1. ບົດນໍາ.

1.1 ຄວາມເປັນມາ ແລະ ຄວາມສໍາຄັນຂອງບັນຫາ.

   ການສຶກສາມີຄວາມສຳຄັນ ແລະ ເປັນຂໍກຸນແຈແກ້ໄຂບັນຫາຊີວິດການເປັນຢູ່ຂອງຄົນ  ແລະ ຂະຫຍາຍຕົວພ້ອມທັງມີການດຳລົງຊີວິດຢູ່ໃນຄອບຄົວ, ສັງຄົມຢ່າງມີປະສິດທິຜົນ, ສະນັ້ນ ບໍ່ວ່າບຸກຄົນໃດກໍ່ຕາມທີ່ຢູ່ໃນສັງຄົມຈຳຕ້ອງມີຄວາມໄຝ່ຝັນຊອກສະແຫວງຫາຄວາມຮູ້, ຄວາມສາມາດ, ສຶກສາຮໍ່າຮຽນເພື່ອອະນາຄົດ ເພື່ອຄວາມກ້າວໜ້າໃນການພັດທະນາຕົນເອງຢູ່ສະເໜີ.

    ໂຮງຮຽນມູນລະປະຖົມນາວາແສນ ແມ່ນໂຮງຮຽນແຫ່ງໜຶ່ງທີ່ຂຶ້ນກັບໝວດໂຮງຮຽນປະຖົມໂພນຄໍາ ເມືອງ ລະມາມ ແຂວງ ເຊກອງ ຕັ້ງຢູ່ລະຫວ່າງກາງຂອງບ້ານ.

     ໂຮງຮຽນແຫ່ງນີ້ສ້າງຂຶ້ນໃນປີ 2005 ໂດຍແມ່ນໂຄງການເດັກຍິງເປັນຜູ້ຊ່ວຍເຫຼືອ, ມີຄູອາຈານ ທັງໝົດ 2 ຄົນ, ຍິງ 0 ຄົນ. ສົກຮຽນ 2012-2013 ມີນັກຮຽນທັງໝົດ 37 ຄົນ, ຍິງ 17 ຄົນ.

    ການຈັດການຮຽນ - ການສອນໃນແຕ່ລະປີເປັນຂະບວນຟົດຟື້ນໄປຕາມຫຼັກສູດຂອງວິຊາຮຽນ ໃນນັ້ນໂຮງຮຽນນາວາແສນກໍ່ແມ່ນໂຮງຮຽນໜຶ່ງທີ່ພົບບັນຫານັກຮຽນໂດຍສະເພາະແມ່ນນັກຮຽນຫ້ອງປ 3 ເຊັ່ນ: ນັກຮຽນຂາດຮຽນ, ນັກຮຽນວົນແຊວ, ອ່ານພາສາລາວບໍ່ຖືກຫຼັກໄວຍະກອນ, ນັກຮຽນປ່ຽນຫົວໜ່ວຍມວນສານບໍ່ໄດ້ ແລະ ບັນຫາອື່ນໆອີກ.ໃນນັ້ນຂ້າພະເຈົ້າ ແລະ ຄູ່ຮ່ວມງານມີຄວາມສົນໃຈບັນຫານັກຮຽນປ່ຽນຫົວໜວ່ຍມວນສານບໍ່ໄດ້ເພື່ອຊ່ວຍປັບປຸງໃຫ້ນັກຮຽນຫ້ອງ ປ 3 ສາມາດເຂົ້າໃຈ ແລະ ປ່ຽນຫົວໜ່ວຍມວນສານໄດ້.

        ການຈັດການຮຽນ-ການສອນວິຊາຄະນິດສາດກໍ່ແມ່ນວິຊາໜຶ່ງທີ່ຮຽນຮູ້ກຽ່ວກັບວິທີການຕ່າງໆເຊັ່ນ: ການບວກ, ການລົບ, ການຄູນ, ການຫານ,  ການວັດແທກເນື້ອທີ່, ການວັດແທກລວງຍາວ, ການວັດແທກມວນສານ, ສໍາລັບວິຊານີ້ແມ່ນມີຄວາມສໍາຄັນ ແລະ ຈໍາເປັນທີ່ສຸດໃນການນໍາເຂົ້າໃນຊີວິດປະຈໍາວັນຂອງເດັກໂດຍສະເພາະຫົວໜ່ວຍໃນການວັດແທກມວນສານເຊິ່ງເປັນຫົວຂໍ້ທີ່ສຳຄັນ, ແຕ່ວ່າຫົວຂໍ້ດັ່ງກ່າວນີ້ແມ່ນຕ້ອງໄດ້ຮັບແກ້ໄຂ.

        ເພື່ອແກ້ໄຂບັນຫາດັ່ງກ່າວ, ຂ້າພະເຈົ້າຜູ່ວິໄຈຈຶ່ງໄດ້ຕົກລົງກັນກັບຄູ່ຮ່ວມງານກຳນົດຫົວຂໍ້ວິໄຈວ່າ “ການເສີມທັກສະການນຳໃຊ້ຕາຕະລາງປ່ຽນຫົວໜ່ວຍວັດແທກມວນສານຂອງນັກຮຽນຫ້ອງ ປ 3 “

1.2 ຈຸດປະສົງການວິໄຈ

   -ເພື່ອພັດທະນາທັກສະການປຽ່ນຫົວໜ່ວຍມວນສານຂອງນັກຮຽນຫ້ອງປ 3.

2   ວິທີດໍາເນີນການວິໄຈ           

2.1 ການສຶກສາສະພາບບັນ

ເພື່ອເກັບກຳຂໍ້ມູນໃຫ້ລະອຽດ ແລະມີຄວາມຊັດເຈນກວ່າເກົ່າຂ້າພະເຈົ້າຈິ່ງໄດ້ສົນທະນາປຶກສາຫາລືກັບຄູ່ຮ່ວມງານເພື່ອຊອກຫາສາຍເຫດຂອງບັນຫາທີ່ເກີດຂຶ້ນກັບນັກຮຽນ 3 ຄົນທີ່ປ່ຽນຫົວໜວ່ຍມວນສານບໍ່ໄດ້ ຂ້າພະເຈົ້າກໍໄດ້ເຊີນຄູ່ຮ່ວມງານມາຮ່ວມສອນຢູ່ຫ້ອງ ປ 3 ຄືດັ່ງລຸ່ມນີ້:

 ຄັ້ງທີ 1  

     ວັນທີ 1.3.2013. ຂ້າພະເຈົ້າໄດ້ຂຶ້ນຫ້ອງສອນ ວິຊາຄະນິດສາດ ບົດທີ 40 ການຊັ່ງ. ການສອນສາມາດເຫັນຂັ້ນຕອນ ແລະ ວິທີການສອນເຊັ່ນ: ກ່ອນດຳເນີນການສອນຄູໄດ້ທວນຄືນບົດຮຽນເກົ່າທີ່ໄດ້ຮຽນຜ່ານມາ,ຈາກນັ້ນໄດ້ເຂົ້າສູ່ບົດຮຽນໃໝ່ຫົວຂໍ້ກ່ຽວກັບການຊັ່ງ ໃນການດໍາເນີນການຮຽນ-ການສອນເຮັດໃຫ້ຮູ້ຈັກວ່ານັກຮຽນບໍ່ສາມາດປ່ຽນຫົວໜ່ວຍວັດແທກມວນສານໄດ້ຈຳນວນ 3 ຄົນ, ເມື່ອເປັນແນວນັ້ນຈຶ່ງຊອກຫາວິທີເກັບກໍາຂໍ້ມູນເພື່ອຫາສາເຫດຂອງນັກຮຽນບໍ່ສາມາດປ່ຽນຫົວໜ່ວຍວັດແທກມວນສານ ໂດຍສັງເກດຈາກການເຮັດບົດທົດສອບ ແລະ ການປະຕິບັດຕົວຈິງຂອງນັກຮຽນທັງ 3 ຄົນ, ຈິງຮູ້ວ່າສາເຫດທີ່ພາໃຫ້ນັກຮຽນປ່ຽນຫົວໜ່ວຍມວນສານບໍ່ໄດ້ແມ່ນຍ້ອນ:  ນັກຮຽນບໍ່ຕັ້ງໃຈຟັງຄຳອະທິບາຍຂອງຄູ, ຄູສອນໄວ, ບໍ່ມີສິ່ງຈູງໃຈ, ຄູ​ອະທິບາຍການປ່ຽນຫົວໜ່ວຍການວັດແທກມວນສານໃຫ້ນັກຮຽນເບິ່ງບໍ່ລະອຽດ.

      ຈາກການບັນທຶກຄັ້ງນີ້ເຮັດໃຫ້ຂ້າພະເຈົ້າ ແລະ ຄູ່ຮ່ວມງານມີຄວາມສົນໃຈໃນການສຶກສາສະພາບບັນຫາ ແລະ ເລືອກຫົວຂໍ້ວິໄຈວ່າ: “ ການເສີມທັກສະການນຳໃຊ້ຕາຕະລາງປ່ຽນຫົວໜ່ວຍມວນສານຂອງນັກຮຽນຫ້ອງປ 3 “ ດັ່ງນັ້ນຂ້າພະເຈົ້າຈິ່ງໄດ້ຄຳຖາມວິໄຈວ່າ:ຂ້ອຍຈະມີວິທີແນວໃດເພື່ອໃຫ້ນັກຮຽນຫ້ອງປ 3 ຈຳນວນ 3 ຄົນຂອງໂຮງຮຽນປະຖົມນາວາແສນປຽ່ນຫົວໜ່ວຍມວນສານໄດ້.

2.2 ການວາງແຜນຄັ້ງທີ 1.

     ຜ່ານການປຶກສາຫາລືກັບຜູ້ຮ່ວມງານຈົນສາມາດກໍານົດເອົາຫົວຂໍ້ ແລະ ຮູ້ສາເຫດທີ່ພາໃຫ້ເກີດບັນຫາແລ້ວກໍ່ໄດ້ວາງແຜນເພື່ອແກ້ໄຂບັນຫາດັ່ງນີ້:

     - ຈັດນັກຮຽນເປັນກຸ່ມ 2 ກຸ່ມ, ກຸ່ມລະ 4 ຄົນ

     -ຄູອະທິບາຍລະອຽດກ່ຽວກັບຫົວໜ່ວຍທີ່ໃຫຍ່ກ່ວາ, ນ້ອຍກວ່າ ( g.....kg.... )

     -ຄູເອົາໃຈໃສ່ນັກຮຽນເປົ້າໝາຍຫຼາຍກວ່ານັກຮຽນທົ່ວໄປ

2.3   ປະຕິບັດ ແລະ ສັງເກດຄັ້ງທີ 1

      ພາຍຫຼັງທີ່ໄດ້ວາງແຜນການວິໄຈແລ້ວຂ້າພະເຈົ້າກໍ່ໄດ້ນຳເອົາແຜນໄປປະຕິບັດໃນຄັ້ງວັນທີ 13.3.2013.ໂດຍໃຫ້ຜູ້ຮ່ວມງາານເປັນຜູ້ສອນ ຂ້າພະເຈົ້າເປັນຜູ້ສັງເກດພຶດຕິກຳຂອງນັກຮຽນກຸ່ມເປົ້າ

ໝາຍຈຳນວນ 3 ຄົນຄື:

     -ທ້າວ ກ

     -ທ້າວ ຂ

     -ນາງ ຄ ( ນາມສົມມຸດ )

ບົດຮຽນທີ່ສອນແມ່ນສອນຄືນວິຊາຄະນິສາດ ບົດທີ 40 ການຊັ່ງ ( ຕໍ່ ) ການຈັດການຮຽນ - ການສອນແບ່ງນັກຮຽນອອກເປັນ 2 ກຸ່ມ, ກຸ່ມລະ 4 ຄົນ ຄູອະທິບາຍເຄື່ອງມື ຫຼື ອຸປະກອນການຊັ່ງ ນ້ຳໜັກຄົນທີ່ຄູກຽມມາໂດຍອຸປະກອນແຕ່ລະຕົວຈິງເຊັ່ນ: ຊັ່ງປຶ້ມແບບຮຽນ, ຊັ່ງຖົງພາຍ, ຊັ່ງນັກຮຽນເອງ... ເອົາຕາຕະລາງການປ່ຽນຫົວໜ່ວຍວັດແທກມວນສານທີ່ກຽມມາໄປຕິດໃສ່ກະດານ, ຕັ້ງຄຳຖາມໃຫ້ນັກຮຽນສົນທະນາກັນເປັນກຸ່ມແລ້ວໃຫ້ນັກຮຽນຕອບເຊັ່ນ: ຫົວໜ່ວຍໃດທີ່ເຫັນວ່ານ້ອຍກ່ວາ g ແລະ ໃຫຍ່ກ່ວາ g.

ໂດຍໃຫ້ນັກຮຽນແຕ່ລະກຸ່ມປຶກສາຫາລືກັນ ແລະ ຊອກຫາຄຳຕອບໃນກຸ່ມນັ້ັນແລ້ວໃຫ້ນັກຮຽນກຸ່ມເປົ້າໝາຍປ່ຽນກັນອອກມາຂຽນຢູ່ກະດານພ້ອມອະທິບາຍທະວີຄູນ ແລະ ອຸປະຄູນຈາກນັ້ນກໍ່ດຳເນີນການຮຽນ - ການສອນໄປຕາມຫຼັກວິຊາຄູ ແລະ ຕາມບາດກ້າວຂອງການສອນໂດຍສອນໃຫ້ນັກຮຽນຮ່ວມມືໂດຍກົງພ້ອມທັງເອົານັກຮຽນກຸ່ມເປົ້າໝາຍຊັ່ງ ແລະ ປ່ຽນຫົວໜ່ວຍວັດແທກມວນສານດ້ວຍຕົນເອງ.

2.4 ການສະທ້ອນຄືນຄັ້ງທີ 1

ຈາກການນຳເອົາແຜນໄປປະຕິບັດຕົວຈິງໃນຄັ້ງວັນທີ 13.3.2013ໂດຍປະຕິບັດຕາມແຜນທຸກຢ່າງທີ່ວາງໄວ້ທຳອິດຄູໄດ້ອະທິບາຍປະຕິບັດຕົວຈິງການຊັ່ງຕົວຈິງຈັດນັກຮຽນເປັນ 2 ກຸ່ມ, ກຸ່ມລະ 4 ຄົນ, ມັນເປັນກຸ່ມນ້ອຍຈະຊ່ວຍໃຫ້ແຕ່ລະຄົນປະກອບສ່ວນເຂົ້າໃນການເຮັດກິດຈະກຳກຸ່ມສະດວກຂຶ້ນໂດຍສະເພາະຂ້ອຍສາມາດເຫັນໄດ້ວ່ານັກຮຽນຜູ່ທີ່ມັກອາຍແດ່ກໍມີຄວາມຫ້າວຫັນ ແລະ ສົນໃຈໃນສິ່ງທີ່ພວກເຂົາເຮັດຫຼາຍກວ່າເກົ່າ ແລະ ຮັບຜົນສຳເລັດຕາມແຜນທີ່ໄດ້ວາງໄວ້, ໃນເວລາສອນຄູເອົາໃຈໃສ່ນັກຮຽນກຸ່ມເປົ້າໝາຍຫຼາຍກວ່ານັກຮຽນທົ່ວໄປໂດຍໃຫ້ເຂົາປະຕິບັດກິດຈະກຳນຳໝູ່ໃນຫ້ອງຮຽນເວລາອອກແກ້ເລກຢູ່ກະດານຄູເຈາະຈົງນັກຮຽນກຸ່ມເປົ້າໝາຍຜ່ານການສັງເກດ ແລະ ເຮັດການທົດສອບໃນເວລາສອນເຫັນວ່າ: ປ່ຽນຫົວໜວ່ຍມວນສານໄດ້ ເມື່ອສອບຖາມນັກຮຽນຜູ້ດັ່ງກ່າວຈິ່ງຮູ້ວ່າ: ນັກຮຽນເປົ້າໝາຍ 1 ນ້ອງຍັງບໍ່ທັນເຂົ້າໃຈວິທີ ແລະ ຂັ້ນຕອນໃນການປ່ຽນຫົວໜວ່ຍມວນສານໄດ້ ກິດຈະກຳທີ່ຄູໃຫ້ແກ້ຢູ່ກະດານນັ້ນແມ່ນໝູ່ໃນກຸ່ມເປັນຜູ້ແກ້ ສ່ວນຕົນເອງມີພຽງແຕ່ຕິດຕາມເທົ່ານັ້ນເວລາຄູໃຫ້ອອກແກ້ ແລະ ບໍ່ເຂົ້າໃຈກ່ຽວກັບການອະທິບາຍຂອງຄູເບື້ອງທະວີຄູນ ແລະ ອຸປະຄູນ ດັ່ງນັ້ນເວລາປ່ຽນຫົວໜ່ວຍວັດແທກມວນສານນັັກຮຽນເປົ້າໝາຍຈຳນວນ 1 ນ້ອງຈິ່ງບໍ່ສາມາດແກ້ໄດ້ຢ່າງຖືກຕ້ອງຄືໝູ່ ເມື່ອເປັນແນວນັ້ນຂ້າພະເຈົ້າຈິ່ງໄດ້ປຶກສາຫາລືກັນກັບຮ່ວມງານເພື່ອສືບຕໍ່ໃນການຊ່ວຍເຫຼືອແກ່ນັກຮຽນຈຳນວນ 1 ນ້ອງນີ້ຕື່ມອີກ.

2.5 ການວາງແຜນຄັ້ງທີ 2

ພາຍຫຼັງທີ່ໄດ້ນຳເອົາແຜນຄັ້ງທີ 1 ໄປຈັດຕັ້ງປະຕິບັດເຫັນວ່າ: ນັກຮຽນກຸ່ມເປົ້າໝາຍມີການປ່ຽນແປງພຶດຕິກຳບໍ່ເປັນທີ່ເພີ່ງພໍໃຈຂອງພວກຂ້າພະເຈົ້າ ດັ່ງນັ້ນຈິ່ງໄດ້ປຶກສາຫາລືກັນຕື່ມອີກໃນຄັ້ງວັນທີ 20.3.2013 ໃນການປຶກສາຫາລືໄດ້ຕົກລົງວ່າ:

- ໃຫ້ນັກຮຽນກຸ່ມເປົ້າໝາຍນັ່ງກັບນັກຮຽນເກັ່ງ

- ເອົາໃຈໃສ່ໃຫ້ການຊວ່ຍເຫຼືອ ແລະ ຕິດຕາມນັກຮຽນຫຼາຍຂຶ້ນກວ່າເກົ່າ

- ມອບວຽກບ້ານໃຫ້ນັກຮຽນປະຕິບັດຢູ່ເຮືອນແລ້ວກັບມາໂຮງຮຽນຄູກວດກາພ້ອມທັງໃຫ້ຄຳ

  ແນະນໍາ ແລະ ໝູ່ຄູ່ຊ່ວຍເຫຼືອອະທິບາຍ

2.6 ປະຕິບັດ ແລະ ສັງເກດຄັ້ງທີ 2

     ພາຍຫຼັງທີ່ໄດ້ວາງແຜນຄັ້ງວັນທີ 20 .3 .2013 ພໍຮອດວັັນທີ 27.3.2013 ພວກຂ້າພະເຈົ້າໄດ້ນໍາເອົາແຜນຄັ້ງທີ 2 ໄປປະຕີບັດ ໂດຍແມ່ນຂ້າພະເຈົ້າ ແລະ ຄູ່ຮ່ວມງານລົງເລິກຫາຜູ້ປົກຄອງຂອງນັກຮຽນກຸ່ມເປົ້າໝາຍ.ໃນຄັ້ງວັນທີ 29.3.2013​ ຂ້າພະເຈົ້າໄດ້ເປັນຜູ້ຂຶ້ນຫ້ອງສອນຄູ່ຮ່ວມງານເປັນຜູ້ສັງເກດ ແລະ ບັນທຶກ. ( ສອນຊໍ້າຄືນບົດເກົ່າ ) ຄູຈັດນັກຮຽນກຸ່ມເປົ້າໝາຍໃຫ້ນັ່ງກັບນັກຮຽນເກັ່ງ, ໃຫ້ນັກຮຽນເປົ້າໝາຍແກ້ກິດຈະກໍາວຽກບ້ານຢູ່ກະດານໂດຍໃຫ້ໝູ່ຊ່ວຍອະທິບາຍ. ສ່ວນຄູເຮັດໜ້າທີ່ໃກ້ຊິດຕິດຕາມ ການປະຕິບັດກິດຈະກໍາຂອງເຂົາ ກິດຈະກໍາທີ່ຄູມອບໃຫ້ເຮັດແມ່ນໃຫ້ນັກຮຽນປ່ຽນຫົວໜ່ວຍມວນສານ

1.     10   kg      =     ?   g

2.     40   Kg      =     ?   ​g

3.     65   kg      =     ?    g

4.    1000 g       =   ?      kg

5.    2000 g       =    ?     kg

 

     ​ໂດຍ​ໃຫ້​ນັກຮຽນ​ແຕ່​ລະ​ກຸ່ມ​ແກ້ ​ແລະ ​ໃຫ້​ນັກຮຽນ​ກຸ່ມ​ເປົ້າ​ໝາຍ ອອກ​ມາ​ແກ້​ຢູ່​ກະດານຫຼັງຈາກ​ນັ້ນ​ກໍ່​ຕັ້ງ​ບັ້ງ​ເລກ​ໃໝ່​ໃຫ້​ນັກ​ຮຽນ​ກຸ່ມ​ເປົ້າ​ໝາຍ​ອອກ​ມາ​ແກ້​ອີກ.

1.    1  kg  =   ?  dag

2.    2 kg =   ?  cg

3.    3kg  =   ?  mg

4.    1g   =   ?  kg

5.    1 mg  =   ?   g

6.    5 cg  =   ?   g

    ​ເຫັນ​ວ່າ​ນັກຮຽນ​ເປົ້າ​ໝາຍ​ສາມາດ​ປ່ຽນຫົວໜ່ວຍມວນ​ສານໄດ້ ​ແລະ ມີ​ການ​ປຽ່ນ​ແປງ​ພຶດຕິ​ກຳ​ດີຫຼາຍຂຶ້ນ​ເອົາ​ໃຈ​ໃສ່​ຕໍ່ການ​ຮຽນຊອກ​ຮູ້​ຮໍ່າຮຽນນໍາໝູ່.

2.7  ການສະທ້ອນຄືນຄັ້ງທີ 2

     ພາຍຫຼັງທີ່​ນຳ​ເອົາ​ແຜນ​ໃໝ່​ໄປ​ຈັດຕັ້ງປະຕິບັດຄັ້ັ້ງວັນ​ທີ 29.3.2013 ນັ້ນ​ເຫັນ​ວ່າ​ຜ່ານການຈັດກິດຈະກຳໃນຫ້ອງຮຽນ ໃຫ້ນັກຮຽນອ່ອນນັ່ງໃກ້ກັບນັກຮຽນເກັ່ງເຫັນວ່ານັກຮຽນມີການຊ່ວຍເຫຼືອ ແລະໃຫ້ຄຳແນະນຳກັນໃນການແກ້ບົດເລກ ການທີ່ຄູມອບວຽກບ້ານໃຫ້ໄປແກ້ຢູ່ເຮືອນນັ້ນນັກຮຽນກໍ່ມີການແກ້ແລ້ວກັບມາຄູກໍ່ກວດໃຫ້ຄະແນນພ້ອມທັງໃຫ້ຄຳແນະນຳເປັນອັນ​ເພິ່ງ​ພໍ​ໃຈ​ຫຼາຍ​ເພາະວ່າ​ປະສົບ​ຜົນສຳ​ເລັດ​ເປັ​ນຢ່າງ​ດີ​ເຮັດ​ໃຫ້​ນັກຮຽນກຸ່ມ​ເປົ້າໝາຍ​ມີ​ຄວາມ​ກະຕືລືລົ້ນຄົ້ນຄວ້າ​ບົດຮຽນ​ຫຼາຍຂຶ້ນກວ່າເກົ່າ​ເຊິ່ງມັນສະ​ແດງ​ອອກ​ໃນ​ການ​ແກ້​ບົດ​ຝຶກ​ຫັດ ​ແລະ ອອກ​ປ່ຽນຫົວໜວ່ຍມວນ​ສານ​ຢູ່​ກະດານ. ນອກຈາກ​ນັກຮຽນກຸ່ມ​ເປົ້າໝາຍ​ແລ້ວ​ນັກຮຽນທົ່ວ​ໄປ​ໃນ​ຫ້ອງ​ຮຽນກໍ່ມີ​ຄວາມ​ເອົາ​ໃຈ​ໃສ່​ຕໍ່ການ​ຮຽນ.

3. ສະຫຼຸບ

      ​ໃນການຈັດຕັ້ງປະຕິບັດ​ການ​ດຳ​ເນີນ​ການ​ວິ​ໄຈ ຜູ້​ວິ​ໄຈ​ທຸ້ມ​ເທ​ເວລາ ​ແລະ ​ຄວາມ​ຮູ້​ທີ່​ໄດ້​ຮຽນມາ​ໂດຍ​ໄປ​ຈັດຕັ້ງປະຕິບັດ​ຕາມ​ແຜນ​ຂັ້ນຕອນ​ຂອງ​ການ​ວິ​ໄຈ ​ເປັ​ນຕົ້ນ​ແມ່ນໄດ້​ເກັບ​ກຳ​ຂໍ້​ມູນ​ເພື່ອ​ສຶກສາ​ສະພາບ​ບັນຫາ, ຊອກຫາ​ສາເຫດ, ວິທີ​ແກ້​ໄຂ, ນຳ​ເອົາ​ແຜນ​ທີ່​ວາງ​ໄວ້​ໄປ​ຈັດຕັ້ງປະຕິບັດ, ສັງ​ເກດ ແລະ ​ບັນທຶກ​ການ​ປ່ຽນແປງຂອງ​ນັກຮຽນ​ກຸ່ມ​ເປົ້າໝາຍ. ຜ່ານ​ການ​ດຳ​ເນີນ​ການ​ວິ​ໄຈ​ທັງ 2 ຮອບ​ວຽນສາມ​າດສະຫຼຸບຜົນ​ການ​ວິ​ໄຈ​ໄດ້​ຄື:

   -ນັກຮຽນ​ເປົ້າໝາຍຈຳນວນ 3 ຄົນ​ມີ​ການ​ປ່ຽນ​ແປງ​ພຶດຕິ​ກຳ​ດີ​ຂຶ້ນ ແລະ ສາມາດ​ປ່ຽນຫົວໜ່ວຍມວນ​ສານ​ໄດ້.

   -ນັກຮຽນ​ເປົ້າໝາຍມີ​ສ່ວນ​ຮ່ວມ​ໃນ​ການ​ຮຽນ ສາມາດ​ຖາມ-ຕອບ​ຄູ ​ແລະ ໝູ່ຄູ່​ໄດ້ບັນຫາ​ທີ່ບໍ່​ເຂົ້​າໃຈ.

   -ຕັ້ງ​ໃຈ​ປະຕິບັດ​ວຽກງານ​ທີ່​ມອບໝາຍ​ແກ້ກິດຈະກຳວຽກບ້ານຈົນ​ສຳ​ເລັດ. ​

   -ເຂົາ​ເຈົ້າ​ໄດ້​ພັດທະນາ​ຕົນ​ເອງ​ໃຫ້​ມີ​ຜົນ​ການ​ຮຽນດີ​ຂຶ້ນພ້ອມນັ້ນກໍ່ມີ​ການ​ຊ່ອຍ​ເຫຼືອ​ເຊິ່ງກັນ ແລະ ກັນ​ລະ​ຫ່ວາງ​ນັກຮຽນ​ເກັ່ງ ​ແລະ ນັກຮຽນອ່ອນ​ເຮັດ​ໃຫ້​ບັນຍາກາດ​ການ​ຮຽນ-ການ​ສອນ​ຟົດຟື້ນຂຶ້ນ. ນອກຈາກ​ນັ້ນຄູ​ຜູ້​ສອນ​ເອງ​ຍັງ​ມີ​ເຕັກນິກ ແລະ ກໍາ​ເນື້ອ​ໃນ​ບົດຮຽນ​ແຕ່​ລະ​ບົດ ສິ່ງ​ດັ່ງກ່າວ​ໄດ້​ສ້າງ​ຄວາມ​ເພິ່ງ​ພໍ​ໃຈ​ເພາະ​ນອກຈາກ​ສ້າງ​ໃຫ້​ນັກຮຽນກຸ່ມ​ເປົ້າໝາຍ​ມີ​ການ​ປ່ຽນ​ແປງ​ພຶດຕິ​ກຳ​ແລ້ວ​ຍັງ​ເປັນ​ບາດກ້າວ​ໃນ​ການ​ພັດທະນາ​ການ​ຮຽນ - ການ​ສອນ​ຂອງ​ຄູໃນໂຮງຮຽນມູນ​ລະ​ປະຖົມ​ນາວາ​ແສນ​ດີ​ຂຶ້ນກວ່າ​ເກົ່າ.

4. ຂໍ້​ສະ​ເໜີ​ແນະ

4.1 ຂໍ້​ສະ​ເໜີ​ແນະ​​ຜົນຂອງການວິໄຈ

    - ຄວນ​ມີ​ການ​ໃກ້ຊິດຕິດ​ແທດ​

    - ຄວນ​ຕິດຕາມ ​ແລະ ຊ່ວຍ​ເຫຼືອນັກຮຽນ​ເປົ້າໝາຍຫຼາຍທີ່​ສຸດ

    -​ເປີດ​ໂອກາດ​ໃຫ້​ນັກຮຽນ​ເປົ້າໝາຍ​ໄດ້​ແລກປ່ຽນບົດຮຽນນຳໝູ່​ໃນ​ຫ້ອງ​ຮຽນ

4.2 ຂໍ້​ສະເໜີແນະການວິໄຈຄັ້ງຕໍ່ໄປ

    - ຄວນເຮັດການວິໄຈເສີມທັກສະການໃຊ້ຕາຕະລາງປ່ຽນຫົວໜ່ວຍນໍາໃຊ້ມວນສານໃນຫ້ອງຮຽນ 

      ອື່ນ

5. ​ເອກະສານອ້າງ​ອີງ

1.   ກະຊວງສຶກສາທິການ, ກົມ​ສ້າງ​ຄູ, ປຶ້ມຄູ່​ມື​ການ​ວິ​ໄຈ​ພາກ​ປະຕິບັດ 2011-2013