สมุนไพรล้านนาผญาจาวบ้าน
ผญาล้านนา กิ๋นป๋ากิ๋นจิ๊น หาพืชผักมาแอม หอมขาวหอมแดง บ่าแคว้งกั๋บแถม เพี้ยฟานผักแปม แถมใบจั๋นต้น
สมุนไพรล้านนา ผญาจาวบ้าน
เทวาลี
@ ยอหัตถา วันตากราบนบ ต้านตี้เคารพ ปี้น้องหลวงหลาย
ขอโอกาสนี้ มาจี๊ขยาย ฟังสาธยาย มีหลายบ่น้อย
อันว่าคนเขียน ปุ๋มเหนียงยังหน้อย ขอสูมากอย ปี้น้อง
อู้เรื่องของกิ๋น ได้ยินต๊องฮ้อง แป๋งต๋าจ๋ดจ้อง ของลำ
ไผซอบตังจิ๊น เยี๊ยะกิ๋นประจ๋ำ ต้มต้มยำยำ มันลำกั๋บส้า
ลาบควายไก่หมู ตึงปู่ลุงป้า ฟั่งฟ้าวยกมา อ่อมจิ๊น
ผญาล้านนา กิ๋นป๋ากิ๋นจิ๊น หาพืชผักจิ้ม มาแอม
หอมขาวหอมแดง บ่าแคว้งกั๋บแถม เพี้ยฟานผักแปม แถมใบจั๋นต้น
จ้วยลดความดัน ไขมันเข้มข้น เลือดลมเตียววน ดีนัก
ปอเข้าวษา หันมากิ๋นผัก ร่างก๋ายก็จั๋ก แข็งแรง
กิ๋นสมุนไพร จิ๋ตใจ๋เข้มแข็ง ตึงเจ๊าตึงแลง บ่แก๋งก็ต้ม
ขมิ้นดอกข่า คั่วบ่าห่อยขม เป็นยาขับลม ว่าอั้น
ต๊องอืดต๊องเฟ้อ บ่เรอนวดฟั้น เลือดลมอัดอั้น ตือออ
ผักหล๋ะชะโอม ฮากต้มกิ๋นหนอ จะจ้วยชลอ ขับลมต๊องเต้น
กอมก้อผักไผ่ ไผว่ากลิ่นเหม็น เลือดลมไหลเวียน ดีแต๊
ไผซอบบ่าปีน กลิ่นหอมดีแต๊ กิ๋นเป๋นยาแก้ ขับลม
มีรสเผ็ดฮ้อน ใบอ่อนรสขม แก้บิดแก้ลม ต้มกิ๋นก็ได้
เอาหน่วยมาฝาน ตากฮ้านหิ้งไว้ กระหายเมื่อใด ต้มเต๊อะ
ฝักบ่าลิดไม้ กิ๋นได้เป่อเลอะ ดอกใบแยะเยอะ กิ๋นดี
มีรสหอมหวาน ปิ้งถ่านขัดสี กั๋บลาบลำดี ขมดีว่าอั้น
แถมใบผักจี ใบถี่เขียวสั้น เอามาหั่นหั่น ยุ่มพ๋อก
แคลเซียมก็หลาย ลาบควายลาบฮอก กั๋บใบบ่ากอก ตวยนา
วิตามินซี เอบีนักหนา สับป๊ะคุณยา ผญาจาวบ้าน
พริกแด้ดีปี๋ กิ๋นดีเลือดซว่าน ขับเลือดลมปราณ เตี้ยงแต๊
หอมด่วนสดใส กลิ่นใบหอมแต๊ ฮ้องสะระแหน่ กำไทย
ขับลมขับเหงื่อ ต๊องเฟ้อปุ๋มใส ต้มแก้ฮ้อนใน สดใสสร่างเศร้า
ไผซอบขมหวาน ลูกหลานต๋านเต้า เฟี้ยฟานก็เอา ซ้ำเม๋าะ
กั๋บลาบตึงแจ๋ว กิ๋นแล้วเหมือนเห๋าะ บ่ต้องลัดเลาะ ปลูกเอา
ปลูกแล้วใจ๋ใส่ ใบบ่เหี่ยวเฉา กิ๋นใบสดเอา สะเดาเปรียบได้
สะเลียมหวานขม แก้ลมแก้ไข้ บำรุงตางใน ดีนัก
ต้นสูงหลายเมตร เด๋ดใส่ยำผัก ใส่ดอกนักนัก ก็ลำ
หมั่นใส่ปุ๋ยคอก ดอกออกประจ๋ำ เอาใส่ผักยำ เป็นก๋ำก็เสี้ยง
ไผซอบผักแปม มาแอมข้างเขียง จิ๊นบ่ปอเปียง เสี้ยงลึ้ง
คนตี้ผอมแห้ง เป๋นยายแร้งทึ้ง ประสาทหมีนจึ้ง ก็ดี
ต้น-ใบมีหนาม หื้อซวามถี่ถี่ ใบอ่อนกิ๋นดี เขียวปี๋ตึงต้น
บะขูดเขียวใส จะไคเป๋นต้น บ่ดีลืมจ๋น ขว้างละ
ต๊องอืดอึดอัด ขับปัสสาวะ ต้มยำบ่ละ เนอนาย
แถมใบบัวบก ยกมาเป็นสาย คนเฒ่าญิงจาย ผักหนอกว่าอั้น
เจ๋บในเจ๋บนอก ผักหนอกมากั๊น ต้มกิ๋นตึงวัน ค่ำเจ๊า
กั๋บลาบซ้ำเน๋ด เด๋ดแผวตังเก๊า เซาะหาแอ๋บข้าว บ่ตัน
ดื่มสมุนไพร ใบเตยสีสัน หอมหอมมันมัน ตึงวันไจ้ไจ้
แก้เบาพิก๋าร เบาหวาน-พิษไข้ ดื่มแก้ฮ้อนใน ดีแต้
บำรุงหัวใจ๋ กษัยไต๋แป๊ ชูก่ำลังแน่ แฮงดี
ปี้น้องตังหลาย ญิงจายสุขี ผิวพรรณใสดี จีวีเตี้ยงมั่น
ลดละตังจิ๊น กิ๋นผักไม้นั้น อายุยืนยัน เหยียบร้อย
ผักบุ้งผักแคบ ถั่วแปบเป๋นฮ้อย แก๋งใส่ฮ้าหน้อย ก็ลำ
แก๋งผักเซียงดา ป๋าแห้งมา ต๋ำ เก๋บผักมายำ น้ำปู๋หน่อต้ม
น้ำพริกเป๋นลั๋ก ลวกผักล่มล่ม ต้องเขียวและขม เอาไว้
ผักปลอดสารพิษ ก๋ำบิ๋ดก๋ำไซ้ เขียวสดกิ๋นได้ เป๋นดี
ถ้าหวานขว้างไก๋ ละไว้ขมปี๋ กินเต๊อะตึงดี ตีฆายุมั่น
หวานจ้างเป๋นลม ขมเป๋นยาปั้น แก้บิดกิ้วตัน ก้าดแก๊ว
โรคาพยาธิ ประมาทก็แล้ว หายใจ๋แผ่วแผ่ว ก้อยลง
ป้องกั๋นเอาไว้ ใจ๋บ่ลุ่มหลง จิตใจ๋พะวง ปดป๋งตั๋วข้า
แป๋งใจ๋สุขสันต์ ม่วนงันตังหน้า อย่าไปอัตตา นักล้ำ
ฮักษาจิตใจ๋ ร่างก๋ายบ่จ๊ำ เตียวแอ่วเป๋นม่ำ ซ้ำดี
ทำสมาธิ สติ๋บ่หนี โมหะบ่ดี จีวีจะสั้น
โลภะห่างไก๋ จะไปยึดหมั้น ฮู้จั๋กแบ่งปั๋น เอาไว้
ความดีบ่สูญ ทำบุญนักไว้ ถือศีลไจ้ไจ้ อยู่เมิน
ทำดีหื้อนัก คนจั๋กสรรเสริญ บ้านเมืองเจริญ ห่างเหินบ้าใบ้
อ่านเจ๊าอ่านค่ำ จ๋ดจ๋ำหื้อได้ ผิดพลาดพลั้งไป โหสิ๋
วาดวางลง ป๋ดป๋งเต้านี้ เวลาเต้าอี้ ก่อนแหล่นายเฮย
@@@@@@
เทวาลี
ชมรมกวีล้านนาหละปูน
อาศรมคนยองหละปูน
28 สิงหาคม 2547
หมายเลขบันทึก: 464041เขียนเมื่อ 7 ตุลาคม 2011 10:19 น. ()แก้ไขเมื่อ 11 มิถุนายน 2012 18:22 น. () สัญญาอนุญาต: ครีเอทีฟคอมมอนส์แบบ แสดงที่มา-ไม่ใช้เพื่อการค้า-อนุญาตแบบเดียวกันจำนวนที่อ่านจำนวนที่อ่าน:
ความเห็น (1)
แว่นแก้ววันก่อน
แว่นแก้ววันนี้ (1สัปดาห์)
