ວັນທີ 14 ກຸມພາ ກຳລັງຈະມາເຖິງ
ໂດຍ: ດັ້ນກີບເມກ
ວັນທີ 14 ກຸມພາ ກຳລັງຈະມາເຖິງ ເຊິ່ງຫຼາຍຄົນໃນສັງຄົມຮັບຮູ້ດີຢູ່ວ່າ ມັນກ່ຽວຂ້ອງກັບຄວາມຮັກ ແລະ ຄູ່ຮັກ ເຊິ່ງບາງຄູ່ກໍ່ຕັດສິນໃຈແຕ່ງດອງກັນວັນນີ້ ແລະ ໂດຍຄວາມຈິງຄົນໃດກໍ່ຕາມທີ່ມີຄວາມຮັກ ກໍ່ບໍ່ໝາຍຄວາມວ່າ ຈະມາສະແດງຄວາມຮັກໃຫ້ຄູ່ຮັກໄດ້ຮູ້ເຫັນໃນວັນດຽວນີ້ດອກ ແລະ ການສະແດງອອກເຊິ່ງຄວາມຮັກກໍ່ມີຫຼາຍທາງ ເຊັ່ນ: ດ້ວຍການບອກຮັກ ແລະ ຜ່ານພຶດຕິກຳຂອງຄູ່ຮັກຝ່າຍກົງກັນຂ້າມທີ່ຫ່ວງໃຍ ແລະ ເອົາໃຈໃສ່ມີການຊ່ວຍເຫຼືອວຽກງານ ທັງໃນຍາມປົກກະຕິ ແລະ ຍາມຈຳເປັນ.
ການກວດສຸຂະພາບກ່ອນແຕ່ງດອງ ກໍ່ຈຶ່ງມີຄວາມສຳຄັນ ຍິ່ງຕໍ່ຄູ່ຮັກທີ່ຈະຕັດສິນໃຈຢູ່ຮ່ວມກັນໄປຕະຫຼອດຊີວິດ ເຊິ່ງບາງຄູ່ຖ້າບໍ່ກວດສຸຂະພາບກ່ອນ ເມື່ອແຕ່ງດອງກັນໄປແລ້ວຈຶ່ງຮູ້ທີຫຼັງມັນກໍ່ສວຍເກີນແກ້ໄຂແລ້ວ ເຊັ່ນ: ຖ້າຄູ່ຮັກທັງຝ່າຍຊາຍ ແລະ ຝ່າຍຍິງບໍ່ກວດເບິ່ງສຸຂະພາບ ກໍ່ບໍ່ຮູ້ວ່າຜູ້ກ່ຽວມີພະຍາດຫຍັງແນ່ ເຊິ່ງຈະເປັນອັນຕະລາຍຕໍ່ຝ່າຍກົງກັນຂ້າມ ຄືບາງຄົນກໍ່ມີເຊື້ອພະຍາດໜອງໃນ ພະຍາດຕັບອັກເສບ ຫຼື ຕິດເຊື້ອພະຍາດ HIV ມັນເປັນອັນຕະລາຍເຖິງຊີວິດຂອງຄູ່ແຕ່ງດອງ (ຄູ່ຮັກ).
ໃນກໍລະນີກວດພະຍາດກ່ອນຈະຕັດສິນໃຈເອົາລູກຂອງຄູ່ຜົວເມຍ ແພດກໍ່ຈະກວດເບິ່ງວ່າແຕ່ລະຝ່າຍມີພະຍາດຫຍັງແດ່ທີ່ເປັນອັນຕະລາຍ ສົ່ງຜົນກະທົບຕໍ່ລູກທີ່ຈະເກີດມາໃນອະນາຄົດ ເພາະວ່າພະຍາດບາງຊະນິດອາດສົ່ງຜົນໃຫ້ລູກເກີດມານັ້ນ ຫູໜວກ ແລະ ຕາບອດໄດ້ ເຊິ່ງວີທີການວິນິດໄສພະຍາດສາມາດກວດໄດ້ຈາກການກວດເລືອດ ແລະ ກວດພາຍໃນ ເຊິ່ງບໍ່ຈຳເປັນຕ້ອງອົດອາຫານ ຖ້າຫາກວ່າແພດກວດພົບພະຍາດກໍ່ຈະຫາວິທີປິ່ນປົວ ຫຼື ສ້າງພູມຄຸ້ມກັນເຊື້ອພະຍາດທີ່ຈະຖ່າຍທອດໄປສູ່ລູກ ເຊັ່ນ: ສັກຢາປ້ອງກັນພະຍາດ ຕົວຢ່າງ ໄວລັດຕັບອັກເສບ ເອ ແລະ ບີ.
ເມື່ອຮູ້ແນວນີ້ແລ້ວ ຄູ່ຮັກທີ່ກຽມຈະແຕ່ງດອງ ຫຼື ກຳລັງວາງແຜນຢູ່ ກໍ່ບໍ່ຄວນວາງເສີຍທີ່ຈະກວດສຸຂະພາບ ເພື່ອຄວາມປອດໄພໃນສຸຂະພາບທັງຄູ່ຄອງ ແລະ ລູກທີ່ຈະເກີດຕາມມາພາຍຫຼັງ ໝາຍຄວາມວ່າ ການວາງແຜນກ່ອນສ້າງຄອບຄົວນັ້ນ ແມ່ນບອກເຖິງຄວາມພ້ອມຂອງຄູ່ຄອງທີ່ຄິດຈະຢູ່ຮ່ວມກັນ ເປັນຕົ້ນວ່າ ແຜນເງິນ ແຜນງານ ແລະ ແຜນໃນການທີ່ຈະມີລູກ ວ່າເວລາໃດເໝາະສົມ ເຊິ່ງໃນກໍລະນີນີ້ ຖ້າວາງແຜນດີກໍ່ເຮັດໃຫ້ຄູ່ຜົວເມຍມີຄວາມສຸກໄດ້ ດັ່ງນັ້ນ ການກວດໝວດເລືອດ HIV ພະຍາດເລືອດຈາງ ແລະ ພະຍາດຕິດຕໍ່ທາງເພດສຳພັນ ຈຶ່ງເປັນສິ່ງທີ່ຄູ່ຄອງຕ້ອງການ ຄວາມສຳເລັດໃນຊີວິດຄູ່ບໍ່ຄວນເບິ່ງຂ້າມ.
ສະຫຼຸບໄດ້ວ່າ ການກວດສຸຂະພາບເປັນສິ່ງຈຳເປັນ ເຊັ່ນ: ຄົນຕິດ HIV ສາມາດມີຄູ່ໄດ້ ແຕ່ຕ້ອງຮູ້ຈັກປ້ອງກັນ ຝ່າຍຄູ່ກົງກັນຂ້າມຕ້ອງສັກຢາປ້ອງກັນດັ່ງທີ່ທາງ ດຣ.ພຸດທະສອນ ພອນປະເສີດ ວິຊາການຢູ່ພະແນກຊຶມເຊື້ອ ໂຮງໝໍ 150ຕຽງ ໄດ້ເນັ້ນໃຫ້ເຫັນຄວາມສຳຄັນຂອງການກວດສຸຂະພາບກ່ອນການແຕ່ງດອງ ແລະ ວາງແຜນຄອບຄົວ ເພື່ອວ່າຊີວິດຄູ່ຈະມີຄວາມສຸກ ທັງພໍ່ແມ່ ແລະ ລູກທີ່ຈະເກີດມາເປັນພະຍານຮັກ ແລະ ມີອະນາຄົດອັນສົດໃສໃນສັງຄົມ ສ່ວນວັນທີ 14 ກຸມພາ ນັ້ນ ແມ່ນຮູບການຟື້ນຟູສິດທິມະນຸດທີ່ຖືກເຊື່ອມໂຊມໃນຍຸກກ່ອນຢູ່ຕ່າງປະເທດເພິ່ນ ສ່ວນປະເພນີບ້ານເຮົາບັນພະບູລຸດພໍ່ແມ່ຂອງພວກເຮົາເພິ່ນເຄີຍສັ່ງສອນໃຫ້ມີຄວາມຮັກຢ່າງຮອບດ້ານມາດົນນານແລ້ວ ເພາະຄົນລາວເຮົາແມ່ນຊາດທີ່ມີອະລິຍະທຳ ທີ່ຊາວໂລກຍົກຍ້ອງມາແຕ່ດຶກດຳບັນ ຊາວໜຸ່ມໄວໜຸ່ມຢ່າໄປຕົກເລ່ກົນຂອງວັນດັ່ງກ່າວ ເພາະຜິດຮີດຄອງປະເພນີ ແລະ ວັດທະນະທຳອັນດີງາມຂອງຊາດເຮົາ.
ความเห็น (0)
ไม่มีความเห็น