๑๐/๐๑/๒๕๕๗

*********

ค่าว  คนหมะเก่าเล่าทายไว้ ๑

 

คนหมะเก่า                    เล่าขานบอกไว้                เมินนานนับได้              หลายพันขวบปี๋

กำทายมีนัก                   ตั๊กแม่นดีหลี                   วันหน้าจะมี                  อย่างอี้แม่นมั่น   

ตั๋วหนานจะขอ                เล่าปอสั้นสั้น                  เต้าตี้สัมพันธ์                หันพบ

ต้นไม้ตังหลาย                สูงใหญ่คาคบ                 จะหลบลงปื้น                 คงคา

ภูดอยจะโล้น                  หมดเสี้ยงไม้หนา            หมู่คนจะปา                   หามาปลูกใกล้

ไม้สักไม้หลวง                 ถึงกล๋วงมีใส้                   ฝานด้วยเครื่องไฟ          ไวนัก

สัตว์ป่าบ่อมี๋                   ตี้นอนตี้พัก                     ผูกจั๊กขังห้อง                กรงนา

อยู่กั๋นเต๋มล้น                  หื้อคนถ่างต๋า                  ซื้อบัตรผ่านมา              หาป่าบ่อได้

พายุหลายหน                 ขนน้ำไกล๋ใกล้                 กล๋างทะเลไทย             มาซัด

คนบนฝั่งหนา                 ดั่งปล๋าถูกปั๊ด                 งัดลงสู่ท้อง                  ธารา

แผ่นดินจะไหว                ดั่งไกวเปลหนา               ดินทับถมมา                  ฆ่าคนต๋ายได้

โลกฮ้อนน่ากลั๋ว              ดั่งหลัวสุมใต้                  ลุกเป๋นเปลวไฟ               ยิ่งนัก

เจดีย์ควันหลาย              ปล่อยอายพร้อมพรัก        อุตสาหกรรมหนัก            นั่นนา

สายฟ้าจะแดง                ดั่งดอกบุปผา                 แสงไฟปุ่งมา                หาบ้านเฮาได้

ขีปนาวุธ                     รุดเหนือมาใต้                 บ่อใจ่สิ่งใด                  หนาน๊อง

ส่วนตั๋วปี้หนาน              บอกขานเล่าคล้อง            คงบ่อได้ต้อง                 บอกลา

กำทายหมะเก่า              เพียงเล่าอู้จ๋า                พักก่อนเต๊อะนา           มาแถมรอบได้ ๆ