ไหว้สาเจ้า หมู่เฮาจาวเหนือ ผมแป๋งค่าวเครือ มานี้

วันนี้จัยยะ มงคละดิถี  สนั่นบุญมี ข่าวดีเล่าอู้

ตั๋วไทยอังกฤษ ได้คิดเฮียนฮู้ อ่านอู้แต่ก่อน เมินมา

แต่ว่าจ๋นใจ๋ ตั๋วเมืองนี้หนา มืดตื้ออ่านกา บ่ได้

อยู่มาวันนึ่งโชคดีนักหนา เปิ้นเอาตำฮา เล่มมายื่นหื้อ

ว่าเอ๊าะอาจารย์ ผมเอามาหื้อ ก็ถือได้ว่า กึ๊ดเติง

ฮ่ำเฮียนไปเต๊อะ เวลามาเถิง จะได้ลำเปิง วันหน้า

ยินดีแต้ตั๊ก ขอบคุณนักหนา ญาติธรรมนา ไว้สาจื่นจ้อย

เกือบจะปอเดือน บ่ใจของหน้อย ก็ก่อยขีดเขียน กะขะ

ท่องอ่านจ๋ำเพียร ขีดเขียนก๊ะค๊ะ ซาวห้าวันก๊ะ พอดี

บุญคุณจ้าดนัก ความหวังเป๋นศรี วันนี้พอดี เขียนอ่านไปได้

ตาบอดน้ำใส ก็แควนหายไข้ ย้อนคนห่วงใย จ่องจัก

ขอบคุณจาดหลาย กุศลใหญ่นัก จุ่งได้ปกป้อง ตั๋วจาย

ขนานประดิษฐ์ พระคุณนักหลาย อยู่สุขสบาย ต่อไปไจ้ไจ้

หื้อบุญมาสม เหมือนลมลูบไล้ ขึ้นเหนือล่องไต้ นิรภัย

จุ่งมีเงินนัก อายุยืนหลาย ส่ำฮานสบาย ต่อไปเน่อเจ้า 

ปิยะวาจา แถมปิยะมิตร ก่อเกิดเหมือนเงา เนอนาย บัดนี้ขอวาง กำสาธยาย ไว้เพียงเท่าอี้ ก่อนนี้แหล่นายเฮย