เฮียมจัก ไขแผ่แก้ งัวแม่ในนิทาน ก่อนแล้ว
คนเลี้ยง มันสมองหลาย ล่ายลวงซาวบ้าน
หาทางล้อ ขายงัวโตแม่
ความคึด หลักลื่นล้น หากเห็นส้นอยู่ค่าวา
ยังมี ชายหนุ่มข้าว* ซาวกว่าปีปลาย
ยามกลางคืน ตื่นมาหาน้ำ
คนปนแป้ง ขาวพอนในอ่าง
บีตาน แถมตื่มเข้า* หวานล้ำลื่นนม
พอฮุ่งเซ้า เลาะจ่าวขายนม
หลายคนซม ว่านมหวานจ้อย
มันจาแจ้ง นมงัวในแหล่ง
เซ้าแลง เพียรพ่ำเลี้ยง แนวหญ้าอ่อนงาม เจ้าเฮย
มันเที่ยว ขายซู่มื้อ คนดื่มจับใจ
ข่าวลาม ไปเถิงหู เศรษฐีไกลบ้าน
มาขอซื้อ งัวงามนมแซบ
ไปล่ำเลี้ยง พอได้ดื่มสบาย
ชายหนุ่มต้าน บ่อยากขายงัว
บอกว่า หลายคนเวียน ให้ค่าแสนมาแล้ว
งัวพันธุ์นี้ นมดีหายาก
คันว่า ได้ค่าล้าน สิวางให้ท่านไป
เศรษฐี ใจอ่อนซื้อ งัววิเศษนมหวาน
จูงเมือเฮือน หล่ามเสาในบ้าน*
เถิงยามเซ้า ขันฮองคั้นบีบ
นมจากเต้า มาต้มดื่มกิน
เป็นหยัง นมบีบได้ จางจืดบ่คือหลัง?
รอหลายวัน รสยังบ่คือกี้
มันก็ จำคนใช้ ไปหาหญ้าอ่อน
มายื่นป้อน งัวเซื้อแม่นม
หลายวัน กายผ่านพ้น นมบ่หอมหวาน
กายเป็นเดือน ก็จืดจางปานน้ำ
มันจึ่ง โมโหฮ้าย ตีงัวฆ่าหั่น
เสียงัว เสียเงินจกจ่ายซื้อ เสียแต้มเหลี่ยมนักเลง !
(4มกรา 2011)
* ข้าว(ลาว) อายุรุ่นราวคราวเดียวกัน
* บีตาน(ลาว) น้ำตาลเทียมชนิดหนึ่ง
* หล่าม มัดติด, ผูกติด
ไม่มีความเห็น