เสียวสวาด สอนสั่งไว้ ในฮูบนิทานธรรม
มีพระยาเมือง หนุ่มฉกรรจ์เป็นเจ้า
สำราญลั่ว เกมพนันเซ้าค่ำ
เสนา หลายท่านท้าว ซวนสู้หมากสกา
วันหนึ่ง ปุณกะยักษ์ผ้าย มณีกาบบินมา
ในมือเยิง หน่วยมณีโชแก้ว
ซวนซิงท้า เกมสกาลองเดช
พนันเสี่ยงสู้ ลองเล่นฮ่วมพระยา
หากว่า ยักษ์พ่ายแพ้ เสียหน่วยมณีใส
ฮวมทั้ง อาชาไน ล่องบินบนได้
หากว่า พระยาเสียให้ เอานครเป็นค่า
เมืองใหญ่กว้าง วางให้ยักษ์ครอง
สองก็ วางเหลี่ยมเล่ห์ อุบายลุกหลบถอย
เดินเกมสกา ยักษ์กินสามครั้ง
พระยาเสียแต้ม การพนันด้อยท่า
ออกปาก ขอเปลี่ยนข้อ บ่ยอมให้ค่าพนัน
เจ้าผู้ ครองไพร่ฟ้า สัจจะเปลี่ยนแปลงแถลง ควรลือ
ลงเดิมพัน จงตามความเว้า
เจ้าต้อง วางเมืองให้ เฮาครองเร็วรีบ
คันบ่ได้ เมืองเจ้าสิวอดวาย
พระยา ยอมยกให้ ยักษ์นั่งครองเมือง
ตามตกลง ที่เคยพนันไว้
แต่ยักษ์ วางคืนให้ พระยาครองเมืองต่อ
ขอเปลี่ยน เอาท่านท้าว บัณฑิตเจ้า ซื่อวิฑูรย์
วิฑูรย์ ถามไถ่ส้อ การขอเปลี่ยน คำพนัน
ปุณกะ หวังเจาะ เอาหน่วยใจไปหมั้น
สินสอด ขอนางน้อย ธิดาพระยานาค
คาดค่า แปลกประหลาดล้ำ ขันหมั้น แม่นหน่วยใจ
ยักษ์เอย พระยานาคแกล้ง ลองหยั่งศีลธรรม
ฆ่าคน เอาหัวใจ บาปเวรควรเว้น
จงเอา ตนตัวข้อย ไปถวายพระยานาค
ปากคน มีเพื่อเว้า เฮาควรค้นก่อนเฮ็ดนำ ยักษ์เฮย
(15 ธันวา 2010)
