ค่าว ดวงเมือง-ดวงคน
๔/๐๑/๒๕๕๗
*************
ค่าว ดวงเมือง-ดวงคน
ขอไหว้สา วันทาปี้น๊อง ทุกโขงเขตห้อง โกทูโนกั๋น
ดวงเมืองปี๋นี้ มีความคับขัน สิ่งตี้สำคัญ หันก่าคนห้าว
มุขมนตรี พระสงฆ์องค์เจ้า บุคคลเขาเฮา รวมพรรค
ตี้ทำก๋ารเมือง สับสนยิ่งนัก จักเกิดแตกแยก จิ้ตตา
เกิดเป๋นกลียุค ทุกแห่งหนหนา ข้าวยากจากนา จิ๊นปล๋าก่อกั้น
ผู้นำนายหัว กลั๋วอายุสั้น ป่วยต๋ายเร็วพลัน กั๋นนัก
ขุนนางกังฉิน จักหมิ่นสำนัก รวมพรรคพวกเบ่ง บีฑา
ปาเสียชีวิต คิดฆ่ากั๋นหนา ทั้งก๋ารรบรา วัดวาบ่อใกล้
ตึงมีดตึงปื๋น บ่ออาจฝืนได้ จั๊กออกเหนี่ยวไก ป๋าทะ
พ่องก็คิดแป๋ง ระเบิดชีวะ ขว้างโบ๊ะขว้างบ๊ะ กั๋นไง
ตี้หลวงแถมแล้ว รถราชอยู่ไหน ปากั๋นสุมไฟ เปลี่ยนใหม่บ่อน้อย
ภาคใต้จะมี๋ วิถีต่ำต้อย เชือดฆ่าคนด้อย อาวุธ
ปากั๋นมาต๋าย หลากหลายหน่วยชุด ต่างชาติเร่งรุด เข้ามา
มาเกลี่ยมากลบ สยบปัญหา สหประชาชาติ อาจเข้ามาได้
เศรษฐกิจถอย เงินลอยสูงใบ้ เงินเฟ้อเงินใบ หลายนัก
น้ำมันบ่อมี๋ เกิดผีขี้ลัก ขี้จกฉกเหี้ยน เตี้ยนมา
ภาวะแบบนี้ เกิดทั่วกั๋นหนา อเมริกา หรือว่าไทยได้
สงครามกล๋างเมือง ทั้งเหนือทั้งใต้ ตะวันออกไกล ใหญ่นัก
เครื่องบินเหิรฟ้า นานาจะหัก ปักต๊กสู่ปื้น คงคา
สงครามนิวเคลียร์ จักเกิดแถมหนา ทั่วโลกลือชา หาไผคุมได้
ฟังแล้วน่ากลั๋ว อยากหัวแต๊ใบ้ แต่ความเป๋นไป มีนัก
เพราะขาดศรัทธา คนว่าคนตั๊ก ตี้พักพึ่งฮ่ม ไทรงาม
ปากั๋นเสื่อมทรุด ขาดความเกร๋งขาม องค์กษัตริย์นาม "พ่อหลวง" เฮาได้
ขาดความเคารพ นพขาบน้อมไหว้ พระศาสดาใน ใจ๋นี๊
อีกทั้งก๋ายา วาจ๋ากล่าวจี้ ใจ๋มุ่งสร้างหนี้ กั๋มมา
ทานศีลหื้อไว้ บ่อใส่ใจ๋หนา อีกภาวนา หาไผทำได้
หน้ามืดกั๋นหนา ถ่างต๋าไกล๋ใกล้ โลภโกรธหลงไว ใหญ่นัก
ปากั๋นมั่วสุม หลายกลุ่มพร้อมพรัก อาวุธปื๋นมีด ควักมา
คิดว่าถูกแล้ว บ่อแคล้วดอกหนา ความต๋ายโตยมา น้ำต๋านองไห้
ปี๋ม้าสุขี บ่อดีก๋ายใกล้ มีดปื๋นหอกไฟ ปี้น๊อง
หันหน้าเข้าหา ธรรมานำก๊อง ยึดถือสู่ห้อง จิ้ตตา
ฮักษาใจ๋ไว้ ทั่วไทยเถิดหนา ความชั่วนำมา ซึ่งปัญหาได้
สติอย่าหลง ลงกล๋างไปใต้ วัดวาภายใน ใจ๋นี๊
จะฮยะสิ่งไหน กวรฟังกำจี๊ บอกถ้อยกุณตี่ ดีงาม
ป้อแม่สอนไว้ จงได้ติดต๋าม อย่าหันเลวทราม เหยียดหยามต่านได้
กำจ่มกำด่า ดีกว่ากำใบ้ บ่อม่วนหูใคร เกิดตุ๊กข์
แต่เป๋นกำปอน ดีกว่านอนคุก ฮย้อนว่าตั๋วได้ ฆ่ามา
กตัญญูนี้ แสนดีนักหนา ตอบแทนกั๋นมา ปากั๋นเปิ่งได้
สถานศึกษา วัดวาอย่าใบ้ จ่วยเหลือกันไป แต่นี้
องค์กษัตร๋า ศาสดากล่าวจี๊ บ่อดีลืมได้ เนอนาย
ตั้งต๋นดีไว้ ก่อนตี้จะสาย ถึงกำทำนาย เดือดหลายผ่านได้
ขอบุญฮักษา เทวาไกล๋ใกล้ อำนวยอวยชัย หื้อครบ
ผู้อ่านค่าวมา ขอดวงจงพบ ประสพสิ่งตี้ ดีนา
จงสุขก๋ายา เล่ามาเต้าอี้ เท่านี้สู่กั๋นฟัง ก่อนแลนายเหย.
ที่มาของดวง
http://www.matichon.co.th/news_detail.php?newsid=1388544368&grpid=01&catid=&subcatid=
หมายเหตุ เตี้ยน หรือ ก้าน หมายถึง ลักษณะการออกไปใช้ไฟส่องหาสัตว์ตามทุ่งนาป่าเขาเพื่อนำมาทำอาหาร ในที่นี้หมายถึง การใช้ไฟส่องเอาน้ำมันหรือสิ่งของโดยการลักขโมยมาในเวลากลางคืน
ความเห็น (4)
ขอบคุณค่ะ .. "ค่าว ดวงเมือง-ดวงคน" ... บันทึกดีดีนี้ค่ะ
ขอขอบคุณ คุณครู อาจารย์ สมาชิกในโกทูโนว์และผู้อ่านที่ให้กำลังทุกท่านมากครับ
ขอบุญฮักษาเหมือนกันเจ้า ^^
ขอบคุณอ.พิชชามากนะครับ...ที่นำดอกไม้สวยๆ มาอวยพรปีใหม่ให้...ขอให้อาจารย์มีความสุขตลอดปีนี้เช่นกันครับ