ผีเข้า

VD
  ผีมีแต๊ก่? .. ผี มีจริงหรือไม่?  

ตั๋วข้าเจ้านั่งทำงานหน้าคอมฯ อยู่ทุกวี่ทุกวัน ออนไลน์ไข้หัวคิกๆ กับเพื่อนตี้นั่งอยู่หน้าจอตี้อเมริกาพ่อง ญี่ปุ่นพ่อง วันตี้ญี่ปุ่นแผ่นดินไหว ทีวียังรายงานจ้ากว่าข้าเจ้าเลย เพราะคุยกันสดๆ ฮ้อนๆ กับคนที่กำลังจะก้มลงหลบใต้โต๊ะคอมพ์ที่ญี่ปุ่นปู๊น

โลกยุคนี้พัฒนาไปไหนต่อไหน หลายๆ อย่างเกือบกู่บ่ะปิ๊กละ แต่คนแถวบ้านข้าเจ้า ลูกหลานเปิ้นว่า ผีเข้าอี่ป้อเปิ้นตี้ป่วยเป็นอัมพฤกษ์อยู่ฮั่น ถามไถ่กั๋นไปต๋ามประสาคนบ้านใกล้เฮือนเคียงกั๋นว่า อาก๋ารอย่างไดตี้ว่าผีเข้า? ก่อได้ฮับกำตอบมาว่า อาก๋ารข๋องเปิ้นก่คือ กิ๋นนักเกินเหตุ ข้าเจ้าแป๋งแก่นต๋าอย่างต๊กโต หรืออย่างตี้คนไทยเปิ้นว่า ตาโตเท่าไข่ห่านอั้นละหบ๋อ บ่เชิงตกใจ๋เจ้าคิดว่าตื่นใจ๋มากกว่า คือ ตื่นใจ๋เป็นน้อง ตกใจ๋เป๋นปี้ หรื๋อว่า ตกใจน่อยๆ นั่นเองเจ้า อธิบายนักไปจะเมาหั๋วกั๋นเน๊าะ ไอ่เรื่องตกใจ๋กับตื่นใจ๋จ๋นตาใหญ่เต้าต๋าต๊กโต กาว่าตาโตเท่าไข่ห่านเนี่ยะ อิอิ

เข้ามาตี้เรื่องผีเข้าแห๋มกำ ก่อนจะนอกเรื่องนอกราวไปยิ่งกว่านี้ ก่อได้ถ๋ามไปแห๋มว่ากิ๋นนักเกินเหตุนั้นมันอย่างใด บอกน่อยลอ คำตอบก่อคือ กิ๋นข้าวสองสามจาน กิ๋นขนมเส้นแห๋ม น้ำเต้าหู้ตวย คือมีอะหยั๋งกิ๋นได้ก่อเรียบวุธว่าอั้นเน๊าะ กำนี้ก่ออดฮ้องออกมาบะได้ว่าโห กิ๋นได้เกินเหตุแต๊เฮ้ย ถามอี่น้องเปิ้นไปว่า แต๊กาอี่น้อง? และอี่น้องก็ยืนยันนั่งยันว่า แต๊ก่าปี้ แต๊เลยน๊า บ่เจื้อไปลักผ่อตี้บ้านเต๊อะ แบบนี้ถ้าบ่ไจ้ผีเข้าแล้วเป๋นอะหยั๋ง

อาก๋ารแห๋มอย่างของเปิ้นก่อคือต๋าปรือ เอ๊ะๆ อันนี้ไผ๋ๆ ก่เป๋นกั๋นได้เน้อ คนเปิ้นไข้หลับก่อหา? แล้วบ่สบต๋าไผ๋ตวย อืม.. ท่าทางคนเล่าเจื้อจริงจังขะหนาด

เปิ้นปิ๊กกั๋นไปแล้ว ข้าเจ้ายังบ่ฮู้จะเจื้อดีบ่าเจื้อดี แต่ตี้ฮู้ๆ ต่อมาก่อคืออินดูป้อลุงเปิ้นโท๊ะ เดินก่อบ่าได้ละ ยังมาโดนผีเข้าแหม (ถึงบ่าไจ้ผีเข้าก่น่าอินดูอยู่ดีนะ) กิ๋นเข้าไปนักแต๊ะนักว่า สองวัน สามวัน แต่บ่ายอมถ่ายออกมา ก่อทำฮื้อลูกหลานคิดว่าผีเข้าเพราะมันแปลกๆ แต่แปลกๆ แบบนี้ น่าจะปาไปโฮงยาจะดีกว่าเน๊าะ

วันต่อมามีหมอร่างทรงมาไล่ มีพระมาสวด ป้อลุงเปิ้นก่อนอนไหว้พระอยู่ในบ้าน วันต่อมาหมอร่างทรงคนเดิม กี้บมูลีขี้โยมวนใหญ่มารดน้ำมนต์ถึงสามถัง ป้อลุงเปิ้นก่อตั๋วสั่นงันงก เฮ้ออออ จะไดกั๋นหนิ

ซ้ำลูกหลานเปิ้นก่อออกปากไล่ผีอย่างเคียดแค้น แต่พอก๋างคืนก่อปากั๋นกลัวผีต้องนอนกั๋นเป๋นกลุ่มเป๋นก้อน อยู่คนเดียวเดี่ยวๆ บ่อได้กั๋น

ผีมีแต๊กา?

โลกไปถึงไห๋นต่อไห๋นแล้ว ยุคคอมพิวเตอร์แล้วเนี่ยะ ยังมีก๋ารหดน้ำมนต์ไล่ผีเป๋นถังๆ อยู่เลย มันจะมีแต๊กาบ่ะแต๊กาก่บ่ะฮู้ นี่ถ้าบ่าไจ้ผีเข้า ป้อลุงเปิ้นบ่ะฮู้ว่ากึ๊ดอย่างใดในใจ๋เปิ้นเน๊าะ จะอู้ออกมาแต่ละกำก่อยาก จะขัดจะขืนจะไดก่อบ่าได้ ต๋อนนี้ป้อลุงเปิ้นขยับตั๋วบ่าได้ละ ได้แต่กระพริบต๋า แล้วก่ออ้าปากกิ๋นข้าว

ถ้าลูกๆ เปิ้นคิดว่าป้อเปิ้นอาก๋ารแย่ลงเพราะป่วยไข้ยิ่งกว่าเดิม ปาไปโฮงยาเหี๋ย อะหยั๋งๆ จะดีกว่านี้ก่อหา หรือถ้าเปิ้นถูกผีเข้าแต๊ ผีตนนี้มีเหตุผลอะหยั๋งตี้จะต้องมาเข้าคนแก่ตี้ป่วยแบบนี้ตวย? ลูกเปิ้นก่อปักใจ๋เจื้อจริงจังไปตางตี้หมอร่างทรงบอก ฮื้อทำจะอั้น ฮื้อทำจะอี้ ละก่อจ้องจกซะตังค์จ่ายก้าทำฮั่นทำนี่ ทำพิธีรีตองบ่ะไจ้น่อยๆ เน้อ เฮ้อ

ต๋อนนี้ถามตั๋วเอง ว่าในฐานะเพื่อนบ้าน เพื่อนมนุษย์ ข้าเจ้าควรจะทำจะไดดี? ลักกลุ้ม ลักบ่ะม่วนใจ๋อยู่ทุกวันเมื่อต้องผ่านบ้านเปิ้น ไผมีอะหยั๋งจะแนะนำพ่องก่อเจ้าข้า

บันทึกนี้เขียนที่ GotoKnow โดย  ใน ลักยิ้ม

คำสำคัญ (Tags)#ผีเข้า#โฮงยา

หมายเลขบันทึก: 126168, เขียน: 07 Sep 2007 @ 22:31, แก้ไข, 11 Feb 2012 @ 20:17, สัญญาอนุญาต: สงวนสิทธิ์ทุกประการ, ความเห็น: 4, อ่าน: คลิก
บันทึกล่าสุด


ความเห็น (4)

kitty
IP: xxx.121.49.79
เขียนเมื่อ 07 Sep 2007 @ 22:43

เรื่องนี้เป็นความเชื่อส่วนบุคคล คนที่ไม่ได้เจอด้วยตนเองก็ไม่อยากจะเชื่อ คนที่ถูกผีเข้าน่าจะมาจากสาเหตุ ประการหนึ่งคือมีกรรมต่อกันมาก่อน อาจมาชดใช้กรรมต่อกันหรือมาขอส่วนบุญน่ะ

naree suwan
เขียนเมื่อ 08 Sep 2007 @ 16:28
  • แวะมาอ่านเรื่องผีคะ
  • มาฟังคุณอู้คำเมืองด้วย
  • ไม่เคยโดนผีเข้าคะ
  • แต่เป็นพวกผีรัก...
  • หลายครั้งคะ...ที่มีการเตือนล่วงหน้า
  • เหตุหนักเลยเป็นเบา...ก่อนนอนทุกครั้งจึงระลึกและแผ่เมตตาให้ผีบ้านผีเรือนเสมอคะ
เนปาลี
เขียนเมื่อ 08 Sep 2007 @ 16:36
  • สวัสดีเจ้า ..

เคยเห็นคนผีเข้า    มีอาการอู้ไปเรื่อย  แปลก ๆ  ก้าวร้าว  น่ากลั๊วแต้ ๆ   แต่ในกรณีตี้พี่ยกตัวอย่างมานี่  น่าจะพาไปโฮงยาเนอะ  และจะฮื้อดี ก่อรักษาทางไสยาศาสตร์ไปโตย  ควบคู่กั๋น  

ข้าเจ้าเจื้อในเรื่องผี เรื่องสาง  เพราะเคยเจอมาแล้ว  น่ากลั๋วขนาด   ถึงขนาดตามมาในฝันตั้งหลายเตื้อ  ขนหัวลุกไปหมด

ป.ล.  ปี้ลืมส่งเรื่องอะหยังฮื้อก่อ  วันนี้วันที่เก้าแล้วนาเจ้า

VD
IP: xxx.157.200.93
เขียนเมื่อ 08 Sep 2007 @ 16:59

สวัสดีเจ้าตั้นตางหลาย

ข้าเจ้ากับจาวบ้านแหมหลายคนต่างก่ออู้จ๋าแย๊บๆ ไปแล้วเจ้า ว่าไปโฮงยาเต๊อะหบ๋อ แต่ลูกๆ เปิ้นปักใจ๋เหี๋ยแล้วก่ได้แต่ถ๋อนหายใจ๋กันโซ๊ๆ ว่าเฮ้อเอ่อเฮ้ย ทำไปทำมาเปิ้นเอาป้อลุงไปทำพิธีฝังหลอกตวยเจ้า

ก่ออย่างตี้คุณๆ ว่ามา ว่าเป๋นความเจื้อของไผ๋ของข๋องเปิ้นเน๊าะเจ้า แล้วจากเรื่องนี้ ข้าเจ้ายังได้ยินจาวบ้านเปิ้นเล่ากั๋นเรื่องผีๆ สางๆ แห๋มเจ้า อันนี้นับเนื่องมาจากอดีตกาลแต่เนิ่นเมินมาตั้งแต่สมัยโบราณปู๊นละว่าตี้ตางแถวบ้านข้าเจ้านี้ เป๋นบริเวณตางผ่าน ตี้เปิ้นจะเอานักโทษไปประหารชีวิต คนเก่าคนแก่เล่าว่า วันดีคืนดี คนจิตตก หรือขี้เหล้าขี้เมาเดินโซซัดโซเซปิ๊กบ้านค่ำมืด จะเห็นขบวนแห่เป๋นเส้นเป๋นสาย ลั่นฆ้องลั่นกล๋องกั๋นขึ้นเนินขึ้นดอยไปลิบๆ เปิ้นเล่าแล้วหั๋นมาแป๋งต๋าโมกใส่ข้าเจ้า บอกว่า คนนอนดึกๆ ละวังพ่องเน้ออี้หวะ เล่นเอาใจ๋บ่ดิบบ่ดี

คุณเนปาลีเล่นทวงกั๋นกล๋างเติ๋นแบบนี้ ท่าจะต้องฟั่งไปปั่นต้นฉบับฮื้อเปิ้นเหี๋ยละ วันพูกเน้อเจ้าเน๊าะ ใจ๋เย็นๆ :D