ถึงอาจารย์ตุ่น อ้อ ศิริ และญาติน้ำหมึกทุกท่าน
เพลงกล่อมลูก
สำนวนที่ 1
เอ่อเอ้อ....
นอนสาหล่าหลับตาอย่าแอ่ว
นอนอู่แก้วหลับแล้วฝันดี
พ่อของเจ้าเพิ่นไปเฮ็ดนา
แล้วเวียกนาสิไปรับจ้าง
พ่อบ่ว่างหาเงินหาคำ
พ่อต้องจำลำบนลำบาก
เฮาจนยากอีหลีหล่าเอ้ย....
เจ้าอย่าช้าขอให้เข้านอน
เจ้านอนแล้วแม่สิแต่งงาย
เตรียมเอาไว้ท่านพ่อของเจ้า
พ่อหิวข้าวพ่อสิเป็นลม
ลูกกินนมอย่ากวนอย่าแอ่ว
เป็นลูกแก้วลูกค้ำลูกคูน
สืบสกุลของพ่อของแม่
เฮ็ดตั้งแต่คุณงามความดี
ความหวังมีฝากไว้กับเจ้า
เอ่อเอ้อ....
สว่าง ไชยสงค์ แต่ง
สำนวนที่ 2
นอนสาหล่าหลับตาแม่สิกล่อม
นอนอู่แก้วหลับแล้วแม่สิกไกว....
แม่ไปไฮ่ปิ้งไก่มาหา
แม่ไปนาปิ้งปลามาต้อน
อย่าสู่อ้อนอย่าแอ่วอย่ากวน......
เจ้าฮู้บ ว่าโลกของเฮา
ความฮ้อนเผามันลนมันอูด
เฮาต้องสูดควันพิษทุกวัน
คนฆ่ากันย้อนความละโมบ
ย้อนความโลภคนจั่งใจดำ
เจ้าจงจำฟังคำแม่ว่า
แล้วหลับตานอนสาอย่าแอ่ว
ตื่นขึ้นแล้วจั่งค่อยกินปลา
แก้ปัญหายามตอนเจ้าใหญ่
แทนคุณไก่คุณปูคุณปลา
นอนสาหล่าหลับตาอย่าแอ่ว....
สว่าง ไชยสงค์ ประพันธ์
คำอวยพรสำนวนที่ ๑ (บทผญาภาษิตอีสาน)
ขอให้รวยล้นฟ้าม หาลาภมหาศาล
ทรัพย์ในจักรวาล หลั่งเข้าเฮือนทุกแลงเช้า
เงินกับทองไหลเข้า ในเคหาจนแน่นอั่ง
เฮ็ดอีหยังกะให้ได้ สมมาดปรารถนา
ขอให้เดโชกล้า บารมีสูงส่ง
ขอคุณพระพุทธ คุณพระธรรม คุณพระสงคฆ์ จงซ่อยปกซ่อยป้องครองคุ้มให้ซุ่มเย็น
อย่าได้เป็นหวัดไข้ แนวใด๋เป็นเด็ดขาด
ฝูงโรคาพยาธิฮ้าย ให้ไกลข่างห่างหนี
ขอให้มีใจแน่น อย่าคลอนแคลนไหวหวั่น
ขอให้ทันขอให้ฮู้ ปัญญากล้าเก่งเกิน
ให้เจริญก้าวหน้า เสวยแต่ความสุข
อันตรายภายทุกข์ อย่าได้มีมาใกล้
แม่นสิไปหนห้อง ทางใด๋อย่าเขินขาด
วาสนาซ่อยค้ำ กำเงินล้านอยู่บ่เซา เด้อท่านเอ้ย
สว่าง ไชยสงค์ ร้อยเรียง
อวยพร สำนวนที่ ๒
ขอให้เงินไหลกองทองไหลมา เพชรนิลจินดาไหลสู่
โซคและลาภใหลเข้า ทั้งเซ้าและแลง
ไปทางหน้า อย่าสู่มีคนซัง
ไปทางหลัง กะให้มีคนย้อง
ญาติพี่น้อง นับหน้าถือตา
วาสนาลื่นล้น คนย้องทั่วเมือง
นอนหลับ กะให้ได้เงินพัน
นอนฝัน กะให้ได้เงินหมื่น
นอนตื่น กะให้ได้เงินแสน
แบนมือไป กะให้ได้เงินล้าน
เงินทองไหลเข้าบ้าน รวยล้นเป็นเศรษฐีเด้อ...
สว่าง ไชยสงค์ เรียบเรียง