สัปปะว่าผี มีในป่าจ๊า อยู่ปื๊นแหล่งหล้า บนฟ้าป่าเหว
อันว่าผีนั้น เอ่ยมันก็เสียว ซ้ำอยู่คนเดียว เหลียวไหนก็หย้าน
ผีมีกุณ คือผีเสื้อบ้าน เสื้อวัดเสื้อเมือง หมู่นี้ ผีเสื้อตั้งหลาย มีหมายบ่งจี๊ ฮักษาตี้หนี้ บ้านเมือง
ผีตุ๊ผีพระ ต๋ายคาผ้าเหลือง พระศาสน์รุ่งเรือง ผ้าเหลืองปกหุ้ม
ผีปู่ย่าแหม เข้าแอมย่งตุ้ม คุ้มครองลูกหลาน ตานตั๊ก ผีก้ะก็มี บางทีก้ะยักษ์ จ่องจั๊กปุ๋มใส้ ต๋ายเอง
ผีโพงวาบวื๊อ ผีสือโต๋งเต๋ง ผีมดผีเม็ง ฮ้องเพลงตุ้มหม้อง
ผีบ้าต๋าวอด ถอดผีม้าบ้อง ผีต๋ามอยมอง ย่องเด๊า ผีหม้อนึ่งเสริม ผีเดิมผีเก๊า ผีแม่ก้อนเส้า เต๋าไฟ
ผีเจ้าตี้นั้น เจื้อมั่นตางใจ๋ คนล้านนาไต มีไว้กุบ้าน
บ่ม่วนจิตใจ๋ ใจ๊ธูปสักก้าน จุดบอกบนบาน ท่านเต๊อะ จักอู้ไปหลาย กำจายชักเลอะ มาเยอะป๋านอั้น ผีเงา
ฟังดูแล้วไซร้ ฟั่งไปเจื้อเขา ต้องเจื้อตั๋วเฮา ตั๋วเก่าใจ้บ้า
ขอหื้อสุขใจ๋ สุขก๋ายเจ้าข้า เจิญเทวดา ปกปั๊ก  <p style="margin: 0cm 0cm 0pt" class="MsoNormal">จ๋ำใจลา พรหมาเทพย์ฮัก เครือออนขอพัก วางลง
สุดค่าวคง ปล๋งวางเต้าอี้ เต้านี้ขอลาไป ก่อนแลนายเหย.</p>