ยกมือสา วันทากราบนพ ท่านที่เคารพ พรหมมาพ่อหนาน                                     

เฮาคนเมืองแต๊ เป๋นลูกเป๋นหลาน ฮ่อมก๋ารฮ่อมงาน ฮ่วมสานสรรสร้าง

อันตั๋วผมนี้ ขอชี้กล่าวอ้าง หื้อเป๋นหนทาง บอกว่า

ลูกหลานไตลื้อ ยึดถือประสา คำเก่าเล่ามา เมินแล้ว

ผู้มีพระคุณ การุณย์บ่แคล้ว อพยพแน่ว สิบสองปันนา

นำพี่พาน้อง เพื่อนพ้องวงศา ออกจากพารา ก่อนนั้น

พ.ศ.งดงาม สองสามเป๋นชั้น ติดต๋ามเก้าห้า นั้นนา

ฮ่วมตั้งฐานถิ่น ที่กิ๋นก๋ารค้า สุดผาถะนา เมืองออน 

บนฝั่งแม่น้ำ นามดีขจ๋ร ชื่อน้ำแม่ออน ดินดอนราบกว้าง

คุณงามความดี เป๋นที่อวดอ้าง เหมือนอย่างพ่อหนาน ว่าไว้

โบราณคนเก่า คนเฒ่าเอาใช้ เป๋นฮ่อมสืบได้ เมินมา

หื้อสัญลักษณ์ เป๋นที่สังก๋า จ๋ำหมายที่มา เนืองนัน

สมานะฉันท์ บ่หลิ่งบ่กั้น เป๋นกั๋นเป๋นงาน บัดดล

กิ๋นหอมต๋อมม่วน เชิญชวนเป๋นผล สรรพมงคล ผลบุญแผ่ก้อง

เพราะศาสะนา นำพาถูกต้อง อยู่ต๋ามครรลอง ชาวพุทธ

ทำบุญสุนทาน สำราญบ่หยุด แสนสุดว่าชั้น คนดี

ตุ๊เจ้าพระนาย มีศักดิ์มีศรี นำคนทำดี บ่มีกีดกั้น

ครูบาปัญโญ ท่านแรกนั้นหนา สร้างวัดลือนาม อารามกิ่งแก้ว

แม้นรูปที่สอง จิตใจ๋ผ่องแผ้ว นามท่านครูบา จันต๊ะ

ท่านมีบุญคุณ กับเฮาสัปป๊ะ แป๋งสร้างวาวัด นามใด

ชื่อวัดออนหลวย ขอชี้ขานไข ที่อยู่พระไทย ไตลื้อว่าอั้น

แถมพระรูปสาม ซึ่งได้เลื่อนชั้น ฐานันดรนั้น ท่านกู๊

"พิพัฒนชินวงค์" ดำรงค์ศักดิ์หรู นามท่านพระครู ราชทินนาม

คฤหัสถ์เป๋นศรี ทำดีสร้าญ ลูกหลานเต๋มบ้าน มีคุณ

งานหลวงบ่พลาด งานราษฎร์อุดหนุน ร่วมแรงเป๋นทุน เพราะบุญท่านเจ้า

ได้สาธยาย ขยายก่อเก๊า เพื่อเป๋นแบบเบ้า โบราณ

ขยายความคิด พรหมมาพ่อหนาน สืบสานเป๋นงาน จ๋ำหมาย

สรรเสริญยกยอ ต่อหื้อความหมาย บอกหื้อญิงจาย ทราบถ้อย

กล๋อนวาจ๋า เขียนมาเต้าอี้ เต้านี้วาดวางลง ก่อนแหล่นายเฮย