โบราณ

คำสอนผัวเมีย***********
ผัวเมียนี้กูมึงอย่าได้ว่า ข่อยและเจ้าถึงเฒ่าซั่วซีวัง ผัวเมียนี้กูมึงอย่าได้ว่า อย่าได้เถียงด่าป้อยคำส้มจ่มบ่อเซา  ให้ค่อยปากค่อยเว้าเช้าค่ำทำเพียร  พากันเป็นเฮือนซานอยู่ซำบายหายอ้อน  เอากันแล้วให้ซ่อยพากันสร้าง ถางนาขุดก่น อย่าเป็นคนขี่ค้านเห็นใกล้หม่อมือ  เมียนั้นอย่าเป็นคนขี่ดื้อเว้าบ่อม่วนกวนผัว  เมียนั้นพอปานจัวผัวนั้นพอปานพระให้พร่ำเพียรผัวแก้ว  เอากันแล้วให้ค่อยพากันสร้างถางนากล้าหว่าน เฮ็ดลงไปอย่าค้านแฮงหน่อยให้ซ่อยกัน
 
เมียนั้นให้ต่ำหัวเข้าฮาง ให้ตำหัวเข้าฮ่าน  อย่าหาญกล้ากล่าวสูง   ผู้ใหญ่ให้เอิ้นลุงผุ้สุงให้เอิ้นป้า อาวอาอย่าดูหมิ่น
 
 
เถิงยามนอนเมียอย่าปีนผัวขึ้นเมียเทิงเกินไหร่  หลับลงนอนใกล้ๆเทียมข้างผ่างผัว  ตั้งตัวพากันสร้างผัวซ่างให้เมียหยิบ  ผัวแก้วเมียทิพย์ท่อพาพายนำก้น  ความอดจนสิบ่อมีมาใกล้ผัวไปให้เมียแล่น ผัวแก้วเมียแหวนให้เจ้าจำจื่อไว้ไปหน้าสิมั่งมี
 
 ****************
ผู้ใหญ่เสถียร พงษ์ศาสตร์ ม.11 บ้านค้อชา ต.บึงงาม อ.ทุ่งเขาหลวง/วัชรินทร์  รายงาน