สิบหกค่ำเสาร์ เมาเห็ดวันนั้น หลับฝันอยู่หั้น ตั๊ดฮิมคอกหมู จักไขเล่าเก๊า แม่นบ่เข้าหู ว่าหมาอยู่ฮู ปู๋กิ๋นเข้าต้ม จักจิ้มเอาเสือ มาแป๋งจิ๊นส้ม จักก่าอู้ลม โห่ซ้าว ป๋าดุกป๋าหลิม ขบกิ๋นก้านก๊าว ป๋าขาวสิกเหล้น จุ่งจา หอยแครงอี่แง็บ นั่งละหว่างขา มดง่ามอำลา หนีละน้ำอ้อย กบไปซื้อแหวน มาแขวนนิ้วก้อย เป๋นต๋าดีกอย ผ่อล้ำ ไก่สาดาปอย หิงห้อยจ่วยก๊ำ สนุกม่วนเหล้น เนืองนัน นิมนต์เอาม้า มาฮับตานกั๋ณฑ์ ห่านเป๋นตุ่มคัน เป็ดเป๋นฝีก้น หมีแต่งงานแมว บอกแหลวและอ้น ขันหมากนันมา ทึดทึด ขี้คู้ ขี้เดือน เหื่อปังบึ๊ดบึ๊ด เฝ้าไหหนึ้งเข้า สาลี อี่วอกขี่จ๊าง เซาะขุดกิ๋นปี๋ แบ้วบ่างนางนี ไปแอ่วกาดหมั้ว ควายแม่หำยาน กานกิ๋นเข้าขั้ว ฮิปโป้กับงัว เหล้นจู๊ หนูลักกิ๋นเสา กล้ากิ๋นขะตู๊ หมูลักกิ๋นเหล้า บนจาน อี่แก้วบ้านแพระ สิกมาเป๋นหนาน ไก่ปู๊โจงมาน ปู้ดออกตางข้าง แป๊ะป่ออุ๊ยหลอ เป๋นว้อกระด้าง ก๋ากับนกยาง แอ่นฟ้อน หนูนาต๊องขาว เปี๋ยได้ไม้ค้อน บุบหมาแม่โก้ง ดำมอย ป๋าแก๋ดเจ็บต๊อง ฮ้องป๋าอี่หลอย ป๋าเอี่ยนอยู่ดอย ป๋าฝานั่งไห้ ป๋าซิวจ็บหู งูยกมือไหว้ นกจอกไอดัง โค้งโค้ง หม้อหนึ้งเตะไห เต๋าไฟปอโล้ง หม้อแก๋งนั่งก้ม แยงเงา หม้อขางกับจ๊อน ลับหล่ายเก๊าเสา หมอนหนุนหัวเฮา เป๋นเขาก้องหง้อง อี่ฮวกนอนเตียง แมงเหงี่ยงก๋างจ้อง แย้เต้นตวยกอง ฟ้อนเงี้ยว ไม้ซางกุดป๋าย เอาจ๊างมาเกี๊ยว เยียะแป๋งปากเบี้ยว ดีจัง อึ่งแอ้วขี่รถ ลิ่น แลนซ้อนหลัง ค้อนคากคันดัง หมากี๊ต๋ำเข้า ฝนซ้ำบ่ตก กบถามจ๊างเถ้า ว่าเป๋นใดจา ปี๋นี้ จ๊างเถ้าไขจ๋า วาตากล่าวจี๊ เพราะเหตุก๋ำบี้ เตะลา หื้อไปหาน้อย สิกกล๋างวะสา ส่งเคราะห์นารา วันตกแจ่งใต้ หื้อเอาน้ำปู๋ แป๋งยาแก้ไข้ ขั้วถั่วแก้ไอ พร่องเต๊อะ แมงวันเจ็บตี๋น เตะถังขี้เฮอะ จี้กุ่งฮ่ำไห้ โวยวาย เขียดออหน้าแล้ง แฮ้งหลับลุกขวาย ปลวกกิ๋นสะตาย งัวควายเบื่อหย้า จ่อนกิ๋นต๋ำเตา กับหม่าเขือบ้า มีหลายนัยยา ปี่น้อง ปล๋าแห้งสลิด วิดลงบวกล้อง หมูฮ้องตื่นขึ้น ตันควัน ขอจบค่าวจ๊อย เล่าถ้อยกำฝัน ขอจะไปนัน เล่าสู่กั๋นเหล้น…ๆ
