ການຈັດຕັ້ງປະຕິບັດວຽກງານແມ່-ເດັກ ໃນສົກປີ 2012-2013 ຜ່ານມາ
ການຈັດຕັ້ງປະຕິບັດວຽກງານແມ່-ເດັກ ໃນສົກປີ 2012-2013 ຜ່ານມາ ເຖິງແມ່ນວ່າການບໍລິການ ກິດຈະການດ້ານສຸຂະພາບໄປເຖິງທ້ອງຖິ່ນຕ່າງໆແລ້ວກໍ່ຕາມ ແຕ່ມາເບິ່ງອັດຕາການຝາກທ້ອງຂອງແມ່ຍິງທີ່ຖືພາ ເຫັນໄດ້ວ່າຍັງມີຈຳນວນປະມານເຄິ່ງແສນຄົນ ທີ່ບໍ່ໄດ້ເຂົ້າຝາກທ້ອງຈັກຄັ້ງ ແລະ ແມ່ຍິງຖືພາທີ່ເຂົ້າຝາກທ້ອງ 1 ຄັ້ງ ຍັງບໍ່ສືບຕໍ່ຝາກໃຫ້ຄົບ 4 ຄັ້ງ.
ການຈັດຕັ້ງປະຕິບັດວຽກງານຮັກສາສຸຂະພາບແມ່-ເດັກ ໃນສົກປີ 2012-2013 ຜ່ານມາ ເຫັນໄດ້ວ່າຂະແໜງການສາທາລະນະສຸກ ແຕ່ສູນກາງລົງໄປເຖິງທ້ອງຖິ່ນ ໄດ້ເອົາໃຈໃສ່ປັບປຸງ ແລະ ຂະຫຍາຍຕາໜ່າງບໍລິການສຸຂະພາບແມ່-ເດັກໃຫ້ກວ້າງຂວາງ ແລະ ການບໍລິການກໍ່ມີຫຼາຍປະເພດ ມີນະໂຍບາຍວ່າດ້ວຍການອຸດໜູນການເກີດລູກ ການປິ່ນປົວເດັກອາຍຸລຸ່ມ 5 ປີ ຢູ່ບໍ່ເສຍຄ່າ ແລະ ກິດຈະກຳອື່ນໆ.
ທ່ານ ສຈ.ດຣ. ເອກສະຫວ່າງ ວົງວິຈິດ ລັດຖະມົນຕີວ່າການ ກະຊວງສາທາລະນະສຸກ ກ່າວວ່າ: ຄຽງຄູ່ກັບໝາກຜົນທີ່ຍາດມາໄດ້ ໃນການຈັດຕັ້ງປະຕິບັດວຽກງານສຸຂະພາບແມ່-ເດັກ ນັ້ນ ພວກເຮົາຍັງມີຫຼາຍບັນຫາ ແລະ ຂໍ້ຫຍຸ້ງຍາກທີ່ຕ້ອງໄດ້ເອົາໃຈໃສ່ແກ້ໄຂໃນຕໍ່ໜ້າ ເປັນຕົ້ນແມ່ນ ການໃຫ້ບໍລິການແມ່ຍິງ ແລະ ເດັກນ້ອຍ ຊຶ່ງເຫັນໄດ້ວ່າຍັງມີແມ່ຍິງຖືພາປະມານ 50.000 ຄົນ ຍັງບໍ່ທັນໄດ້ຝາກທ້ອງຈັກຄັ້ງ ແລະ ໃນຈຳນວນແມ່ຍິງຝາກທ້ອງ 1 ຄັ້ງ ກໍ່ຍັງບໍ່ທັນໄດ້ສືບຕໍ່ຝາກໃຫ້ຄົບ 4 ຄັ້ງ ໃນສະຖານທີ່ບໍລິການຍັງບໍ່ທັນບັນລຸຕາມຄາດໝາຍ ຊຶ່ງປະຕິບັດໄດ້ພຽງແຕ່ 46% ຂອງແມ່ຍິງຖືພາທັງໝົດ ການສັກຢາກັນພະຍາດເຖິງຈະບັນລຸ 87% ສຳລັບຄໍຕີບ ໄອໄກ່ ບາດທະຍັກ (DTP-HepB-Hip3) ແຕ່ຍັງສັງເກດເຫັນໄດ້ວ່າ ອັດຕາການປົກຄຸມການສັກຢາກັນພະຍາດແຕ່ລະແຂວງ ແມ່ນຍັງມີຄວາມແຕກໂຕນກັນ ບາງແຂວງປະຕິບັດໄດ້ດີ ແລະ ບາງແຂວງປະຕິບັດບໍ່ໄດ້ດີ ແລະ ແຂວງທີ່ປະຕິບັດໄດ້ດີ ກໍ່ຍັງມີບາງເມືອງພາຍໃນແຂວງທີ່ບໍ່ສາມາດປະຕິບັດໄດ້ ຊຶ່ງໃນປີ 2013 ມີ 79 ເມືອງ ທີ່ບໍ່ສາມາດສັກຢາກັນພະຍາດໝາກແດງ ບັນລຸ 85% ມີແມ່ຍິງຖືພາເສຍຊີວິດ ຈຳນວນ 122 ຄົນ ການເສຍຊີວິດແມ່ນເກີດຂຶ້ນໃນເວລາເກີດລູກ ແລະ ຫຼັງການເກີດລູກເປັນສ່ວນໃຫຍ່ ສ່ວນການເສຍຊີວິດຂອງເດັກລຸ່ມ 5 ປີນັ້ນ ຕາມການລາຍງານໃນຈຳນວນ 8 ແຂວງ ມີຈຳນວນ 786 ຄົນ.
ດັ່ງນັ້ນ ກອງປະຊຸມຄັ້ງນີ້ ແມ່ນຈະໄດ້ປຶກສາຫາລືຄົ້ນຄວ້າ ວິທີທາງໃນການແກ້ໄຂບັນຫາ ໃນແຕ່ລະແຂວງເມືອງຕ່າງໆ ຊຶ່ງກອງປະຊຸມດັ່ງກ່າວໄດ້ຈັດຂຶ້ນ ໃນວັນທີ 20-21 ກຸມພາ 2014 ທີ່ສູນ ICTC ຫຼັກ 5 ໂດຍມີບັນດາລັດຖະມົນຕີຊ່ວຍວ່າການ ຕາງໜ້າອົງການຈັດຕັ້ງ ແລະ ພາສ່ວນກ່ຽວຂ້ອງເຂົ້າຮ່ວມ.
ความเห็น (0)
ไม่มีความเห็น