สู่ขวัญนักเรียนใหม่
ศรี ศรีมื้อนี้แม่นมื้องาม ยามนี้แม่นยามดี พฤหัสฯไชยศรี สวัสดีลาโภ นโมพุทธายะ
ขอเดชเดชะเดโช องค์พุทโธ ธรรมโม สังโฆ ให้มาปกป้อง
คุ้มพี่คุ้มน้อง คุ้มหมู่นักเรียน ให้เจ้ามีแต่ความจำเริญเชิญชัย ...พู้นเด้อ
เออ.. มื้อนี้ผู้ข้าพ่อพราหมณ์สว่าง กะสิได้สู่ขวัญเอาชัย
ให้นักเรียนโรงเรียนอนุกูลนารี สังกัดสี……. ประจำปีการศึกษา 2554
บัดนี้ ผู้ข้าจึ่งขออัญเชิญเทวาธิราชไท้ทุกนาม ทุกสวรรค์ชั้นฟ้า
ได้โปรดลงมาประทานพร และอำนวยอวยชัย
ให้พิธีเป็นไปด้วยความราบรื่น ให้นักเรียนสดชื่น รื่นรมย์สำราญ
ให้เจ้าฮู้ทันการณ์มีจิตหาญกล้า อย่าสู่ได้เซ่อช้าให้รีบเร่งการเรียน
เออ... พวกเจ้าทั้งหลาย
บ่ว่าหญิงหรือชายกะได้มาพรั่งพร้อม เจ้าได้มานั่งล้อมอ้อมอยู่พาขวัญ
เฮ็ดได้ถูกเฮ็ดได้ควรสู่ขวัญน้องใหม่ พวกรุ่นพี่เจ้ากะเอาใจใส่ซ่อยประคับประครอง ขอให้พวกเจ้าทั้งผองมีแต่ความจำเริญ
อย่าสู่ได้เคอะเขิน ยามมาเรียนรู้ ขอให้เป็นผู้ฮู้ในศีลในธรรม
ฮู้จักเป็นผู้นำผู้ตามถูกต้อง เคารพความเป็นรุ่นพี่รุ่นน้อง หรือพวกหมู่เดียวกัน ฮู้ครูบาอาจารย์ผู้หลักผู้ใหญ่ ฮู้การมาการไปมีทรงมีวาด
ให้พวกเจ้ฉลาดสมปรารถนา ฮู้พุทโธ พุทธา พุทธัง พุทธะ
ฮู้จักธรรมมะ ธรรมโม ธรรมมัง ฮู้จักสังฆัง สังโฆ สังฆะ
ยึดเป็นสรณะ สมปัญญาชน เจ้าอย่าย่างนำคน ตดเหม็นท้องยื่ง
เขาสิตดใส่เจ้าให้ดังเว่อปึ่งเหม็น ของบ่อเป็นตาจ้ำ อย่าสู่จุ่มมือลง
ของบ่เป็นตากัดอย่ากินสิพวนท้อง ของบ่เป็นตาส้มอย่างมกินสิขมปาก
มันสิยากแก่ท้อง เที่ยวขี้ยังคืน เออ...พวกลูกหลานเอ้ย คันแนวใด๋มันยาก กะให้ค่อยคึดค่อยแก้ ค่อแก่ค่อยดึง ให้ค่อยขุดค่อยขนค่อยคนค่อยค้ำ ให้ค่อยทำการสร้างอย่าวางใจให้ฟ่าวแล่น ให้ค่อยอดค่อยแง้นมันสิได้ต่อนคำ เจ้าอย่าได้ล่วงล้ำ เฮ็ดสิ่งบ่ดี อีกจักหน่อย กะสิเรียนระดับปริญญาตรี ปริญญาโท ปริญญาเอก อย่าสู่ไปหลงเลขหลงหวยหลงเบอร์
เจ้าอย่าสู่ไปพลั้งเผลอนำแนวบ่แม่น อันใด๋เป็นกระพี้ อันใด๋เป็นแก่น กะต้องฮู้เท่าทัน เจ้าต้องขยันขันเกลียวเข้าไว้ ให้เจ้าเอาใจใส่การสูตรการเรียน ให้เจ้าอ่านเจ้าเขียนศึกษาค้นคว้า เจ้าอย่าลืมว่า ... ปมาโท มัจจุโนปทัง คือว่าความประมาทย่อมนำไปสู่ความตาย กัลยา ณ การี กัลยาณัง ปาปการี จะปาปกัง หมายความว่า ทำดีได้ดี ทำชั่วได้ชั่ว
ดังนั้น เจ้าอย่าได้ทำความชั่วให้ทำแต่ความดี ยกระดับอนุกูลนารี ให้ชื่อเสียงสูงส่ง อย่าเป็นคนหยิบโหย่ง ให้มีคุณธรรม จบออกไปแล้วต้องกล้าเป็นผู้นำสังคมเขาได้ หรือพร้อมเข้ารับใช้สังคม องค์กร นี่กะแม่นคำสอนหรือเป็นคำแนะนำ พวกลูกหลานทั้งหลาย ให้เจ้าจดเจ้าจำคิดนำไปใช้ แล้วพวกเจ้าสิได้จำเริญจำเริญ…
เออ...บัดนี้พ่อพราหมณ์กะสิขอเชิญพวกเจ้าทั้งหลาย
พากันฮ้องเอาขวัญ ... ว่ามาเด้อขวัญเอ้ย ขวัญอยู่แข่งกะให้เจ้ามาลีลาลีลา ขวัญอยู่ขากะให้เจ้ามาลีล่ายลีล่าย ขวัญอยู่แขนขวาแขนซ้าย กะให้มาเต้ามาโฮม ทั้งขวัญนมขวัญคางขวัญเอวบางท้องกิ่ว
ทั้งขวัญคิ้วและขวัญตา ขวัญกายางามดี กะให้เจ้ามาเสียมื้อนี้วันนี้ ...ว่ามาเด้อขวัญเอ้ย
ขวัญเจ้าไปเที่ยวพาซ่าจนเพลิน ขวัญไปเดินห้างโลตัส หรือขวัญไปเที่ยวเลาะลัดซื้อสินค้าอยู่ที่คลองถม กะว่ามาเสียมื้อนี้วันนี้ ...ว่ามาเด้อขวัญเอ้ย ขวัญเจ้าปีนข้ามฮั้วโดดเรียนหนีก่อนเวลา กะว่ามาเสียมื้อนี้วันนี้ ขวัญเจ้ามาสวยบ่ทันหมู่ ขวัญไปอยู่สถานบันเทิง เที่ยวเล่นดึก ๆ ดื่น ๆ อดหลับอดนอนกะว่ามาเสียมื้อนี้วันนี้ ...ว่ามาเด้อขวัญเอย
ขวัญหนีไปม่วนอยู่แถวใด๋ กะให้มาไวไว
มาหามาสู่ ให้เจ้ารีบมาอยู่ในเนื้อในคีง
มาค้นหาความจริงมาเฮียนมาฮู้ มาเป็นผู้รอบรู้ทั้งทางโลกทางธรรม
หมอพราหมณ์จึ่งขอเชิญพวกเฮาพากันฮ้องน่ำน่ำ น่ำน่ำ น่ำน่ำ.ว่ามาเด้อขวัญเอ้ยเออ...ครั้นขวัญมาแล้วหมอพราหมณ์สว่าง กะสิแถมพร
สิทธิการิยะ ตถาคโต สิทธิลาโภ นิรันตรัง สิทธิเตโช ชโยนิจจัง
ขอให้พวกเจ้าทั้งหลาย จงมีโชคลาภตลอดไป และมีเดชมีชัยตลอดกาล
เงินกะให้ไหลกอง ทองไหลมา เพชรนิลจินดากะให้ไหลสู่
โชคและลาภไหลเข้าทั้งเช้าและแลง ไปทางหน้ากะอย่าให้มีคนซัง
ไปทางหลังกะให้มีคนย้อง ญาติพี่น้องนับหน้าถือตา
มีอำนาจวาสนาลื่นล้นคนย้องทั่วเมือง นอนหลับให้เจ้าได้เงินพัน
นอนฝันกะให้เจ้าได้เงินหมื่น นอนตื่นกะให้เจ้าได้เงินแสน
แบนมือไปให้ได้เงินล้าน เงินทองไหลเข้าบ้านรวยล้นเป็นเศรษฐี
สอบแต่ละปี แต่ละภาคการศึกษา อย่ามี ร มผ หรือมี 0
ให้เจ้าโชคและหมานแต่ เกรด 4 4 4 และ 4 ล้วนล้วนครวญค่าแก่ทุกคนเด้อ
ไชยตุภวังค์ ไชยมังคลัง ก็ข้าเทอญ
นะโมพุทธายะ นะมะพะทะ จะพะกะสะ นะมะอะอุ สาธุ สาธุ สาธุ.
สว่าง ไชยสงค์ / เรียบเรียงl
สุดยอดเลยครับผมขออนุญาติเอาไปเป็นแนวทางเด้อครับ