ขายปลาส้ม

โดย หนานอ้วน ขันทะวงศ์

 

 

            สวัสดีครับ  ปี่น้องตังหลาย                              ตึงยิงตึงจาย   ตึงหนุ่มตึงเถ้า

ผมนายจำเริญ    ขอเจิญเน้อเจ้า                                  กับเข้าเกียมมา   เป่อเลอะ

            ตึงซ้ายตึงขวา   เจิญมาผ่อเต๊อะ                      เป๋นปล๋าไร้ก้าง   ไร้มัน

ปล๋าจ่อมปล๋าฟัก    ตี่เฮามักกั๋น                                   ทูเก็ม ทูมัน     ปล๋าฮ้าปล๋าส้ม

ขี้ปล๋าขม            กลิ่นมันหอมอ้ม                                 คนเหนือนิยม    แต๊ตั๊ก

            ไส้ปล๋า ไข่ปล๋า    หมู่เฮาซ้ำมัก                         หิงแอนพริกแห้ง   ตวยไป

รสดีเลิศล้ำ        จุ๋น้ำลายไหล                                      ซอยหัวจักไค   ใส่เหียสักหน้อย

ปล๋าก่อ ปล๋าต๋อง   ปล๋าเพี้ย บอกสร้อย                       มาผ่อ มากอย    ปี่น้อง

            บ้านใกล้บ้านไกล๋   บ้านในบ้านล้อง                มาเลือกซื้อได้   เนอนาย

เป๋นปล๋าจากกว๊าน     ผมเอามาขาย                            ซาวบาทบ่ดาย  สิบบาทก็ได้

เจิญมาซื้อหา              อาว อา ตี่ไหว้                            ขะใจ๋เร็วไว   เน้อครับ

            ปล๋าของจำเริญ  ผมขอรองรับ                         กิ๋นกับคาบเข้า   งายแลง

ปล๋าจ่อมปล๋าฮ้า       ใส่ต้มใส่แก๋ง                               น้ำพริกต๋าแดง   กาแป๋งกับแกล้ม

ปล๋าทูเก็มมัน              ปิ้งจ่าวขั้วแห้ม                           สาบหอมกิ๋นลำ   บ่น้อย

            ส่วนไข่ปล๋าดอง   ใส่ต๋องเรียบร้อย                   ห่อหมกยกตั้ง    บนไฟ

ปล๋าส้มปี่น้อง      ตึงใกล้และไกล๋                                ขอเจิญซื้อไป    ไว้กิ๋นกับเข้า

กำกิ๋นลูกหลาน           กำกิ๋นคนเถ้า                             เมืองเหนือไทยเฮา  เดี๋ยวนี้

            ขอเจิญ ขอเจิญ    ป่อเริญกล่าวจี๊                     มีพร้อมอยู่หนี้   เนอเฮา

มาจากหล่ายกว๊าน  จาวบ้านสันเขา                            จังหวัดพะเยา    ปล๋าฮ้าปล๋าส้ม

กิ๋นกับเข้าหุง           เข้าหนึ้ง เข้าต้ม                             ก็ตึงลำดี   แต๊และ

            วันนี้จำเริญ      ผมได้มาแวะ                            ขายหื้อต่านเจ้า  อาว อา

มาเต๊อะ มาเต๊อะ   เจิญมาซื้อปล๋า                               ส่วนว่าราคา  ก็ถูกเสี้ยงถ้าน

ถุงสิบ ถุงซาว           ปี่น้องจาวบ้าน                             ขอเจิญมาดู    ผ่อเต๊อะ

            ปล๋าเก็มปล๋าเกลือ  มีเหลือเป่อเลอะ               ปล๋าฮ้าปล๋าส้ม   ทูมัน

ผมได้ไปฮับ         มาจากบ้านสัน                                 เวียงใหม่ตึงวัน   หล่ายกว๊านเนอเจ้า

ซื้อไปหื้อหลาน        หื้อลูกกับเข้า                                 เอาฝากอาวอา    ญาติมิตร

            ฝากเปื่อน ฝากฝูง   มีอยู่ทั่วทิศ                        กำกิ๋นปื๊นบ้าน  ล้านนา

มาเต๊อะ มาเต๊อะ     เจิญมาซื้อปล๋า                             รถโฆษณา    ผมมาอยู่หนี้ …ๆ