เลือกตั้งทั่วไป
ฟังเนอรา อาวอาพี่น้อง ข้านี้ขัดข้อง ยังพ้องสังก๋า
เลือกตั้งคราวนี้ มันมีปัญหา เบื้องหลังนั้นกา ฮับดาบ่ได้
คนในฮู้กั๋น นอกนั้นเป๋นใบ้ สับสนกลใน เจ้นล้ำ
อันสื่อทังมวล ก็ล้วนตอกย้ำ ไปเหียจุ้ก้ำ จุ้ปาย
ว่าทหารนั้น เพิ่นมั่นใจ๋หมาย จะจัดรัฐไทย ต๋ามใจ๋ว่าอั้น
ตั๋วข้านี้นา สังก๋าเต๋มกั้น เหตุใดเนืองนัน จ้ะนี้
ทหารทังหลาย ก็ได้มาชี้ ว่าเป๋นจ้ะอี้ ได้ใด
เขาอยู่ในฮั้ว บ่มั่วกับใผ แล้วเหตุอันใด เถิงได้กล่าวอ้าง
เขาเล่ามาแถม มาแซมป้างข้าง ว่าทหารบาง เหล่านั้น
กลั๋วกั๋มกลั๋วเวร เป๋นมาหลายจั๊น หากเปลี่ยนรัฐอั้น จักมา
กลั๋วเขาแก้แค้น ถมแน่นถมหนา หากนายใหญ่มา จักปากั๋นดั้น
จักแม่นก่อหา ข้านี้อัดอั้น บ่อยากหื้อมัน เกิดครับ
เถิงวันที่สาม กรกฎนับ คะแนนออกได้ จาใด
ถัดจากวันนั้น ตั๋วมันตั๋วใผ จักเป๋นอย่างใด จักได้ฮู้เสี้ยง
หนุ่มหล่อหน้าใส สาวใบหน้าเกลี้ยง สวรรค์หรือเอียง นรก
จักบินถลา เป๋นก๋าเป๋นนก หรือตกฮะข้าง เวที
อันตั๋วม่อนนั้น ยังมั่นศักดิ์ศรี หนึ่งเสียงที่มี บัตรดีนับได้
สามโมงนี้หนอ ใผนอจักไห้ ใผจักSmile หัวเราะ
หันคนล้มหงาย อย่าได้ยิ้มเยาะ เพราะเขาอาจได้ ฟื้นคืน
เมื่อเถิงวันนั้น มันอาจจักฝืน อาจจักกล้ำกลืน มันกลื๋นบ่เข้า
คายบ่ออก เนอนายน้องเหน้า ขอเฮาบันยัง บันยะ
ขอพระเลางาม สยามเทวะ อธิราชเจ้า คุ้มครอง
ราชันเจ้าไท้ แลไทยทังผอง สุขสมใจ๋ปอง ทังผองทั่วหน้า
ขอหื้อเทศไทย แจ่มใสเจิดจ้า เทียบเทศนานา ล้ำยุค
ประชาชนไทย หน้าใสพ้นทุกข์ เป๋นสุขทั่วถ้วน นครา
ยอวันทา ข้านี้ขอไหว้ เทพไท้สยามินทร์ ปิ่นฟ้ารัฏฐา.
ความเห็น (10)
สวัสดีค่ะ ผอ.
*** ได้อ่านบันทึกที่พรุ่งนี้ก็เป็นประวัติศาสตร์แล้ว
*** ระลึกถึงผอ.เสมอ...ขอให้มีความสุขและสุขภาพแข็งแรงนะคะ
@@@เลือกตั้งวันนี่เปิงใจ๋แต้ว่า
ปี้ป้าน้าอามากั๋นพร้อมพรัก
ตี้ปากั๋นมาก่เพราะว่าฮัก
เลือกพรรคตี้ซอบแถมคนตี้ใจ้....เจ้า@@@
สวัสดีครับ ผอ.ทนัน ผมลูกป่อศรี แม่มา.. อยู่บ้านทาห้วยยาบครับ (บ้านเดียวกับท่านณัฐวุฒิครับ) เผอิญว่าวันนี้ได้มีโอกาสอ่านเจอกำเค่าตี้ ผอ.แต่ง เลยนึกอยากหัดแต่งพ่อง.. บ่าฮู้ว่าถูกอักขระก่อครับ จะใดก่อจ่วยแนะนำโตยเน้อครับ...
ยอยกสิบนิ้ว ต่างติ้วเกศา ยกมือวันทา คาระวา ผอ.เจ้า
ฟังถ้อยกำเค่า เปิงใจ๋แต้เล้า ฟู่อู้เล่าเรื่อง ก๋ารเมือง
บ่ได้ขุ่นเคือง พรรคใดเนอเจ้า หวังเอาคนดี น่าฮัก
มาจ่วยจูจัก เมืองไทยเฮาหนา ฮื้อเต่าเตียมตัน โลกาใหญ่กว้าง
มาจ่วยก้ำจู เชิดชูเสริมสร้าง ประชาธิปไตย ไทยเฮานี้
จ่วยเสริมศักดิ์ศรี สมกำบ่งจี้ ว่าไทยเฮานี้ มีดี
หลังวันตี่สี่ กรกฎนี้ จักได้นายกเป๋น แม่ญิง
จื่อท่านไท้ ยิ่งลักษณ์ค๋นจริ๋ง นามสกุลท่านมี ชินวัตรเจ้า
เป็นคนบ้านเฮา เจียงใหม่น้องเน้า เปิ่นอู้กำเมือง ก่ชัด
หวังเปิ่นจักเป่า และจ่วยก๋ำจัด สิ่งชั่วนานา ป่าเลอะ
ฮื้อคนไทยหาย จากโรคเลอะเทอะ แยกสีแบ่งเสื้อ เนอนาย
ลดละทิษฐิ สามัคคีก๋ายใจ ปรองดองคนไทย อีสานเหนือใต้....ๆ
สวัสดีครับ คำนับไหว้สาธุ์ พี่กิติยา มาจ๋ามาอู้
เพิ่นมาอวยพร ม่อนนั้นชอบสู้ ขอหื้อบุญชู เน่อครับ
ขอหื้อจำเริญ มีเงินมีทรัพย์ นับจ๋นบ่ถ้วน เน่อมี
สุขะพละ วรรณะเปล่งศรี โภคะมากมี ทีฆายุมั่น.
กราบสวัสดีวันพระเจ้าพ่อครูทนัน
ทักทายวันพระใหญ่ ฝนยังคงพรำพราย
ทางโน้นก็คงเช่นกันกระมังเจ้า
เมื่ออาทิตย์ก่อนละอ่อนไปเมืองแหง โชคดีหน่อย
ฟ้าเป็นใจ ไม่งั้นเข้าหมู่บ้านไม่ได้แน่เลยเจ้า
ไปลงพื้นที่ชาวเขาเผ่าอาข่า ห้วยหญ้าไทร ห้วยลึก
เลยบ่มีโอกาสแว้บไปตี้อื่นเน้อเจ้า
ช่วงนี้อากาศเปี๋ยนไป๋ หื้อพ่อครูฮักษาสุขภาพตวยเจ้า
ยินดีจั้ดนัก มาทักมาจ๋า คุณPooกันยา ไปลามาไหว้
เพิ่นว่าได้ไป เชียงใหม่บ้านอ้าย ไปบ้านหญ้าไทร ห้วยลึก
บ่ได้แว่ไหน ดั่งที่ใจ๋นึก เพราะเวลาหั้น บ่มี
ขอบคุณเน่อครับ สำหรับวจี๋ ว่าหื้อพ่อมี สุขภาพดีว่าอั้น.
มาแว่แอ่ว....
เมินมานักแน่แล้ว เนอเฮา
ก๋าลผ่านเนิ่นเนอเนา ว่างเว้น
บ่ได้ฟู่กับเขา หลายเรื่อง นานเอ่
มาอ่านเรื่องหลากเหล้น ม่วนไซร้ท่านทนัน
เฮาเลือกตั้งผ่านแล้ว ดีงาม
พรรคเพื่อไทยนงราม เก่งได้
ยิ่งลักษณ์ชื่อสมนาม ผู้ผ่านชนเอ่
งามยิ่งงามเหนือใต้ แม่นแท้คนเมือง(ล้านนา )
มาแว่แอ่วเน้อ......พรหมมา
สิบนิ้ววันตา อาจ๋ารย์ป้อนั้น ผอ.ทนัน ภิวงศ์งาม
ตี่ได้ถ่ายถาม ผ่อยามข้าหน้อย เยี๊ยะก๋ารอยู่ใด แน่จั๊ด
ตั๋วหลานนี่นา เป๋นตะห๋านแต้ตั๊ด อยู่เวียงฝางถัด แม่อาย
ป้องกั๋นเขตไทย ฝั่งเมียนม่าร์ไว้ เป๋นขวบปี๋ใด้ เมินหลายแล้วครับ.