ยอมือสา ปิต๋าองค์ไท้ ข้าขอเทิดไหว้ ปิ่นไว้กับต๋น

ห้าธันวาครบ ผะจบแถมหน จาวไทยจุ้คน กมลหลิ่งหลู้
ธ-คือหัวใจ๋ คนไทยจุ๊ผู้ พร้อมกั๋นเชิดชู องค์พระ

เทิดเป๋นปิต๋า สยามคณะ คู่พระแม่เจ้า ราชินี

ขอหื้อองค์พระ ธ-ไท้สุขขี เขษมเปรมปรีด์ ฑีฆาเตี้ยงหมั้น
ปกป้องคุ้มครอง ผองไทยจุ้บั้น สามัคคีปัน เต๋จ๊ะ

ในวาระก๋าล วันผะสูติพระ คือ”วันพ่อ”อั้น ครบวน
ขอกราบบาทะ ปิต๋าแห่งต๋น มาต๋าแถมคน กมลน้อมไหว้
ขอหื้อสองรา ภัยยาอย่าใกล้ มีตุ๊กข์อันใด เปล่งยั๊วะ

สุขในหัวใจ๋ สบายก๋ายะ เป๋นตี้เปิ้งป้ะ ยาวนาน
อันตั๋วข้านี้ ขอจี๊ไขขาน จักเตวโตยงาน สืบสานพ่อเจ้า
เว้นมาหลายปี๋ ปูรีพ้ายเหล้า อบายนั้นเอา ขว้างละ

ตั้งหน้ากระตำ ก๊ำศาสนะ สืบวัฒนะ ธรรมไทย
ค้นหาฮีตเก๊า แบบเบ้าเก่าไกล๋ ฮีตฮอยดีใด มาไขสืบสร้าง
ขอหื้อขะหยม ได้สมใฝ่อ้าง ต๋ามตี้ใจ๋วาง ไว้เต๊อะ

ละอ่อนสมัย จักได้บ่เลอะ เป๊อะเปิ้งเขาได้ ใหม่งาม
ท้องที่ทั่วท้วน ทั่วถ้วนสยาม ฐานถิ่นไทยงาม ต๋ามตี้ก่อกู้
ขอหื้อคนไทย ตังหลายจุ้ผู้ สุขไหลมาจู ฟูทรัพย์

 ม่อนหมดกำจ๋า ขอลาก่อนครับ วันหน้าจักกลับ มาไจ
สุดสายใย ไว้เปียงเต้าอี้ เต้านี้ขอวางลง ก่อนแลนายเหยฯ