ກອງປະຊຸມຄະນະປະຈຳສະພາແຫ່ງຊາດ ປະຈຳເດືອນກຸມພາ 2014 ໄດ້ຈັດຂຶ້ນວັນທີ 20 ກຸມພານີ້ ທີ່ສະພາແຫ່ງຊາດ ໂດຍເປັນປະທານຂອງທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ຊຶ່ງມີບັນດາຄະນະປະຈຳພັກ ແລະ ຫົວໜ້າກຳມາທິການເຂົ້າຮ່ວມ.
ກອງປະຊຸມຄັ້ງນີ້ ໄດ້ພ້ອມກັນຄົ້ນຄວ້າ ແລະ ປຶກສາຫາລືຫຼາຍບັນຫາສຳຄັນຂອງຊາດ ເປັນຕົ້ນ ຮັບຟັງລາຍງານແຜນການຈັດຕັ້ງກອງປະຊຸມ ຄະນະກຳມະການຄົ້ນຄວ້າຫາຄວາມຈິງຂອງສະມັດຊາລະຫວ່າງຊາດອາຊຽນ ເພື່ອຕ້ານກັບໄພຄຸກຄາມຂອງຢາເສບຕິດ (ໄອໂຟຄອມ ຄັ້ງທີ 11) ທີ່ສະພາແຫ່ງຊາດລາວເປັນເຈົ້າພາບ ລາຍງານຜົນການທາບທາມລະດົມຄວາມຄິດເຫັນ ຈາກບັນດາການນຳກຳມາທິການຕ່າງໆ ກະຊວງ ແລະ ອົງການທີ່ກ່ຽວຂ້ອງໃນການກຳນົດຫົວຂໍ້ ມະຕິກອງປະຊຸມໄອໂຟຄອມ ຄັ້ງທີ 11 ແລະ ກອງປະຊຸມໄອປາ ຄັ້ງທີ 35 ທີ່ ສປປ ລາວ ລາຍງານຜົນສຳເລັດການຮຽບຮຽງກົດໝາຍ ຈຳນວນ 14 ສະບັບ ທີ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ 7 ຮັບຮອງເອົາລາຍງານຜົນການເຂົ້າຮ່ວມກອງປະຊຸມ ທົບທວນກວດກາແຜນການສ້າງ ແລະ ປັບປຸງກົດໝາຍສຳລັບສົກປີ 2014-2015 ຈັດໂດຍກະຊວງຍຸຕິທຳ ລາຍງານຄືນການພິຈາລະນາໂຄງປະກອບການຈັດຕັ້ງຂັ້ນກົມ ແລະ ພະແນກຂອງກຳມາທິການ ປກຊ-ປກສ ພິຈາລະນາຈັດສັນງົບປະມານ ສຳລັບໂຄງການອອກແບບ ແລະ ປຸກສ້າງຫໍສະພາແຫ່ງຊາດຫຼັງໃໝ່ ສຳລັບສົກປີ 2013-2014 ຈຳນວນ 60 ຕື້ກີບ ພິຈາລະນາໃຫ້ສັດຕະຍາບັນແກ່ສັນຍາວ່າດ້ວຍການສົ່ງເສີມ ແລະ ປົກປ້ອງການລົງທຶນເຊິ່ງກັນ ແລະ ກັນ ລະຫວ່າງລັດຖະບານ ສປປ ລາວ ແລະ ລັດຖະບານ ສ.ຟິລິບປິນ ລາຍງານກ່ຽວກັບການຂໍເອົາຊ່ຽວຊານຈາກທະນາຄານໂລກ ຈຳນວນ 1 ທ່ານ ເພື່ອມາໃຫ້ຄຳປຶກສາ ໃນການກະກຽມຮ່າງເອກະສານນິຕິກຳຈຳນວນໜຶ່ງຂອງກຳມາທິການເສດຖະກິດແຜນການ ແລະ ການເງິນ ພິຈາລະນາອະນຸມັດມະຕິຕົກລົງຂອງສະພາແຫ່ງຊາດ ກ່ຽວກັບເຂື່ອນໄຟຟ້ານ້ຳກົງ 2 ແລະ ຜົນການຄົ້ນຄວ້າໜັງສືຂອງລັດຖະບານ ໃນການພິຈາລະນາອະນຸມັດ ອອກມະຕິຕົກລົງຂອງສະພາແຫ່ງຊາດ ກ່ຽວກັບໂຄງການເຂື່ອນໄຟຟ້ານ້ຳງຽບ 1 ລາຍງານແຜນຈັດກອງປະຊຸມວຽກງານຫ້ອງວ່າການສະພາແຫ່ງຊາດທົ່ວປະເທດ ປະຈຳປີ 2013 ແລະ ວຽກງານສຳຄັນອື່ນໆຈຳນວນໜຶ່ງ.
ไม่มีความเห็น