส่งญิงจาย น้อมนบ

นำโดยหลวงพ่อปาน สมภารตี้เคารพ วัดป่าเทพขันติ การาม

ศรัทธาญิงจาย หลวงหลายแห่หาม ตึงตุ๊เจ้า วัดป่า

ศรัทธาจาวบ้าน ห้วยทรายดั่งว่า ไปกั๋นนักหนา พร้อมกั๋นเดินตาง

ตี้สี่สิงหา พร้อมกั๋นกู้อย่าง ขึ้นรถเดินตาง ไปแล้ว

เวลานั้นขวาย กิ๋นข้าวงายแล้ว รถตู้มาแต้ว รอถ้า

รถออกจากวัด ไปฮับศรัทธา ห้วยทรายว่าอั้น บ่นักบ่หน้อย

สิบป๋ายต๊ะอั้น ใจ๋บานเปล้งป้อย ขับรถขึ้นดอย พระบาท

ขับรถไปไก๋ บ่หื้อได้พลาด เวลามื้อเพล ตุ๊เจ้า

ก่ว่าตอนแรก จะออกไปเจ๊า แต่ว่ามันใกล้ ฮิมตางอำเภอ

ขึ้นรถกั๋นแล้ว บ่ได้พลั้งเผลอ จะต้องไปเจอ ขึ้นดอยว่าอั้น

ขี่รถขึ้นดอย หันอะหยังหั้น นอนเล่นฮิมตาง เป๋นหมู่

เล็งแยงส่องผ่อ อ่อเป๋นว่าหมู ในป่าดงดอน ออกมานอนเล่น

มันบ่กั๋วคน ตี้ขับรถแล่น ผ่านมันไป ตั๋วอ้วนน่าฮัก

กะไว้ตอนปิ๊ก ลงมาย้างพัก ของกิ๋นหื้อนักนัก ถ้าก่อน

ถ้าก่อนเน่อหมู จะมาผ่อมันนอน จะไปเอาปอน สักกำเดียวมา

ขึ้นดอยมันสูง เหมือนขึ้นนภา อากาศเมฆา จะอั้น

อยู่ในรถแล้ว บางคนนั่งกั๋น บางคนเซานอน งีบหลับ

บางคนนั่งหาว ออกมางับงับ เพราะหูมันอื้อ ขี่รถขึ้นดอย

หลวงพ่อปาน ดีใจ๋บ่หน้อย จะได้ขึ้นกอย บาทเจ้า

พอไปถึงแล้ว ออกรถซ้าวซ้าว เอาของนำตาน จ๊วยกั๋นขนของ

บางคนแบกเตียน บางคนยืนมอง บางคนถ้าเอา สังฆทาน

ส่วนตุ๊เจ้านั้น ต้องเดินติดต๋าม ตวยหลวงพ่อปาน ไหว้พระบาทเจ้า

เตียวขึ้นบันได เคารพนบเกล้า ฮอยพระบาทเจ้า สี่ฮอย

ประทับเอาไว้ หินผาบนดอย ออกมาเป๋นฮอย หันพระพุทธบาตา

หลวงพ่อปาน นำของขมา องค์ศาสดา ต่อพระพักตร์

เพื่อชำระจิต รูปนามแน่นัก ขันธ์แม่นมัก เป๋นมงคล

ก่อนเข้าพรรษา ตุ๊พระกู้ต๋น ขอบุญบันดล อุดหนุนจ๊วยก๊ำ

เป๋นบุญวาสนา นำปายิ่งล้ำ อวิชชาบังอำ เปิดกว้าง

ขออย่าเป๋นกั๋ม ตี้ได้ฮ่วมสร้าง หื้อได้เปิดตาง กุศล

ยอพุทธศาสนา สี่องค์เหมาะสม พุทธะอ่อนโอน ขอสูมากั๋ม

ก่อนเข้าไตรมาส บ่หื้อเป๋นกั๋ม หื้อปฏิบัติธรรม อย่าคลาด

หลวงพ่อปานนำสวด เทวาธิราช เสริมอำนาจ บารมี

จุดธูปเตียนปูจา เพิ่มพูนราศี ปูจาองค์มุนี พระศาสดา

หลวงพ่อนำศรัทธา สวดบทคาถา จุดธูปปู่จา ส่งตั๊ก

เริ่มจุดธูปเตียน พร้อมเพรียงเปล่งปั๊ก คนมีจ้าดนัก ศรัทธา

ของเฮาก่อพร้อม ของเปิ้นแน่นหนา พร้อมใจ๋กั๋นมา แวะเวียนกราบไหว้

สำเร็จเสร็จแล้ว ศรัทธาพร้อมใจ๋ เอาของตานไป ทำบุญ

จตุรมุข คนมาเนื่องหนุน แห่มาเอาบุญ พร้อมพลัก

บ้านเปิ้นก่หลาย บ้านเฮาก่นัก กั๋นจ่ายจั๊ก พร้อมกั๋นยอเก๋น

เข้าพรรษาแล้ว ธูปเตียนจ๋ำเป๋น ยกขึ้นประเกน ท่านเจ้า

หลวงพ่อเก๋นนำ ศรัทธาไหลเข้า ยอเก๋นท่านเจ้า ปั๋นปอน

ท่านฮับเก๋นแล้ว ท่านก่หื้อปอน หื้อมีโจ้กยามนอน ตึงยามตื่น

อย่ามีภัยฮ้าย เข้าก๋ายกื่น ขายของบ่ปุ๊ดตืน ก๋ำไฮ

หื้อโรคาพยาธิ์ บ่เบียดเบียนไผ มีโจ้กมีจัย กู่ผู้

ตึงเจ้าตึงนาย ใจ๋บานกู่ผู้ ได้ฮับปอนแล้ว ก่อกล่าวอำลา

หลวงพ่อนำหยาดน้ำ สวดแผ่เมตต๋า พร้อมกล่าววันตา ลาพระ

ได้ฮับปอนแล้ว ใจ๋ดีอ๊ะละ จื้นใจ๋มาละ ยินดี

ตานเตียนเรียบร้อย ศรัทธาฟั่งหนี ตี้แอ่วยังมี ชมวัดก่อนเต๊อะ

ฮ่วมกั๋นทำบุญ อุดหนุนป่าเลอะ มีคนมาเป้อะ ถุงเข้ามาถาม

หลวงพ่อท่านเจ้า ว่าถึงเวลายาม ฉันเพลเน่อเจ้า เติงตอน

หลวงพ่อจ๋าถาม ศรัทธาออนซอน มาพร้อมกั๋นก่อน ปิ๊กวัดปิ๊กบ้าน

ศรัทธาพร้อมแล้ว นักหนาปาป้าน พร้อมกั๋นปิ๊กบ้าน กิ๋นข้าว

จะลงดอยละ บ่แอ่วละเขา ฉันเพลตุ๊เจ้า บ่ตัน

เลยหมดความหวัง ปาแอ่วกั๋น กั๋วปิ๊กบ่ตัน เวลาตุ๊เจ้า

ใกล้ถึงละหนา เวลาใกล้เข้า ฟั่งเอาตุ๊เจ้า ปิ๊กวัด

แวะจอดข้างตาง คนมาทึกทัก ตี้มาจากวัด บนดอย

เปิ้นจอดผ่อหมู คนมาผ่อกอย เอาอาหารหื้อ มีหั้นจ้าดนัก

จะปิ๊กกั๋นละ หมูมาก่นัก ตั๋วหน้อยน่าฮัก กิ๋นข้าว

ใกล้เวลาแล้ว เติงตอนตุ๊เจ้า บ่ตันฉันข้าว มื้อเพล

ละจากตี่หั้น เพราะความจ๋ำเป๋น จะบ่ตันมื้อเพล ฉันของตุ๊เจ้า

รถเคลื่อนออกแล้ว นั่งอู้กั๋นเซ้า ตึงศรัทธาตุ๊เจ้า แก้ง่อม

ปิ๊กมาถึงบ้าน ศรัทธาหลั่งน้อม กล่าวลาหลวงพ่อ เมือบ้าน

รถจอดถึงวัด จัดภัตตาหาร ของคาวของหวาน ฉันกั๋นมื้อเพล

เตื้อนี่บ่แอ่ว เพราะความจ๋ำเป๋น บ่ตันมื้อเพล ว่าอั้น

ได้บุญกั๋นนัก สนุกสุขสันต์ กู้คืนยามวัน เปล่งป้อย

ศรัทธาฮ่วมกั๋น อุดหนุนบ่หน้อย เวลามีหน้อย บุญได้กั๋นนัก

ขอได้ติดต๋าม ขอย้างหยุดพัก ยั้งจอดวางลง ทัศนาธรรม

ควรแก่เวลา เตื้อหน้าเล่าแหม ก้อยผ่อแอมไป เตื้อหน้อย

บทสองยังมี ฟั่งลุกหนี ขอเวลาฉันข้าว ก่อนแลนายเฮย....

ส.วิสุทธสีลเมธี