หมอสู่ขวัญควาย นายสีกา ทองน้อย อยู่บ้านหนองผือน้อย หมู่ที่ ๘ ตำบลนาโส่ อำเภอกุดชุม จังหวัดยโสธร มีคำสู่ขวัญควายดังต่อไปนี้

* ศรี ศรี มื้อนี้แม่น มื้อหมั่น หมั่นให้เจ้าหมั่นกว่าก้อนผาแอ่น หมั่นให้หมั่นกว่าแท่น พระจวงจันทร์ หมั่นให้เจ้าหมั่นกว่าภูเขาหลวงไกรลาศ หมั่นให้เจ้าหมั่นกว่าศิลาอาสน์หินเพชร เฮ็ดนาเจ้าอย่าได้ช้า ให้เจ้าตั้งซื่อไปไวไว เจ้าอย่าได้มีใจโกรธกล้า หยาบช้าอดสะหาว ข้อยฮักเจ้าคือสาวฮักน้อง ไม้ล่องค่องเตาะต่อยตีไป กูสิแก้ปดเสียมื้อนี่วันนี่

* ข่อยจึงสู่ขวัญควาย เทิงหมู่ปู่ย่าและหลานเหลน โตได๋เข็นหลายให้เจ้าแผ่พื่น เมือหน้าได้กินหญ้า เจ้าอย่าได้เข้าสวน ให้เจ้าชวนกันมาแต่นาฮอดบ้าน ให้เจ้าอวนกันมาอยู่แหล่งใต้ล่างเฮือนเสา บ่อนข้อยสิผูกเจ้าไว้ ให้เจ้าได้ลูกเต้าน้อยอ่อนพอพัน มื้อนี่แม่นมื้อสันวันนี่แม่นวันกล้า

* ข้อยจึงสู่ขวัญควายบักคำ อีเผือกโตบุญมี อีเขาปีโตบุญกว้าง ข่อยจึงเอาเจ้าเมืออยู่สร้าง มีลูกหลานและลูกน้อย แล่นอ่อมอ้อยแอ่วกินนม ทมๆใจสิขาด น้ำตาหยาดไหลตก เจ้าจึงคะนิงในอกในทรวงจักแตกทะลาย อยู่เหิงหลาย สวยพองายแดดกล้า เจ้าจึงต่าวหน้าคืนมา ข่อยจึงมีใจเคียดค้อย ข่อยจังพายเอาค้อนน้อยๆ เตาะต่อยตีไป ไปบ่ดีข่อยจังได้ด่า ไปซ้าข่อยจังได้ไล่เร็วไป เจ้าจังไปชีซุด ชีซาด ชิดค่าวขาดเซไปปลดไถเซาข่อยกะสิตีซ้ำ

* มาเยอขวัญเอ๊ย ขวัญหัวเจ้าไปกินหญ้าอยู่กลางดง กะให้มาลงมื้อนี่วันนี่ ขวัญเจ้าไปเซซงอยู่ในป่า ก็ให้มาสาในมื้อนี่วันนี่ ขวัญหัวเจ้าไปแอบน้ำ อยู่ในหนองแหนลี้เหลือก ก็ขอให้มาสาในมื้อนี่วันนี่

* มาเยอขวัญเอ๊ย เจ้าอย่าได้ตกสะท้อนใจ ฝนตกฟ้าฮ่ำฮ้อง ให้เจ้าตั้งหน้าต่อทางมา ดูสองตางามละห้อย กับเทิงขวัญลูกน้อย แล่นอ่อมอ้อยนำแม่อยูลีลา ให้เจ้ามากินหญ้าแฝกใบหนา ข่อยกะได้มาแล้ว ให้เจ้ากินหญ้าคาใบเขียวอ่อน ข่อยกะได้มาแล้ว หญ้าป้องแอ้วเหลือหลาย ข่อยกะได้มาแล้ว หญ้าหวายกิน แซมซ้อย ข่อยกะได้มาแล้ว ใบแลบน้อยนั่นแม่นหญ้าไซ ข่อยกะได้มาแล้ว ใบสวยส่วยยอดกล้วย ยอดอ้อย ข่อยกะได้มาแล้ว มาตั้งล้อมพาขวัญอยู่ส้วยล่วย มักอันใด๋ให้เจ้ากินอันนั่น

* มาเยอขวัญเอ๊ย โตได๋บ่มา เสือเหลืองมักสินำไปฆ่าเจ้าแล้ว มาเยอขวัญเอ๊ย โตใด๋บ่มาหมาป่าสินำไปเหยียบสูเจ้าแล้ว มาเยอขวัญเอ๊ย มาอยู่ยืนยาวในห้อง ไม้ล่องค่องเตาะต่อยตีไป ข่อยสิแก้สิปด มื้อนี้วันนี้ ข่อยจักต่อยทังลิ่มจีมไถ ข่อยจักต่อยทังไลจีมคราด ให้เจ้ายืนยาวหมั่นทันตาตั้งอยู่ดีเยอ อย่าได้โค่นค่างล้ม ลงก่อนเสียเยอ

* ชยดุ ภวังค์ ชยมังคลัง สตวัสสา มีฆายุโกโหนตุ มหิงสาโคณา