ອາສາລະຫະບູຊາ ເຂົ້າພັຣສາ ຫຼື ເຂົ້າພັນສາ
ປະວັຕຄວາມເປັນມາ
ອ |
າສາລະຫະບູຊາ ຕົງກັບມື້ເພັນຍ໌ເດືອນ 8 ກ່ອນມື້ເຂົ້າພັຣສາ 1 ມື້ ເປັນມື້ທີ່ ພຸທທະສາ-ສະນິກຊົນສະແດງຄວາມເຄົາຣົພຕໍ່ພຣະສົງຄ໌ ອາສາລະຫະເປັນຊື່ເດືອນ ໘ ອາສາລະຫະບູຊາ ຍໍ້ມາຈາກຄຳວ່າ ອາສາລະຫະບູຣະນະມີບູຊາ ແປວ່າກາຣ ບູຊາພຣະ ໃນມື້ເພັນຍ໌ ເດືອນ ໘ ຖ້າປີໃດມີເດືອນ ໘ ສອງເທື່ອ ກໍຈະເລື່ອນໄປເປັນມື້ຂຶ້ນ ໑໕ ຄ່ຳເດືອນ ໘
ຫລັງຈາກສົມເດັຈພຣະພຸທທະອົງຄ໌ໄດ້ຕຣັສຣູ້ໃນມື້ເພັນຍ໌ເດືອນ 6 ແລ້ວ ໄດ້ທຣົງ(ຊົງ)ໃຊ້ເວລາທົບທວນ ສັຈທັມມ໌ ແລະທຣົງຄຳນຶງວ່າທັມມະທີ່ພຣະອົງຄ໌ຕຣັສຣູ້ນີ້ລຶກຊຶ້ງຫຼາຍ ຍາກທີ່ຜູ້ອື່ນຈະຣູ້ຕາມ ແຕ່ອາສັຍ ພຣະກະຣຸນານີ້ເປັນທີ່ຕັ້ງຈຶ່ງທຣົງພິຈາຣະນາແບ່ງບຸຄຄົນອອກເປັນ 4ປະເພທ (ບົວ 4 ເຫຼົ່າ) ຄື :
໑. ອຸຄຄະຕິຕັນຢູ ດອກບົວທີ່ຢູ່ພົ້ນນ້ຳ
໒. ວິປັຈຈິຕັນຢູ ດອກບົວທີ່ຢູ່ຮິ່ມນ້ຳ
໓. ເນີຍຢະ ດອກບົວທີ່ຢູ່ໃຕ້ນ້ຳ
໔. ປະທະປະຣະມະ ດອກບົວທີ່ຈົມຢູ່ກັບໂຄລນຕົມ
ຈຶ່ງທຣົງມີພຣະກະຣຸນາທິຄຸນຣະລຶກເຖິ່ງອາລາຣະດາບົສ ແລະອຸທທະກະດາບົສວ່າມີກິເລສເບົາບາງ ສາມາຖຕຣັສຣູ້ໄດ້ທັນທີ ແຕ່ທ່ານທັ້ງ 2ໄດ້ຕາຍແລ້ວ ຈຶ່ງທຣົງຣະລຶກເຖິ່ງປັນຍ໌ຈະວັຄຄີຍ໌ ໄດ້ທຣົງສະແດງ ພຣະທັມມ໌ເທສະນາແກ່ປັນຍ໌ຈະວັຄຄີຍ໌ທັ້ງ 5 ຄື ໂກນທັນຍະ ວັປປະ ພັທທິຍະ ມະຫານາມະ ແລະອັສຊິ ຊຶ່ງລ້ວນແລ້ວແຕ່ເປັນຜູ້ອຸປະຖາກພຣະພຸທທະເຈົ້າ ເມື່ອເທື່ອຍັງທຣົງບຳເພັນຍ໌ທຸກຂ໌ກິຣິຍາຢູ່ ພຣະທັມມ໌ທີ່ພຣະພຸທທະອົງຄ໌ທຣົງ ເທສະນາໃນເທື່ອນີ້ມີຊື່ວ່າທຣຣມະ(ທັມມະ)
ຈັກກັປປະວັຕະນະສູຕຣ ຊຶ່ງມີອະຣິຍະສັຈ ໔ ຫຼື ຄວາມຈິງອັນປະເສິຖ ໔ ປະການໄດ້ແກ່ :
໑. ທຸກຂ໌ ຄວາມບໍ່ສະບາຍກາຍ ບໍ່ສະບາຍໃຈ
໒. ສະມຸທັຍ ເຫຕຸໃຫ້ເກີດທຸກຂ໌
໓. ນິໂຣທະ ຄວາມດັບທຸກຂ໌
໔. ມຣຣຄ(ມັຄ) ຂໍ້ປະຕິບັຕິໃຫ້ເຖິ່ງຄວາມດັບທຸກຂ໌
ຫລັງຈາກສະແດງພຣະທັມມ໌ເທສະນາແລ້ວ ທ່ານໂກນທັນຍະໄດ້ດວງຕາເຫັນທັມມ໌ ເປັນຄົນທຳອິດ ໄດ້ກາບທູລຂໍບວຊ ແລະພຣະພຸທທະອົງຄ໌ກໍທຣົງອະນຸຍາຕ ໂດຍທຣົງທຳກາຣອຸປະສົມບົທໃຫ້ແບບ ເອຫິພິກຂຸອຸປະສັມປະທາ ນັບເປັນ "ປະຖົມສາວົກ" ຂອງພຣະພຸທທະເຈົ້າ
ດັ່ງນັ້ນໃນມື້ນີ້ຈຶ່ງເປັນມື້ທຳອິດທີ່ມີພຣະຣັຕະນະຕຣັຍຄົບອົງຄ໌ສາມ ຄື ພຣະພຸທທ໌ ພຣະທັມມ໌ ແລະພຣະສົງຄ໌ ເນື່ອງຈາກພຣະພຸທທະອົງຄ໌ທຣົງເທສະນາເປັນກັນທ໌ທຳອິດ ຈຶ່ງເອິ້ນເທສກັນທ໌ນີ້ວ່າ "ປະຖົມມະເທສະນາ" ຫຼືອີກນັຍນຶ່ງອາຈຈະກ່າວໄດ້ວ່ານັບເປັນມື້ທຳອິດ ທີ່ພຣະພຸທທະເຈົ້າທຣົງປະກາສ ພຣະພຸທທະສາສນາ ຈະເຫັນໄດ້ວ່າປາກົຕກາຣນ໌ສຳຄັນ ໆ ໃນມື້ນີ້ ມີເຖິ່ງ 4 ປະການ ນຳກັນຄື :
1. ເປັນມື້ທຳອິດທີ່ພຣະພຸທທະອົງຄ໌ທຣົງສະແດງປະຖົມມະເທສສະນາ
2. ເປັນມື້ທຳອິດທີ່ພຣະພຸທທະອົງຄ໌ທຣົງໄດ້ປະຖົມສາວົກ
3. ເປັນມື້ທຳອິດທີ່ພຣະສົງຄ໌ເກີດຂຶ້ນໃນໂລກ
4. ເປັນມື້ທຳອິດທີ່ບັງເກີດຣັຕະນະຄົບສາມ ເປັນພຣະຣັຕະນະຕຣັຍ ຄື ພຣະພຸທທະຣັຕະນະ ພຣະທຣຣມະ(ທັມມະ)ຣັຕະນະ ພຣະສັງຄະຣັຕະນະ
ไม่มีความเห็น