น้ำเมี่ยงของกินบ่าเก่า
น้ำเมี่ยงของกินบ่าเก่า
น้ำเมี่ยง.........เป๋นของกิ๋นพื้นบ้านล้านนา โบราณขนานแต๊ดั้งเดิม บ่ามีในภาคอื่น คนรุ่นใหม่บ่าไค่ฮู้จักแล้ว
...น้ำเมี่ยงเป๋นน้ำตี้นึ่งจากใบเมี้ยง เมื่อไอน้ำผ่านเมี้ยง หยดน้ำพร้อมกลิ่นเมี้ยง จะย้อยลงหม้อนึ่ง ตังลุ่ม กว่าจะนึ่งเมี้ยงหมด น้ำในหม้อนึ่ง ก่อเข้มข้น เอามาเคี่ยวต่อจ๋นได้ตี้แล้วตักใส่กระบอกไม้ไผ่เก็บไว้ไจ้ได้เป๋นปี๋ ตักมาแป๋ง น้ำเมี้ยงคั่วกิ๋นกำหน้อยๆ......ผ่อน้ำเมี้ยงในถ้วย สีออกเทาดำ เหมือนจะ แป๋งง่ายๆ แต่ว่า บ่าง่ายเน้อ...
เครื่องปรุง น้ำเมี้ยง.......น้ำเมี้ยง ข้าวคั่ว จั๊กไค หอมแดง หอมเตียม ขิง พริกแห้ง กะปิ แคบหมู
วิธีทำ.....เอา พริกแห้ง+หอมแดง+หอมเตียม+กะปิ มาต๋ำจ๋นละเอียด.....ข้าวคั่ว เอาข้าสาร(เหนียว)ผสมข้าวสาร(จ้าว)สักหน้อย ลงคั่วไฟอ่อนๆ ใส่น้ำลงไปน่อย คั่วจ๋นเม็ดข้าวเหลือง แล้วก่อเอาไปตำ จ๋นละอียด......ซอย จั๊กไค+หอมแดง เป๋นแว่นบาง ซอยขิงเป๋นเส้นๆ แล้วก่อเอาลง เจียวน้ำมัน ทีละอย่าง จ๋น เหลือง ส่งกลิ่นหอม ตักใส่ถ้วยไว้เป๋น อย่างๆ......แล้วก่อ เอา แคบหมู มาต๋ำ เบาๆ จ๋นเป็น ชิ้นเล็กๆ บ่าต้องหื้อป่น
เมื่อเตรียมเครื่องกู้อย่างแล้ว ก่อเอาน้ำใส่หม้อต้มหื้อเดือด ตักน้ำเมี้ยง จากกระบอกไม้ไผ่ ใส่ลงหม้อ สัก1-2ช้อน คนหื้อเข้ากั๋น ... เอาพริกแกง ตี้ต๋ำไว้ ผัดน้ำมันหื้อหอม แล้วก่อเทน้ำเมี้ยง ตี้ต้มจ๋นเดือดแล้วลงไป ในหม้อขาง คนหื้อเข้ากั๋น แล้วก็ ค่อยๆ ใส่ จั๊กไค+หอมแดง+ขิง ตี้เจียวไว้ ลงในหม้อขาง เหลือไว้อย่างละหน้อย เอาไว้อ่อยหน้า แล้วก็ เอาข้าวคั่ว โรยลงไป คนเรื่อยๆ พอใส่ข้าวคั่วแล้ว จะเริ่มข้น เหนียว หื้อคน เรื่อยๆ บ่าอั้น จะติดก้นหม้อ ไหม้ ถ้าข้นเกินไป ก่อใส่น้ำมันลงไป จ๋นสุกได้ตี้ ก่อ ตักใส่ถ้วย อ่อยหน้า ด้วย แคบหมู+หอมแดงเจียว+หอมเตียวเจียว เป๋นอันเสร็จพิธี แป๋ง น้ำเมี้ยงคั่วแล้วละเจ้า
ความเห็น (1)
อยากรู้ว่า ตอนที่น้ำน้ำใส่หม้อต้มให้เดือด พอจะบอกได้ไหม ว่าต้องใช้หม้อขนาดไหน หรือว่าเติมน้ำลงไปเท่าไหร่ เพราะว่าตอนนี้กำลังทำโปรเจคเกี่ยวกับการพัฒนาน้ำเมี่ยงโดยตรง ถ้าเป็นไปได้ก็อยากจะทราบที่เป็นปริมาณที่แน่นอนเลย และถ้าจะขอรบกวนแบบว่า พอจะแนะนำเว็บที่เกี่ยวกับน้ำเมี่ยงได้ไหมคะ เพราะข้อมูลที่มีอยู่ตอนนี้มีไม่มากเท่าไหร่
ขอรบกวนด้วยนะคะ