แวะมาอ่านกอย ก้ามาปะเ็ว็บล้านนาบะเดี่ยวมีหลายเว็บแสดงว่าวิญญาณของชนจาวล้านนาตึงบ่สูญหาย เสียดายอยู่อย่างว่าเมื่อใดเฮาจะได้เอาตั๋วเมืองขึ้นบนเว็บได้อู้จ๋ากั๋นแตนอั๊กษรตั๋วไทตี้มันผันเสียงได้บ่เต้าตั๋วเมืองเฮาฟังดูมันเกิ้มๆหยั่งใดบ่ฮู้

      มีค่อไค่ถามหมู่ต้านอาจ๋านอยู่อันหลังจากได้อ่านข้อเขียนต่านอาจ๋านพรหมมาว่าพระแม่จ๋ามเทวีได้เอาตั๋วมอญมาแป๋งเป๋นตั๋วเมือง  พอดีผมไปแอ่วหาน้าบ้านเปิ้นเป๋นตี้แป๋งยาแผนโบราณ ตั๋วยาบางตั๋วต้องสั่งเมืองม่าน(พม่า)มีอยู่เตื้อเป๋นคนไตเหนือ(อยู่ต๋อนเหนือของเมืองเจียงตุ๋ง)เอาตั๋วยามาส่งหื้อน้ากับเอาปั้บสามาขายหื้อว่าเป๋นของเจ้นป้ออุ๊ยเขาจ๋านไว้ตั้งเมื่อสมัยบวชเป๋นพระบ่ะเดี่ยวป้ออุ๊ยเขาต๋ายแล้วป้อเขาอ่านได้พ่องแต่บ่ะเข้าใจ๋เขาก่อ่านบ่ ออก บ่ได้ฮ่ำเฮียนเพราะหนหลังมาม่านสั่งบ่ฮื้อเฮียนฮื้อสอนฮื้อเฮียนก้ากำม่านได้อย่างเดียว ไผสนใจ๋ก่้ลักเฮียนลักสอนกั๋นตามวัดเขาหันว่ามันลำบากตุ๊กยากนักก่เลยบ่ะเฮียน

กำแรกผมก่ กึ้ดว่าเป๋นตั๋วไตบ่ะเก่า น้าบอกผมว่าเป๋นตั๋วเมืองบ่ะเก่าอ่านเข้าใจ๋ยากสักหน้อย

เลยเอาไปหื้อตุ๊ลุงตี้วัดจ้วยอ่านเพราะตุ๊ลุงเก่งตั๋วเมืองสอนตั๋วเมืองหื้อจาวบ้านตี้สนใจ๋เฮียน  ปรากฎว่าตุ๊ลุงอ่านไ้ด้แต่เป๋นกำปิดสนาเกี่ยวกับก๋านดูเมื่อ

เต้าตี้ผมดูเป๋นตั๋วก๋ะข๋ะตั๋วก๊ะงะของเฮาเนี้ยะ(ผมเฮียนมาผ้องแบบหมูๆแมวๆ) ซ้ำปอดีผมอ่านปะบทความของหมอพนมเมืองแมนตี้ไปตวยฮอยตนไทในอดีตตางประเทศจีนแผ่นดินใหญ่ฮู้สึกว่าจะออกทีวีตางช่อง5ตวยถ้าจ๋ำบ่ผิด ว่าในพิพิธภัณฑ์มีหลักศิลาได้บันทึกว่าคนไทเหนือ(ล้านนา)มีอยู่ต๋อนใต้ของจีนประมาณ14ล้านคนมีอักษรแบบล้านนาเป๋นของตั๋วเก่าวิวัฒนาก๋านมาร่วม2000ปีแล้วแป๋งมาจากกำบาลี

ผมก่เลย อิ๊กขะลิ๊กใจตี้ต้านอาจ๋าน พรหมมาว่าเจ้าแม่จ๋ามเทวีได้ฮื้อหมู่พระกับครูบาอาจ๋านตี้มาเมืองจากเมืองละโว้จ้วยกั๋นเอากำมอญมาแป๋งเป๋นตั๋วกำเมืองในปี๋ พ.ศ.1205 นับจ๋นถึงบ่ะเดี่ยวก่เป๋นเวลาปันกว่าปี๋ หลังจารึกในพิธภัณฑ์เมืองจีนตึงหกร้อยเจ็ดร้อยปี๋แต้

        ถ้อยตึงหมดตึงเสี้ยงนี้ผมบ่ะได้มีเจ๋ตนาขัดแย้งกับครูบาอาจ๋านนอกจากก๋านใฝ่ฮู้อดีตของล้านตึงความเป๋นไปของล้านนาในปัจจุบันกับล้านนาในอนาคตตี้จะไปเถิง

                        ไหว้สาครูบาอาจ๋าน

                            หน้อยผญาปึ๊ก