ความเห็น: คร่าวล้านนา

ยอหัตถา วันตากราบนบ ท่านตี้เคารพ น้อมนบไหว้สา
ตั๋วข้าม่อนน้อย ฝากถ้อยคำจ๋า เป็นอักขรา คาถาค่าวสร้อย
จักขอไขขาน ตำนานเมืองหน้อย เมืองใหม่อิงดอย นางเมาะ
แม่ออนเขตขาม นามเมืองก็เพราะ เสนาะโสตอั้น จี๊แจง
เมื่อก่อนเก่ากี๊ จื้อนี้เป็นแขวง อยู่สันก๋ำแปง เจียงใหม่แหล่งหล้า
ลุมาเถิงปี๋ สองสี่สี่ห้า หมู่เงี้ยวมันมา เผายึด
ทางก๋ารจึงหนี มาตี้ใหม่กึ๊ด ม่วนกั๋นทึดทึด สันกำแปง
สองห้าสามเจ็ด เมษมาศสาดแสง สามสิบวันแวง แบ่งกิ่งจัดตั้ง
แม่ออนสดใส ไร้สิ่งบังกั้ง รวบรวมพลัง เร่งพัฒน์
ลุเถิงดิถี โสรีวารวัฏ วันตี้แปดชัด กั๋นยา
สองปันห้าร้อย ห้าสิบวัสสา ตางก๋ารสั่งมา ยกฐานะขึ้น
หื้อเป๋นอำเภอ เสนอเต๋มตื้น ปี๋ติยินยืน ปี๋นั้น
มหากุศล มงคลเก้าจั๊น น้อมถวายอั้น ราจา
วโรกาสนั้น แปดสิบพรรษา เตี่ยงมั่นฑีฆา ชนมายุเจ้า
ขอฮ่วมฉลอง ทำนองแบบเบ้า เหนือหัวของเฮา ราจ๊ะ
รัตนะสาม สยามเทวะ พระฮักษาอั้น แม่ออน
ผาตั้งธาตุนั้น มิ่งขวัญสมร คู่เมืองนคร แม่ออนแหล่งหล้า
ขอหื้อสุขศานต์ สำราญทั่วหน้า แม่ออนนามา เมืองติ๊บ
จักอู้ไปหลาย มีพรายกระซิบ หยิบมือบ่เต้า พรหมมา
ขออำลา ไปเพียงเต้าอี้ เต้านี้ขอวางลง ก่อนแลนายเหย.