ธรรมตำนาน วิปัสน์ชุดนั้น ผูกสองว่าอั้น ใผจ๋ารไว้หา
ปี๋พอศอใด ใจ๋น้อยสังกา ค้นได้ก่อจา ฝากอาจารย์เจ้า
สนั่นบุญมี สืบทีฮากเหง้า ตุ๊เจ้าเขียนฤๅ คฤหัสถ์

เป็นตำนาน ถ้ำธาตุบอกชัด ฤๅว่านาคอั้น คันได
ธรรมผูกสองนั้น ตั๋วเมืองขับไข ฤๅเป็นตั๋วไทย ขอไขบอกแจ้ง
พ่อน้อยมูล ศรีวิยศแถ้ง คัดเป๋นค่าวแจง เรียงร้อย

เถิงอ้ายจำนงค์ พุฒตรงปี้น้อย มาคัดค่าวสร้อย ตั๋วไทย
พิมพ์ไว้เป๋นปั๊บ ฉบับสื่อใส เป๋นหนังสือไทย ฝากไว้เล่มหน้อย
สนั่นบุญมี กึ๊ดดีถี่ถ้อย มาขยายฮอย แถมจั๊น

บันทึกไว้ใน โกทูโนว์นั้น เผยแผ่ว่าอั้น บรรยาย
นับแต่ธรรมเก๊า เล่ามาสุดปล๋าย เป๋นตานมัย ด้วยใจ๋หลิ่งหลู้
ขออานิสงส์ ส่งหื้อจุ๊ผู้ ตี้ฟู่นามไป ครั้งนี้

สุขสามผะก๋าร สวรรค์บ่งจี๊ นิปปานใฝ่อี้ ปันเติง
เงินทองของใจ๊ หลั่งไหลมาเถิง จุ๊วันปันเปิง สำเริงเน้อเจ้า
วันนี้ขอลา วันหน้าจักเข้า มาเล่ามาเรียน แถมครับ

ลาก่อนละหนอ ข้าขอคำนับ อ้ายสนั่นเจ้า บุญมี
สร้อยวาที ข้ามีเต้าอี้ เต้านี้ขอวางลง ก่อนแลนายเหยฯ