ค่าวประวัติแม่ชีคำปุ๋ย ดอกคำใต้ พะเยา
ยอมือสาน กราบกรานน้อมนบ ต่านตี่เคารพ ขอเล่าไขจ๋า
อิตถี เลิศล้ำ ก๊ำศาสนา ปี่น้องศรัทธา อาวอาไกล๋ใกล้
อยู่วัดสันกลาง เมืองดอกคำใต้ จังหวัดพะเยา ถิ่นนี้
จื่อเสียงเรียงนาม งดงามกล่าวจี๊ คำปุ๋ยแม่นหมั้น ไชยวงศ์
เหลื้อมใสพุทธะ ธรรมะ พระสงฆ์ จิตใจ๋หมั้นคง ศาสะนาเจ้า
เกิดห้า ธันวา แปดศูนย์ ปี๋เป้า ฉลู นามงัว มิ่งมิตร
ตั๊ดเดือนสามเหนือ ออกสองค่ำติ๊ด ศรีจุมหมู่บ้าน เดิมที
ป่อเสาร์ แม่ฟ้า ลุงป้า สุขี ญาติมิตรเปรมปรีดิ์ ปี๋ติ๋จื่นสู้
ตั้งจื่อ คำปุ๋ย กำเมือง เปิ่นอู้ คำฝอย กำไทย แม่นตั๊ด
หมั่นเวียกหมั่นก๋าร งานสารพัด จ่วยป่อแม่เจ้า โททำ
ตักน้ำเลี้ยงน้อง เข้าใส่มองต๋ำ นาหว่านนาดำ จ่วยแม่เกี่ยวหญ้า
ใส่ใจ๋จ๋ดจ๋ำ หลักธรรมก้าวหน้า ปั๋ญจะศีลา เคร่งครัด
อายุสิบสอง ใจ๋ป๋องอยู่วัด ลาป่อแม่เจ้า คนดี
ป่อเสาร์ แม่ฟ้า ตอบถ้อยวจี๋ จะไปบวชชี อายุยังหน้อย
ญา-ติ วงศา อาลัยใฝ่ห้อย ลูกหน้อยคนดี แต๊ตั๊ก
หันลูกเหลื้อมใส ใจ๋ในใฝ่ฮัก ศาสนาเจ้า ศรัทธา
จักอยู่ฮับใจ๊ พระศาสนา สร้างสมบุญญา ของตั๋วลูกเต้า
อายุสิบสอง ใจ๋ป๋องไต่เต้า ขอไปบวชชี อยู่วัด
หลักไตรสิกขา ศึกษาเคร่งครัด กลั๋วลำบากได้ ปายลูน
อยู่บ้านก่อนเต๊อะ ไชยวงศ์ ขะกูล จ่วยก๊ำจ่วยกูล ป่อแม่ไจ้ ๆ
เมื่อใหญ่ขึ้นมา ก่อยบวชก็ได้ ขอลูกนงวัย ฮ่ำปิ๊จ
คำปุ๋ย ฟังกำ เก็บนำมาคิด กำป่อแม่เจ้า ตักเตือน
ป่อแม่เปิ่นฮัก จักหาไหนเหมือน เลยอยู่เฝ้าเฮือน แห็มสี่ปี๋เจ้า
จ๋นใหญ่ขึ้นมา สิบหกขวบเข้า ลูกเต้าคนดี ม้ำมึก
จึงเข้าไปหา ปิต๋าอย่างนึก ยกมือกราบไหว้ ทันที
ว่าลูกอายุ ได้สิบหกปี๋ ขอไปบวชชี อยู่วัดหล้างได้
ตี่วัดสันกล๋าง เมืองดอกคำใต้ จังหวัดเจียงฮาย ก่อนนั้น
ป่อแม่ตึงสอง ถัดถองถี่จั๊น หันใจ๋ลูกหน้อย คนดี
เลยป๋งมอบอั๊บ คำปุ๋ยสาวจี๋ ไปบวชเป๋นชี สันกล๋างวัดใกล้
คำปุ๋ย แมชี ทำดี ไจ้ ๆ จ๋ำศีลฟังธรรม บ่ละ
เดือนดับเดือนเป็ง วันศีลวันพระ ฮิฮ่ำส่ำสร้าง ตางธรรม
ศีล สมาธิ ภาวนา จ๋ำ จิตใจ๋น้อมนำ ในธรรมพระเจ้า
แม่ขาวสาวจี๋ ใจดีบ่เศร้า มุ่งเข้านิปปาน แม่นตั๊ด
หลักไตรสิกขา ศิลาจาวัตร หมั่นปัดกวาดเผี้ยว อาราม
วันศีล วันพระ ตี๋สอง ตี๋สาม จิ๋เตียนเหล้มงาม ต๋ามตี่ครูหื้อ
จื่อว่าแม่ครู ชีหม่อม หนักตื้อ สอนหื้อคนดี ศิษย์ฮัก
จ๋นชีคำปุ๋ย ได้ปฐมมรรค จึ่งปากั๋นเข้า เมืองกรุง
อยู่วัดปากน้ำ เฮียนธรรมจั๊นสูง จิตใจ๋หมั้นกุง บ่มีไหวเสิ้ง
โลภ โกรธ โมหา บ่มาเกิดเกิ้ง สมใจ๋ในเปิง เจ่นล้ำ
ศิษย์หลวงป่อสด ตี่วัดปากน้ำ ฝึกฝนบ่ายข้อน ตอนงาย
จึ่งได้บรรลุ ดวงธรรมสมหมาย คือ ธรรมกาย หายใจ๋ออกเข้า
เป็นธรรมจั๊นสูง พระพุทธเจ้า ต๋ามศรัทธาเฮา ต่างฮู้
แม่ชีคำปุ๋ย ไชยวงศ์กลิ่นกู๊ ปิ๊กคืนสู่บ้าน เมืองเฮา
มาโปรดแม่ฟ้า ปิ๋ต๋า ป่อเสาร์ จาวเมืองพะเยา ต่างจมจื่นสู้
ศรัทธาใกล้ไกล๋ ใจ๋ไหลหลิ่งหลู้ หลั่งไหลมาจู บ่ละ
มาเปิ่งเมตต๋า มาการวะ คำปุ๋ย แม่เจ้า ไชยวงศ์
พะเยาหล่ายกว๊าน เจียงคำเมืองป๋ง เจียงม่วนบ้านดง มาดอกคำใต้
แม่ใจ เมืองจุน บุบุ่นมาไหว้ ไกล๋ใกล้ในเมือง ป่าแพระ
เปิ่งป๋ารมี แม่ชี จี๊แนะ ทำดีกู่ผู้ ยิงจาย
ลำปางก็นัก ลำปูนก็หลาย แป่ น่าน เจียงฮาย เจียงใหม่ใหญ่กว้าง
ใต้ล่าง เมืองชล ผู้คนอวดอ้าง ต่างศรัทธาบุญ เปิ่งป๊ะ
เข้าออกวะสา แปดเป็ง มาฆะ ปากั๋นหลั่งเข้า มาตาน
สลากภัต ศรัทธา ลูกหลาน ปีใหม่สงกรานต์ ปากั๋นมาไหว้
มาวัดสันกล๋าง ตี่ดอกคำใต้ เหลื้อมใสใบบุญ แต๊ตั๊ก
คำปุ๋ย แม่ชี จิตใจ๋ใฝ่มัก หุมตานก่อสร้าง ตางบุญ
สร้างสรรค์สับป๊ะ ตานะเกื้อหนุน ลำปางลำปูน เจียงใหม่ก็สร้าง
สร้างศาลาสงฆ์ สามจั๊นใหญ่กว้าง สันกล๋างวัดเฮา แห่งนี้
สร้างเจดีย์หลวง ต้นเผิ้งเมืองลี้ สารูปพระเจ้า เมืองพาน
สร้างศาลาครึ อำเภอขุนต๋าล ศรัทธาเจยบาน สุขสันทั่วหน้า
สร้างพระนาคปรก ตี่วัดฮ่องห้า ปี่น้องศรัทธา กราบนบ
ผาแดงเมืองงาว ต่านตี่เคารพ สร้างแต่นพระเจ้า ลำปาง
สร้างโบสถ์หิ้อวัด บ้านใหม่ต้นฝาง แม่ชีนำตาง ลูกหลานจื่นสู้
ผลงานท่านหลหาย เกิ๋นบรรยายอู้ ขอเจินมาดู ผ่อเต๊อะ
ทุนก๋ารศึกษา หื้อมาเป่อเลอะ สร้างหอสมุดหื้อ โรงเรียน
ปากก๋าบรรทัด แบบหัดอ่านเขียน สร้างห้องทะเบียน หื้อดอกคำใต้
ต่างยกมือสา วันตากราบไหว้ กุศลบุญตาน แม่พระ
เผยแผ่กำสอน บวรพุทธะ จิตใจ๋มุ่งหมั้น ทำมา
รางวัลเลิศล้ำ ก๊ำศาสนา รางวัลเสมา ธรรมจักรเจ้า
ฟ้าเทพประทาน หื้อต่านเข้าเฝ้า ไปฮับเอามา เรียบร้อย
หยุกยาฮักษา ทำมาบ่น้อย เปี้ยธิหายจ้อย เจยบาน
สร้างตึกสองจั๊น นั้นเป๋นหลักฐาน มอบหื้อโฮงบาล ตี่ดอกคำใต้
กระทรวงคุณหมอ ยอมือกราบไหว้ หื้อเกียรติคุณ มอบอั๊บ
แม่ชีหื้อตาน จาวบ้านน้อมฮับ ปี๋ติ จื่นสู้ บุญตาน
ไกล๋ใกล้บ่ละ ป่าดงสถาน เป๋นคาราวาน ของตานไปหย้ำ
ลงห้วยขึ้นเขา ลำเนาเถื่อนถ้ำ นำของไปตาน ทั่วทิศ
ผ้าห่มผ้าผวย ไปจ่วยจีวิต คนเหน็บหนาวด้าง บนดอย
ป่ำเป็งตานะ บ่มีหนถอย ถึงไกล๋จอยวอย แม่ก็ยิ้มสู้
สร้างป๋ารมี บ่มีหลิ่งหลู้ กุศลบุญจู จ่วยก๊ำ
แม่สร้างสมปาร มานานเลิศล้ำ ประจักษ์แจ่มแจ้ง ความดี
ศรัทธา นายก ยาจก เศรษฐี หันป๋ารมี ต๋ามตี่แม่สร้าง
ต่างก็ไหว้สา วันตาอวดอ้าง แม่สร้างความดี แต๊ตั๊ก
ศรัทธาใกล้ไกล๋ จิตใจ๋พร้อมพรัก ฮ่วมกับแม่สร้าง ตางบุญ
พุทธะ ธรรมะ สังฆะ เกื้อหนุน กุศลก๊ำกูล โลกนี้โลกหน้า
แม่ชี คำปุ๋ย ไชยวงศ์ เจ้าข้า กุศลบุญปา จ่วยก๊ำ
สมเป๋นอิตถี สตรีเลิศล้ำ ก๊ำศาสะนาเจ้า โคดม
สาตุ๊ สาตุ๊ เตี่ยงหมั้นสุขสม ยกมือพนม กราบแม่ชีเจ้า...ๆ
............................................................................................................
แม่ชีคำปุ๋ย เป็นลูกของพ่อเสาร์ แม่ฟ้า ไชยวงศ์ เกิด เมื่อวันอาทิตย์ ขึ้น ๒ ค่ำ เดือน ๓ เหนือปีเป้า ตรงกับวันที่ ๕ ธันวาคม พ.ศ. ๒๔๘๐ ณ บ้านศรีชุม ต.ดอนศรีชุม อ.ดอกคำใต้ จ. พะเยา
ความเห็น (0)
ไม่มีความเห็น