ปี๋ใหม่เมือง
ยอมือสาธุ์ วันทาไตรรัตน์ ครุอุปัช ฌายะอาจ๋ารย์
อันตั๋วม่อนนี้ จักจี๊ไขขาน เล่าเถิงตำนาน สงกรานต์แบบเบ้า
ขอวอนสัตถา ครูอาจ๋ารย์เจ้า มาดลหื้อเฮา เปล่งยัวะ
แต่งสร้อยถ้อยคำ หื้องามวาต๊ะ อ่านระรื่นอั้น ฟังเมา
สงกรานต์คำเน้น มันเป๋นคำเขา บ่ใช่คำเฮา เนอสาวหนุ่มหน้อย
เฮาฮ้องสังขานต์ เป๋นล้านนาถ้อย เมินไกล๋จอยวอย แต่เก๊า
วันที่สิบสาม วันงามแต๊เล้า เมษาฮอดเข้า มาเติง
สังขานต์ล่องไซร้ ปี๋ใหม่มาเถิง ก่อนฟ้าจักเมิง นันเนิงทั่วห้อง
สินาดต๋ามโต๋ม บอกถบกึกก้อง เสียงสนั่นกอง นาล้าน
ส่งสังขานต์ ล่องไปต๋ามนั้น ความเชื่อชาวบ้าน ล้านนา
แจ้งมาก็จัด ปัดกวาดเคหา อาวาสวัดวา สาธารณ์เฮือนเหย้า
ซักผ้าซักครัว ดำหัวสระเกล้า ฮีตของหมู่เฮา เก่าเนิ้น
สิบสี่เมษา วันดาบ่เคิ้น วันเน่าพ่องเอิ้น วันเนา
อันวันเน่านี้ บ่ดีด่าเขา มีหยังอดเอา ด่าเขาเน่าจู้
อันว่าวันเนา หื้อเนาจุ้ผู้ อยู่บ้านดาครัว ไปวัด
กุศโลบาย ใช่ได้แม่นตั๊ด หัดเด็กอ่อนหน้อย เยาว์วัย
ขนทรายเข้าวัด บ่นัดบ่หมาย หลายคนญิงจาย เรียงรายเป๋นเส้น
ม่วนงันแต๊หนอ หยอกล้อกั๋นเล่น ตั้งบ่ายฮอดเย็น เล่นน้ำ
สิบห้าเมษา ผญาวันก๊ำ ไปวัดชุก้ำ ชุปาย
ยอตานสำรับ กับข้าวถวาย ตานเจ๋ดีย์ทราย ปักหมายตุงหน้อย
ไหว้พระฮับศีล น้อมจินต์เอ่ยถ้อย ยอคุณบาทฮอย พุทธะ
พ่อน้อยพ่อหนาน ลูกหลานบ่ละ อุ๊ยปู่ย่าป้า ต๋ายาย
ตานขันข้าวเจ๊า เต้าฮอดจ๋นขวาย ลูกหลานนั่งยาย ไหว้สาธุ์แวดเฝ้า
ดำหัวครูบา อาจ๋ารย์คนเฒ่า พระเจ้าพระธัมม์ สังฆะ
เพื่อหื้อสุขขี มีมังคละ แต่นี่ไปหน้า สบาย
สิบหกเมษนั้น สำคัญมั่นหมาย ปากปี๋เนอนาย หมายสงเคราะห์บ้าน
แป๋งสะตวงหลวง ส่งตวงสี่ด้าน ใต้ตกออกลาน อุตระ
ลางที่ก็มี พิธีสังฆะ ศิระน้อมไหว้ หมายตาน
ลางที่นั้นเล้า เอาก้าปู่จ๋ารย์ มายอเวนตาน ครือกั๋นเจ้าข้า
นับแต่สิบสาม สิบสี่สิบห้า สิบหกเมษมาส์ ม่วนล้ำ
หน้าฮ้อนเมษา ต้องมาเล่นน้ำ ต๋ามฮีตแห่งห้อง ล้านนา
ปี๋ใหม่เมืองนั้น ช่วยกั๋นฮักษา สืบฮีตฮอยมา ฮักษาหื้อได้
อันเหล้าสุรา ยะหื้อบ้าใบ้ หื้อได้ระวัง ระมัด
กิ๋นล้ำผะหญา เสียสารพัด คนวัดคนบ้าน ห่อนเกรง
เอาเนื้อนักนัก น้ำมักโหลงเหลง ฮีตจักวังเวง ย้อนนักเลงเหล้า
จักอู้ไปหลาย ก็อายเนอเจ้า ม่อนข้านี้เบา ปั๋ญญะ
ผิดพลาดตั๊ดไหน ขอไหว้วันต๊ะ อภัยหื้อข้า “เครือออน”
ขอหื้อท่านไท้ ที่ได้อ่านกล๋อน ลุโลกอุดร ถาวรก้าวหน้า
วันนี้ขอจ๋อร ไปก่อนเจ้าข้า ม่อนน้อยขอลา ก่อนครับ
"เครือออน”คนไกล๋ บ่ได้ลาลับ อาจกลับมาอู้ มาไจ
จบค่าวซอใย ไว้เพียงเท่าอี้ เท่านี้ขอวางลง ก่อนแลนายเหย.
ความเห็น (14)
กราบสวัสดีค่ะ
มากราบขอพรค่ะ
เนื่องในวันตรุษสงหรานต์ปีนี้
ระลึกถึงเสมอ สุขภาพร่างกายแข็งแรงดีนะคะ
ขอให้อำนาจคุณพระศรีรัตนตรัย
จงปกปักรักษาให้อาจารย์
และครอบครว มีแต่ความสุขสบายทั้งกายใจ
มีอายุยืน และเจริญในธรรมยิ่งๆขึ้นไปค่ะ
- สวัสดีปี๋ใหม่เมืองครับ
- มาถึงแห่มแล้ว วันดีปี๋ใหม่ จุ้มอ๊กเย็นใจ๋ บุญกิ๋นตาน อยู่ดีกิ๋นลำ ตึงของส้มของหวาน จุ้มจื้นเจยบาน สงกรานต์ม่วนล้ำ
- มาแอ่วมากอยหา ด้วยความระลึกถึงครับ
กราบสวัสดีปี๋ใหม่เมืองเจ้าพ่อครู ทนัน
สบายดีกะเจ้า ละอ่อนห่างหายด้วยภารกิจงาน
มาส่งความระลึกถึง หื้อพ่อครูสุขภาพแข็งแฮงเจ้า
เหมือนเช่นเดียวกั๋น ขอท่านจุ่งได้ สิริพรชัย พร้อมพรัก
จักอยู่หนไหน ใคร๋ใคร๋ก็รัก สมัครโอบเอื้อ อารี
สุขะพละ วรรณะผ่องศรี โภคะมากมี ทีฆายุมั่น.
มีพละก๋าย จิตใจ๋ผ่องแผ้ว วัยยะหนุ่มแลว ฟื้นปิ๊ก
ขอหื้อสุขสันต์ ทุกวันทุกวิค สมาชิกโอบเอื้อ อารี
สุขะพละ วรรณะเปล่งศรี โภคะมากมี ทีฆายุมั่น.
ปี๋ใหม่ล่วงลุ อายุวัสสา สติปัญญา ทีฆาสืบไสร้
ปราบหมู่เปร๋ต๋า โรคาบ่ใกล้ รัตนตรัย ปกป้อง
อยู่ม่วนสำราญ ชื่อเสียงกึกก้อง เหมือนเทศน์ทำนอง เวสสันดร์
เครือออนนาฏน้อง สันติ์ซร้องสุขศานติ์ ครอบครัวเจยบาน เวียกก๋ารโล่งข้อ
เวียกก๋ารโล่งข้อ...........
จากปี่อ้าย ....สามปอย...และหมู่จุมปี้น้อง
ผู้มีผะหญา ปั๋ญญาแก่กล้า ได้ปิ๊กคืนมา เขียนบล็อก
ข้านี้ดีใจ๋ เหมือนได้หวยล็อก ขอบอกหื้ออ้าย จุ่งฟัง
ขอหื้อพี่ไท้ จุ่งได้สมหวัง ปิ๊กมาโด่งดัง แถมครั้งเน่ออ้าย.
เวลากาละ ล่วงละหวนหลัง ใช่ว่าโด่งดัง แต่หวังสืบถ้อย
กึ้ดฮอดได้ทำ ผลงานเรียบร้อย วรรณก๋รรมย้อนฮอย ก่อนนั้น
อำเภอตั้งใจ๋ เยื่อใยอย่างนั้น สุดท้ายปิดกั้น เฮาไป
หยังมาต่ำก๊อย น้อยอ๊กหมองใจ๋ กึ๊ดสังอันใด ตั๋นใจ๋หมดเสี้ยง
ตั๋นใจ๋หมดเสี้ยง
สวัสดีค่ะ
สบายดีนะคะ ทางเหนือฝนตกไหมคะ
สูมาเต๊อะครับ คำนับไหว้สาธุ์ ม่อนขอสูมา ตอบช้าไปหน้อย
เนื่องจากก๋ารงาน มันมาจ่องห้อย บ่ได้มากอย บล็อกนี้
"ย้อนฮีตฮอยหลัง" มันพังม่องซี้ บ่มีใผจี้ จัดงาน
ตั้งเก๊าใหม่เต๊อะ เป่อเลอะอาจ๋ารย์ เฮาค่อยจัดงาน หลังวันเลือกตั้ง.
สวัสดีเจ้าค่ะพ่อครูทนัน
พ่อครูซำบายดีเน้อ มาอ่านค่าว หื้อร้อยซาวห้าเลยรึเจ้า
เพิ่งอิ่ม เที่ยง แอ๊บปลา กับคุณป้าวัยแปดสิบกว่า ลำแต้ๆค่ะ
เดือนหน้าปูคาดว่าจะพาแขกไปแม่อายเน้อเจ้า สุขสันต์วันนี้ค่ะ
สวัสดีครับ คำนับไหว้สาธุ์ คุณPooเพิ่นมา อู้จ๋าข้าเจ้า
กล๋างวันนี้หนา แอ็บปล๋ากับข้าว กิ๋นพร้อมกับยาย ลำแท้
ส่วนผมนี้หนอ บ่มีข้อแม้ น้ำพริกตั๋วแด้ หน่อซาง
หากไปแอ่วแต๊ แม่อายเมืองฝาง ของนางแวะจร แม่ออนสักหน้อย.