ลำพื้น พระคุณแม่ (วันแม่ ๒๕๖๗)
(ลำพื้น/ยาว)
บัดนี้ เฮียมจักยอมือน้อม พุทโธองค์เอก
นบนอบนิ้ว วางไว้หว่างเศียร
ขาบพระไตรรัตน์ตุ้ม ยามกล่าวกลอนสาร
ขอให้ไหลล่วงเลียน หลั่งมาคำต้าน..
แนวใด๋ขีนไขให้ ไหวดีลำเลี่ยน
คำคล่องคล้อย ลอยล้อมกล่อมสะออน
บัดนี้ ปีเดือนย้อน สิงหาวันแม่
เทิดพระคุณผู้แพ้ อุทรอุ้มห่อครรภ์
คีงแม่ก้ม ยืนย่างแพงเพียร
ถือพาห์หูตาลาย พ่องวินเวียนเกล้า
หมุนมวนท้อง อาเจียรใจสั่น
คะนิงนำลูกน้อย ในท้องกระทบแฮง
เนากว่าเก้า- เดือนทุกข์ทรมาน
แม่ผู้ เจียมใจฝัน พร่ำคองคอยอุ้ม
ใผตามถ้อน ในอุทรแม่ฮัก
ลูกปานทองเทพไท้ สรวงฟ้าป่อนประทาน
นับแต่ คลานจากท้อง ผองใหญ่เจริญวัย
แม่กัดกินเกลือทน ท่าวถนอมทอมเลี้ยง
หนาวหือฮ้อน แสนอาทรเป็นห่วง
แพงปานตาหน่วยแจ้ง หัวไห้พร่ำกัน
คนโลกล้วน ยอแม่พระคุณสูง
สุดยอดในซีวี ห่อนหาใดเทียมได้...
(เดินกลอน)
เอาเดอ นี้ละในแผ่นฟ้า มาโฮมกันก่อ
บ่อาจ ปุนเปรียบได้ พรหมแท้แม่เฮา
ลำบากแท้ ทนทาวแนวหน่อ
ขอให้เพียงลูกน้อย กินได้อิ่มหนำ
ลางแม่ฮ้าง หม้ายพ่อไลลา
เป็นแม่เดี่ยวเทียวหา สิ่งมาปรุงป้อน
(เพลงสลับ)
หลับนอนบ่ห่อนนอนอิ่ม
ยามหิวซิมข้าวเปื้อนน้ำตา
ย้านแต่ลูกบ่อิ่มถามหา
ฮักดังดวงตาหนาลูกหญิงชาย
ยามเถิงวัยเรียนเขียนอ่าน
แม่พลีแรงงานบ่เคยซำบาย
ขอแต่ลูกเล่าเรียนสมหมาย
ลูกหญิงลูกชาย แม่สู้ไม่ถอย
(เดินกลอน หรือลำพื้น/ยาว)
มือเป็นด้อย ทำงานบายเด่
หาเงินคำซอกซื้อ โส้งเสื้อลูกคำ
ยามวัยเจ้า เข้าสู่โรงเรียน
เถิงแม่ทนทานทุกข์ สิอดทนส่งได้
กว่าสิพ้น เป็นคนผู้หนึ่ง
แม่รอดตายรอดล้ม หลายครั้งสิบ่ยัง
ไปทางหน้า อย่าลืมความฮักแม่
อรหันต์แห่งบ้าน เลอล้ำกว่าใผ
ขอเทิดไว้ ยอท่านพระคุณสูง
หาใดเทียมแทนทด แม่เฮาบ่มีได้…
ชาตรี เสงี่ยมวงศ์
๑๗ ก.ค. ๒๕๖๗
ใน "สาส์นลึบให้สูญ" นิตยสาร ทางอีศาน ฉบับ ๑๔๘, เดือนสิงหาคม ๒๕๖๗.
ลำพื้น พระคุณแม่ บทกวีอีสานล้านช้าง เนื่องในวันแม่ l12 สิงหาคม 2567
นิตยสาร ทางอีศาน ฉบับที่ 148 เดือนสิงหาคม 2567
