คำวิดฟายหลังสู่ขวัญ สำนวนที่ 2
คำวิดฟาย
สาธุเด้อ น้ำนี้แม่นวิเศษอุทกัง
มีพลังเหลือหลาย ซิดไปถืกไผแล้ว
สิมีเงินคำแก้ว แนวมงคลล้ำค่า
มียศฐาลาภล้น บ่จนไฮ้แต่อย่างใด๋
ซิดไปเหนือซิดไปใต้ ฟ้งถืกไผกะตามซ่าง
ปัญญาสิใสสว่างแจ้ง เห็นฮู้ป่องธรรม
ไผผู้มีกรรมฮ้าย สิส่ำบายหายส่วง
เคยเจ็บหน่วงปวดร้าว คราวนี้กะสิหาย
น้ำวิดฟายแก้วนี้ พระมุนีจอมปราชญ์
ศาสดาเอกแก้ว ประทานแล้วจั่งซิดไป
ถืกคนไข้ เจ็บไอปวดป่วง
กะสิหายส่วงเนื้อ มีแฮงฟื้นส่วงเซา
ถืกแม่ย่ายายเฒ่า ผมขาวแข่วหล่อน
หนังหย่อน ๆ กะสิหลอนเข่งขึ้นสองเต้าเต่งตึง
ถืกพ่อปู่ตาเฒ่า ผมขาวเสียงฟ่าว
กะสิกลับต่าวมาเป็นบ่าวส่ำน้อย แข็งขึ้นกว่าหลัง
มีพลังคักกว่าซ้าง เตะปี๊บดังอยู่ท่วน ๆ
มวลหมู่สาวส่ำน้อย กะสันโอ้อ่าวนำ
ถืกคนดำคนแหล่ กะสิกลับขาวนวลเกลี้ยงมื่น
อายุยืนฮอดร้อย งามจ้อยส่ำมัทรี
ถืกคนดีกะสิดีไปหน้า มีวิชาหลายซอ
ถืกคุณแม่คุณพ่อ ถืกพ่อลุงแม่ป้า อาวอาพู้นกะแฮงดี
ถืกเด็กน้อยหมู่นี้ กะสิใหญ่เป็นบ่าวเป็นสาว
ถืกผู้สาว กะสิใหม่งามคือนางฟ้า
คือกันกับไอ่คำหล่า ขาวงามเกลี้ยงอ่องต่อง
ผู้ใด๋เห็นไผกะฮ้อง หลงย้องว่าผู้ดี
น้ำแก้วนี้ แม่นมีคุณวิเศษ
สามารถปัดเหตุฮ้อน ให้หายจ้อยเสื่อมสูญ
ไผมีบุญกะเลยถืก น้ำวิดฟายฟ้งใส่
มีศักดิ์ใหญ่เลิศล้ำ ก้าวหน้ามหาศาล
ฟ้งไปถืกคนหัวล้าน ผมสิยาวป่งขึ้นใหม่
สาวแม่ฮ้างแม่หม้าย เห็นแล้วสิแล่นเฟีย
แต่ระวังเมียเอาไว้ เขาเห็นเขาสิว่า
ศีลข้อกามากาเมให้หลีกเว้น แนวนั้นแม่นบ่งาม
ถืกครู คศ. 3 กะให้ได้คศ. 4 คศ. 5อย่าสู่รอ
ถืกผอ. กะให้ได้สายสะพายโก้ ๆ ไปหน้าอย่าถอย
ฟ้งไปถืกพ่อผู้ช่อย กะให้เป็นพ่อผู้ใหญ่
ฟ้งไปถืกพ่อผู้ใหญ่ กะให้เป็นพ่อกำนัน
ฟ้งไปถืกนายพัน กะให้เป็นนายพล
ฟ้งไปถืกนายอำเภอ กะให้เป็นผู้ว่า
ฟ้งไปถืกพ่อค้า กะให้มีกำไร
ฟ้งไปถืกผู้ใด๋ ๆ กะให้ฮุ่งเฮืองเหลืองเหลื่อมเด้ออีพ่อ
ฟ้งไปถืก ส.ส. กะให้เป็นรัฐมนตรี
ฟ้งไปถืกรัฐมนตรี กะให้เป็นนายก
อย่ามีตกต่ำต้อย คอยคุ้มหมู่ประชา
ให้สุขสันต์ทั่วหน้า เด้อซุมเฮาน้องพี่
ขอวิดฟายส่ำนี้ ยาท่านจงเจริญเด้อ
ไชยตุภวังค์ ไชยมังคลัง ก็ข้าเทอญ สาธุ สาธุ สาธุ.
พ่อพราหมณ์สว่าง ไชยสงค์ ..... ประพันธ์
ความเห็น (1)
Thank you.
I know what I miss -- actually hearing these words - live!
But one day I will ;-)