เดือนอ้าย 

                                             ตกฤดูเดือนอ้ายสายลมมาหนาหน่วง

                                     เดือนนี้ตกหว่างช่วงสังโฆเจ้าเพิ่นเข้ากรรม

                                     เฮามาพากันทำบุญตักบาตร

                                     ปริวาสส่อยอยู่ชูค้ำศาสนา

 

เดือนยี่

                                           ฮอดเดือนสองอย่าช้าข้าวใหม่ปลามัน

                                   ให้เฮามาโฮมกันแต่งบูญประทานข้าว

                                   เชิญให้มาโฮมเต้าอย่าพากันขี้ถี่

                                   บุญคูณลานตั้งแต่กี้มาก่อนให้รักษา

 

                                                 เดือนสาม

                                       ฮอดเดือนสามปลอดโปร่งสดใส

                                ไปทางได๋เห็นแต่คนใจบุญสั่วแซวเต็มคุ้ม

                                เหลียวเห็นซุมสาวน้อยพากันปั้นข้าวจี่

                                เฮือนละสี่ห้าปั้นพอได้ดอกใส่บุญ

                                ผองกะบีบข้าวปุ้นตกแต่งอาหาร

                               มีเทิงหวานเทิงคาวหนุ่มสาวมาโฮมต้อน

 

เดือนสี่

                                       ตกฤดูเดือนห้าสายลมบ่มาผ่าน

                                เห็นดอกจานเพิ่นแย้มบานเย้ยถ่าถ่งนา

                               เดือนนี้บ่ได้ช้าปีใหม่มาเถิง

                              ให้พากันทำบุญปล่อยปลาลงน่าม

                              เต่าสิถามหาพุ่นคนใจบุญสิมาปล่อย

                              นกสิงอยหง่าไม้คอยถ่าตั้งแต่ฝน

                              เดือนนี้ม่วนจ้นๆคนกะหลั่งมาหลาย

                             หาเอาทรายมากองก่อเจดีย์ไว้

               

 

เดือนหก

                                    ฮอดเดือนหก เสียงฟ้าไขประตู ฮ้องบอกข่าวเมืองคน

                           มีแต่ฝนกับลมส่งเสียงกึกก้อง

                           สายตามองเห็นแล้วในใจกะหากม่วน

                           เขียดอีโม่ลำเกี้ยวใส่ผู้สาว

                          เห็นปลาขาวปลานินสิ่วปลานิลปลากะเดิด

                          แล่นหยอกล้อกันเล่นหลากหลาย

                         เดือนนี้เบิ๊ดโทษฮ่ายบ่มีเรื่องเลอหลัง

                         อัสดงดวงอาทิตย์ลับลงปลายไม้

                         เห็นแต่สีใสเน้นวันเพ็ญสิบห้าค่ำ

                         วิสาขาเลิศล้ำชาวบ้านบ่อยู่เฉย

                         ไผกะยิ้มเป้ยๆลงวัดเวียนเทียน

                          เดือนได้เวียนมาเถิงนพคุณคองเค้า

 

เดือนเจ็ด

                                      เดือนเจ็ดเผาควมฮ่ายอันตรายบ่มาผ่าน

                             นิมนต์พระขึ้นบ้านเล็งเป้าเข้าใส่ธรรม

                              บุญสิมาส่อยค้ำชูส่งราศี

                              บารมีผลทานสิไล่มารเลยพ้น

                              ตั้งแต่ดนเฮาได้ยินแต่ปางก่อนบุญชำฮะสละความ

                              เดือนฮ่อนเมืองบ้านสิสุ่มเย็น

 

เดือนแปด

                                         จันทร์เพ็ญแจ้งทอแสงใสสง่า

                               เดือนแปดมาฮอดแล้วสิแววขึ้นลื่นหลัง

                             เดือนนี้สงฆ์เพิ่นยั้งเข้าอยู่จำพรรษา

                             ภาวนาอบรมข่มใจสู่แลงเช้า

                            เฮามาพากันทำบุญพ้อมผ่ำ

                           ถวายผ้าอาบน่ามให้ญาท่านเพิ่นใช้สอย

                         เดือนแปดคล้อยเห็นลมถั่งใบเสียว

                          เหลียวเห็นฝูงปลาขาวแล่นลงโฮมต้อน

                          กบเพิ่นนอนคอยถ่าฝนมาสิได้ม่วน

                          ลงแล่นน่ามโฮฮ้องซั่วแซว

 

เดือนเก้า

                                    เดือนเก้ามาฮอดแล้วบ้านป่าขาดอน

                            เห็นนกเขางอยคอนส่งเสียงหาชู้

                            เถิงฤดูเดือนเก้าอีสานเฮาท้องถิ่น

                           คงสิเคยได้ยินประดับดินกินก้อนทานทอดน้อมถวาย

                          พ้นจากมารหยาบฮ่ายพากันอยู่เป็นสุข

                         บ่มีโพยภัยทุกข์ผ่านกลายมาใกล้

                        มีแต่ใสสดชื่นคืนวันแสนม่วน

                        ต่างกะชวนพี่น้องลงเต้าแต่งทาน

 

เดือนสิบ

                                ขวงเขตบ้านย่านป่านาหวาย

                         กลายมาเถิงเดือนสิบสิก่นมันมาต้ม

                        ผ่องกะงมกอข้าวหาเทากำลังอ่อน

                       ผ่องกะคอนตาน้อยลงห้วยห่อมนา

                       เดือนนี้บ่ได้ช้าตกแต่งทานถง

                     ข้าวสากลงไปวัดให้หมู่สังโฆเจ้า

                      มีลาบเทาพร้อมกับหมกดักแด้ของดีคั่วจุ๊ดจี่

                   ซุปหมากมี้กะมาพร้อมพำกัน

 

เดือนสิบเอ็ด

                                 เดือนสิบเอ็ดว่านั่นหัวลมอ่วยเชยหนาว

                       ช่วงผู้สาวผิวลายฝ่ายชายสิผิวเกลี้ยง

                      ได้ยินเสียงลมต้องก๊กสำสาอยู่เวินเวิน

                      หมาจอกเอิ้นสั่งชู้กะปูม่นแต่ฝั่งหนอง

                     นกแจนแวนออกฮ้องหาคู่ผสมพันธุ์

                     ควายบักเถิ๊กตกมันแล่นซนแต่ตอพร้าว

                     ฝูงปลาขาวลงโฮมต้อนผู้สาวขี้คร้านตื่น

                     ปลาดุกบื่นค่อนสิแจ้งหันหน้าเข้าใส่หลุม

                     ฟังเสียงฟ้าฮ้องตุ้มเอิ้นสั่งฤดูฝน

                    ฝูงหมู่คนลงเลาะถ่งนาปลาบ้อน

                    เดิ๊กออนซอนจันทร์แจ้งทอแสงใส่สง่า

                    ออกพรรษาห่อข้าวต้มลมล่อแต่หมู่ปลา

                   บัดนี้แล้ววัดสิเป็นกำพร้าบ่มีพระสิมานอน

                   มาออนซอนทายกไล่แต่งัวเข้ามาเลี้ยง

                  ได้ยินเสียงกลองโย่นวันเพ็ญสิบห้าค่ำ

                  พระสิลาแม่ออกค้ำไตรมาสสิสั่งลา

 

เดือนสิบสอง

                               เหลียวขึ้นเบิ่งท้องฟ้าเห็นแต่ว่าวเดือนสิบสอง

                     ลมคะนองเชยพัดหง่ายกะเลยม้วน

                     เห็นสมควรหาผ้ากฐินมาทานทอดถวาย

                    ตลอดเดือนหนึ่งพุ่นหาได้ดั่งประสงค์

                  หลวงปู่คงไปหาผ้าหลวงตาดีหาน่ามครั่ง

                   หลวงปู่สอนนั่งสอดด้ายขัวซ้ายเข้าส่อยกัน

                  เดี๋ยวนี้ตกหว่างบั้นโลกมันเปลี่ยนเวียนหัว

                   ปัจจุบันโยมเลยเป็นคนเฮ็ดแห่แหนแพนกั้น

                ต่างกะหวังเต็มที่เอาควมดีบ่ดูหมิ่น

                 บุญกฐินส่อยค้ำมานทอดให้หมู่สงฆ์

 

                    ได้จากหลวงปู่ วัดพระธาตุนารายณ์เจงเวง