ไผ่ฮ้อยกอ...เจ็ดหวดเจ็ดไห
มาแล้วๆเจ็ดหวดเจ็ดไหคำกลอน...สำนวนจอมใจเล่าแข่งอีสานจุฬา
- ไผ่ฮ้อยกอ
ไผ่ฮ้อยกอก่อแจ้งแฮงขนาดซายเส็ง
ไผ่ฮ้อยกอหมอมัดแกไปขายค้า
หมอนี่แฮงเหลือล้นเกินคนสุดขนาด
ดึงลากไม้ที่ฮ้อยมัดไว้ไผ่กอ
เกินกว่าแฮงกะด้อดึงย่างวางเฉย
เจ็ดหวดเลยมาเจอแม่นผู้ได๋ดึงไม้
เจ็ดหวดเลยดึงไว้แหนงเดียวกะผั่นอยู่
หยังจังเป็นคึ้งนึ้งดึงได้กะบ่ไป
หมอกะวางกอไม้เลาะเลียบหาดู
จั่งมาเห็นเจ็ดไหจองดึงเฮียวไม้
ไผมันก้าจังเดินลิวมาไส่
ท้าวเจ็ดไหต่อสู้บ่มีย้านหย่อนยำ
ไผ่ฮ้อยกอจับทื้นว่าสิเหวี่ยงเจ็ดไห
บักเจ็ดไหเลยจับแก่งวีบักนายฮ้อย
จนวาเหมิดแฮงสู้บักเจ็ดจับแก่งไผ่
ฮ้อยกออ่อนหล้ายอมแพ้เพราะอ่อนแฮง
แนวเพิ่นเห็นเขาน้อยว่าสิข่มหัวจิก
บาดได๋แนวนามพริกฟาดลงเผ็ดจ้าว
กะเลยยอมเป็นแหล่งตามหลังท้าวเจ็ดหวด
ไปบ่นานผั่นพ้อนายฮ้อยลากเกียน
เกียนตั้งฮ้อยดึงย่างไปเฉย
มีกำลังวังซากว่าคนทั้งค่าย
แกเอาของขายค้าคนเดียวดึงลาก
เกียนฮ้อยเล่มดึงลากทื้นไป
เจ็ดหวดกับลูกน้องฮ้อยไผ่ไปเห็น
กะเลยเอามือจับจ่องดึงเกียนไว้
ไผ่ฮ้อยกอจับก้นดึงเกียนเลยอยู่
เกียนกะหยุดอยู่นิ่งดึงได้บ่ไป
ท้าวนายฮ้อยเลียบหล่ำนำหา
แม่นหยังคาหยังติดจ่องดึงเอาไว้
กะเลยนำมาพ้อพอดีฮ้อยไผ่
ดึงจ่องไว้เกียนฮ้อยเล่าคา
หน่อยบ่ช้ากะเลยเกิดถกเถียง
เพราะบ่ยอมลงกันปากแฮงแข็งกล้า
จั่งเกิดตีเกิดฆ่าเจ็ดไหยืนเบิ่ง
แฮงต่อแฮงขนาดล่ำเขาป้ำกอดกัน
ผงฝุ่นดินไงง่องสู้ต่อพอกัน
จักแฮงไผแฮงมันใส่กันขันมื้อ
บักฮ้อยเกียนลงไต้หงายลงป่างง่าง
สู้ฮ้อยไผ่บ่ได้จั่งยอมแพ้แกกัน
บอกซือให้เกียนไผ่เจรจา
กะเลยยอมเป็นมิตรผูกพันกันไว้
ท้าวเจ็ดไหโตน้อยแต่เขายอมให้เป็นใหญ่
เพราะว่าฤทธิ์เดชกล้าแฮงล้ำลืนเขา
พีผู้เค้าเจ็ดหวดเจ็ดไห
กะจั่งพากันลัดป่าดงพงไม้
สามสหายได้พากันเดินป่า
เอาแต่มันสิพ้อพายหน้าบ่เกรง...
คอยติดตาม...
- จีนายโม้(คล้ายๆจิ้งหรีดแต่ตัวโตมากๆ...อร่อยด้วย)
ภาพประกอบโดยลูกศิษย์นายไชโย นันแสวง
ความเห็น (5)
เป็นครั้งแรกที่ได้เห็นบทกลอนแบบนี้ โชคดีจริงๆ ขอให้มีความสุขนะคะ ขอบคุณค่ะ
สวัสดีครับ
ขอคัดลอกไปอ่านต่อนะครับ
ต้องใช้ความพยายามนิดหน่อย ;)
ดีใจจังที่ครูต้อยชอบ...แล้วจะเขียนให้อ่านนะคะ
ดีดีดีดีหลายแท้หนอ..
หัวแต่เคยได้อ่านบทกลอนจั้งสิ..คักแท้อีหลีอีหลอ..อิอิ
สะบายดี
พี่น้อง...ท่าอ่านอีกเด้อจ้า