ค่าว คนหมะเก่าเล่าทายไว้ ๒
๑๑/๐๑/๒๕๕๗
**********
ค่าว คนหมะเก่าเล่าทายไว้ ๒
คนหมะเก่า เล่าขานบอกไว้ เมินนานนับได้ หลายพันขวบปี๋
กำทายมีนัก ตั๊กแม่นดีหลี วันหน้าจะมี อย่างอี้แม่นมั่น
ตั๋วหนานจะขอ เล่าปอสั้นสั้น เต้าตี้สัมพันธ์ หันพบ
ตุ๊สามพรรษา คนมาเคารพ นบขาบยกตั้ง "ครูบา"
ละฮีตเก่ากั๋น ไผมันเต๊อะหนา คนเสื่อมศรัทธา วัดวาตุ๊เจ้า
พ่องบวชเจ็ดวัน ปั๋นปอนแตนข้าว ก๋างตำฮาเอา เขินเคอะ
สิกมาฮ้องหนาน อ้างก๋ารป่าเลอะ คัมภีร์บ่อท่อง เลยนา
ตุ๊เณรเถรชี จักมีปัญหา นอกวัดในวา ก๋ามาฮ่วมห้อง
ญิงหม้าย,ร้างหนอ ชอบพอเกี่ยวข้อง มีใจ๋ปรองดอง ผองจู๊
จายฮักจายหนอ ญิงคลอคนปู๊ ศิษย์ครูอยู่ใต้ จายคา
คนอายุน้อย ซาวสามสิบหนา จะเป๋นป้อตา ลุงป้าคนได้
ป้อจายแต่งตั๋ว น่าหัวแต้ใบ้ นุ่งก่าเต่วใน หละริก
หลายคนตาปาก แดงหยั่งสีพริก สุกปลั่งนั่งถ้า เวลา
แม่ญิงมาฮ้อง เคาะห้องถามหา แอบอิงก๋ายา ลู่หากั๋นได้
ฮยะนาหลายหน ฝนเหนือฝนใต้ เดือนสี่ห้าไป น้ำล้น
นักปราชญ์แสวง แสดงตั๋วค้น ตั๊กกิ๋นสินบน จุไท
คนจะหูติ๊พย์ ต๋าติ๊พย์สดใส ผ่อหันกั๋นไว อยู่ปล๋ายนิ้วน้อย
ของแปลกแหกต๋า ปู่จากล่าวถ้อย จุดเทียนธูปลอย เต๋มล้น
ส่วนตั๋วปี้หนาน บอกขานเล่าค้น คงบ่อได้ต้อง กล่าวลา
กำทายหมะเก่า เพียงเล่าอู้จ๋า พักก่อนเต๊อะนา มาแถมรอบได้ ๆ
ความเห็น (4)
...ขอบคุณค่ะ ....
ขอบคุณค่ะ ที่นำมาแบ่งปันให้ได้เรียนรู้
ขอขอบคุณกัลยาณมิตรทุกท่านที่ให้กำลังใจและที่เข้ามาอ่านทุกท่านมากครับ
 พิชชา
|
 Dr. Ple
|
 บุษยมาศ
|
 อัญชัญ ครุฑแก้ว
|
 อร วรรณดา
|
ขอบคุณ อาจารย์หมอเปิ้ล และคุณครูอร วรรณดาด้วยนะครับ ที่กรุณาและให้เกียรติตลอดมา