ຈາກທ່ານ sam ວັນທີ 20 ກັນຍາ 2012 :
1.ສະບາຍດີ ສະຫາຍທີນັບຖື ປັດຈຸບັນນີ້ window ທີ່ນຳໃຊ້ໃນ computer ກໍ່ມີຫຼາຍຮູບແບບ, ເວີຊັນ ແລະ ມາໃໝ່ເລື້ອຍໆ ອັນເປັນສາເຫດທີ່ເຮັດໃຫ້ເຮົາລົງ window ໃໝ່ໄປເລື້ອຍໆ. ຢາກຮູ້ວ່າ ອັນທີ່ເຮົາລົງ window ຫຼາຍໆຄັ້ງຫຼາຍໆເທື່ອນັ້ນ ຈະມີຜົນແນວໃດຕໍ່ກັບ computer, harddisk ຫຼື mainboard ແລະ ອື່ນໆ.
2.ການທີ່ເຮົາລົງ window ໃໝ່ກັບ computer ທີ່ເຄີຍຕິດ virus, virus ນັ້ນຈະຕາຍ, ຈະຫາຍ ຫຼື ບໍ? ໂດຍທີເຮົາບໍ່ໄດ້ຕິດຕັ້ງ Antivirus scan ແລະ ບໍ່ໄດ້ຂ້າດ້ວຍວິທີອື່ນ.
(ຂອບໃຈທີ່ທ່ານໃຫ້ຄວາມກະຈ່າງແຈ້ງ)
ຕອບ: 1.ໃນການລົງ Windows ຫຼາຍໆຄັ້ງ ມັນຈະບໍ່ສົ່ງຜົນຫຍັງຕໍ່ກັບອຸປະກອນຄອມພິວເຕີ ບໍ່ວ່າຈະເປັນ harddisk mainboard VGA card ... ເພາະອຸປະກອບທຸກຢ່າງມັນມີການເສື່ອມສະພາບຂອງມັນເອງຢູ່ແລ້ວ (ເວົ້າສະເພາະໃນການລົງ Windows ແລະ ການ Format ແບບປົກກະຕິ ເທົ່ານັ້ນ!)
2. ການລົງ Windows ໃນຄອມທີ່ເຄີຍຕິດ Virus ນັ້ນ ອາດຈະຂ້າໄດ້ສະເພາະ Virus ຊະນິດທີ່ບໍ່ຮ້າຍແຮງ ເພາະການລົງ Windows ໃໝ່ ສ່ວນຫຼາຍເຮົາມັກຈະ Format ຊ່ອງ C: ເທົ່ານັ້ນ ແຕ່ Virus ບາງຊະນິດອາດຝັງໂຕໃນຊ່ອງ D: ຫຼື E: (ຖ້າມີ harddisk ຫຼາຍໜ່ວຍ ຫຼື ມີການແບ່ງ Partition ຫຼາຍຊ່ອງ) ຊຶ່ງກໍ່ອາດຈະຕິດ Virus ໄດ້ອີກຄັ້ງ.
Hard disk ແມ່ນອຸປະກອນທີ່ໃຊ້ເກັບຂໍ້ມູນ ຊຶ່ງມີມາດຕະຖານຫຼາຍແບບດ້ວຍກັນ Hard disk ຫຼື Hard drive ເປັນອຸປະກອນຫຼັກທີ່ໃຊ້ໃນການເກັບຂໍ້ມູນຂອງ Operating system (OS) ຫຼື Windows ນັ້ນເອງ ລວມທັງໂປຣແກຣມຕ່າງໆ ແລະ ຂໍ້ມູນສ່ວນຕົວຂອງຜູ້ໃຊ້ ໜ່ວຍຄວາມຈຸຂອງ Hard disk ຄິດໄລ່ເປັນ Gigabyte (GB) ປັດຈຸບັນ Hard disk ມີສອງຮູບແບບຄື ຮຸ່ນໃໝ່ມີຊື່ວ່າ Serial ATA (SATA) ບາງທ່ານເອີ້ນວ່າ ຊາຕາ ແລະ ອີກຮຸ່ນເກົ່າ ແບບ IDE (Integrated Drive Electronics) ເອີ້ນວ່າ ໄອດີອີ ທັງສອງແບບໃຊ້ສາຍສັນຍານ ແລະ ສາຍໄຟໃນການເຊື່ອມຕໍ່ທີ່ແຕກຕ່າງກັນ ໃນການເລືອກໃຊ້ງານ ຕ້ອງໄດ້ກວດກາເບິ່ງ Mainboard ວ່າຮອງຮັບການທຳງານກັບ Hard disk ແບບໃດ ເຮົາມາເບິ່ງໜ້າຕາ (ຕາມພາບ) ແລະ ຮູບແບບການເຊື່ອມຕໍ່ຂອງແຕ່ລະຮຸ່ນກັນເລີຍນໍ!
IDE (Integrated Drive Electronics)
ແບບທຳອິດແມ່ນ IDE ເປັນແບບທີ່ມີການນຳໃຊ້ກັນມາຍາວນານ ຈົນຮອດປັດຈຸບັນກໍ່ຍັງຊອກຊື້ມາໃຊ້ງານໄດ້ຢູ່ ມີຄວາມສາມາດບັນຈຸຕັ້ງແຕ່ 40-500GB ສ່ວນປະກອບທີ່ຈຳເປັນມີສີ່ສ່ວນດ້ວຍກັນ ຄື IDE Port ຢູ່ທີ່ໂຕເມນບອດ, ສາຍສັນຍານ 80 pin IDE, Power connector ແລະ ກໍ່ໂຕ hard disk IDE ນັ້ນເອງ.
Serial ATA (Advanced Technology Attachment)
ເປີດໂຕຄັ້ງທຳອິດໃນວັນທິ 26 ມິຖຸນາ 2002 ໃນງານ PC EXPO ທີ່ New York ປະເທດສະຫະລັດອາເມລິກາ ຫຼັງຈາກທີ່ມີການນຳສະເໜີ Parallel ATA (IDE) ດົນກວ່າ 20 ປີ ລວມທັງເຕັກໂນໂລຊີອື່ນໆທີ່ເຮັດໃຫ້ການອ່ານຂໍ້ມູນໄດ້ໄວຂຶ້ນ ແລະ ພັດທະນາເຕັກໂນໂລຊີ Serial ATA ຂຶ້ນມາແທນຮາດດິສແບບ IDE ຊຶ່ງ Serial ATA ມີຄວາມໄວໃນການເຂົ້າເຖິງຂໍ້ມູນຮອດ 150 Mbytes ຕໍ່ວິນາທີ ແລະ ໃຫ້ຜົນຕອບສະໜອງໃນການທຳງານໄດ້ໄວຫຼາຍ ໃນພາກສ່ວນຂອງຈຳນວນ Pin ໜ້ອຍກວ່າ Parallel ATA ສ່ວນການເຊື່ອມຕໍ່ກໍ່ຈະຄ້າຍຄືກັບແບບ IDE ແຕ່ຈະແຕກຕ່າງກັນຢູ່ທີ່ໜ້າຕາ Connector ຂອງສາຍໄຟ ແລະ ສາຍສັນຍານເທົ່ານັ້ນ.
ເມື່ອເບິ່ງຄວາມແຕກຕ່າງທາງດ້ານກາຍຍະພາບເຮົາຈະເຫັນວ່າ Hard disk ແບບ IDE ແລະ SATA ຈະມີການເຊື່ອມຕໍ່ທີ່ແຕກຕ່າງກັນຢ່າງຂາດຂັ້ນ ເຊັ່ນ ດ້ານ Connector ຂອງ Hard disk ຮວມທັງ Mainboard ໄປຈົນເຖິງສາຍສັນຍານ ແລະ ສາຍໄຟທີ່ໃຊ້ໃນການເຊື່ອມຕໍ່ ສະນັ້ນ ຖ້າຫາກວ່າຕ້ອງການຊື້ Hard disk ມາໃຊ້ງານ ກໍ່ຕ້ອງມີການສຳຫຼວດກ່ອນວ່າ Mainboard ດັ່ງກ່າວນັ້ນ ຮອງຮັບກັບ Hard disk ແບບໃດ.
Connector ຢູ່ໃນໂຕ Mainboard ຂອງ Interface ທັງສອງແບບ ກໍ່ຈະມີຮູບຮ່າງໜ້າຕາທີ່ແຕກຕ່າງກັນ ເຊັ່ນ SATA ຈະກຳນົດໃຫ້ 1 Connector ສາມາດຕໍ່ Hard disk ໄດ້ພຽງໜ່ວຍດຽວເທົ່ານັ້ນ ສ່ວນ IDE ໃນ 1 Connector ສາມາດເລືອກເອົາໄປຕໍ່ກັບ Hard disk ຫຼື CD-ROM ຫຼື ທັງສອງຢ່າງຮ່ວມກັນກໍ່ໄດ້ ແຕ່ບໍ່ເກີນ 2ຢ່າງ Mainboard ໃນປັດຈຸບັນ ນິຍົມໃຫ້ Port SATA ມາຫຼາຍອັນ ແຕ່ມັກຈະໃຫ້ IDE ມາພຽງອັນດຽວ ສຳລັບເພື່ອຕໍ່ CD-ROM ຊຶ່ງອາດຈະມີບັນຫາ ຫາກຕ້ອງຕໍ່ໃຊ້ງານຮ່ວມກັບ Hard disk ແບບ IDE ດັ່ງນັ້ນ ຖ້າວ່າຕ້ອງການຈະ Upgrade ເຄື່ອງ ກໍ່ຕ້ອງໄດ້ເບິ່ງໃນພາກສ່ວນນີ້ນຳ.
ສາຍສັນຍານຂອງ Hard disk ແບບ IDE ຈະລັກສະນະເປັນສາຍ Parallel ຫຼືມັກຮ້ອງກັນຕິດປາກວ່າ “ສາຍແພ” ເຊິ່ງສາຍແພທີ່ວ່ານີ້ ກໍ່ມີຢູ່ສອງແບບ ຄືແບບ 40 Pin (40 ເສັ້ນ) ແລະ 80 Pin (80 ເສັ້ນ) ໂດຍສາຍແບບ 40 Pin ນັ້ນຈະນຳໄປໃຊ້ສຳລັບ CD Drive ແລະ DVD Drive ສ່ວນ 80 Pin ຈະໃຊ້ກັບ Hard disk ຊຶ່ງບໍ່ແນະນຳໃຫ້ໃຊ້ງານສະຫຼັບກັນ ເຖິງວ່າຈະໃຊ້ແທນກັນໄດ້ກໍ່ຕາມ.
ດັ່ງທີ່ໄດ້ກ່າວກ່ອນໜ້ານີ້ວ່າ 1Connector ຂອງ IDE ສາມາດຕໍ່ກັບອຸປະກອນແບບ IDE ໄດ້ສອງຢ່າງ ສາຍທີ່ໃຊ້ຕໍ່ກໍ່ເລີຍຖືກອອກແບບໃຫ້ສາມາດໃຊ້ກັບອຸປະກອນສອງຢ່າງຕາມທີ່ກຳນົດ ໂດຍປາຍດ້ານໜຶ່ງຈະຖືກເຊື່ອມຕໍ່ເຂົ້າກັບ Mainboard ແລະ ຫົວທີ່ເຫຼືອຈະເຊື່ອມຕໍ່ເຂົ້າກັບອຸປະກອນ IDE ຊຶ່ງກໍ່ຈະແມ່ນ Hard disk ຫຼື CD-ROM ໂດຍເຮົາອາດຈະຕໍ່ພຽງແຕ່ອຸປະກອນ IDE ໜ່ວຍດຽວ ຫຼື ສອງໜ່ວຍ ເພື່ອໃຊ້ງານຮ່ວມກັນກໍ່ໄດ້ ແຕ່ກໍ່ມີຄຳເຕືອນໜຶ່ງວ່າ ບໍ່ແນະນຳໃຫ້ຕໍ່ CD-ROM ກັບ Hard disk ໃຊ້ງານຮ່ວມກັນ ເພາະຈະເຮັດໃຫ້ຄວາມໄວໃນການທຳງານຂອງ Hard disk ຫຼຸດລົງ ຄວນຕໍ່ອຸປະກອນ IDE ຊະນິດດຽວກັນໄວ້ນຳກັນເທົ່ານັ້ນ ໃນການເຊື່ອມຕໍ່ສາຍ ເນື່ອງຈາກວ່າມີອຸປະກອນຕໍ່ຮ່ວມກັນຢູ່ໃນສາຍດຽວ ດັ່ງນັ້ນ ຈຶ່ງຈຳເປັນຕ້ອງມີການກຳນົດການທຳງານຂອງອຸປະກອນອອກເປັນ Master ແລະ Slave ເພື່ອລະບຸໂຕອຸປະກອນສຳລັບທຳງານ ດັ່ງນັ້ນ ເວລາຕໍ່ສາຍເຮົາຕ້ອງຄຳນຶງວ່າ ເຮົາໄດ້ກຳນົດໃຫ້ອຸປະກອນໂຕໃດເປັນ Master ແລະ Slave ເພື່ອໃຫ້ອຸປະກອນທຳງານໄດ້ດີ.
Hard disk ແບບ IDE ຈຳເປັນຕ້ອງ Set Jumper ເພື່ອລະບຸການທຳງານຂອງອຸປະກອນ ວ່າ ເປັນແບບ Master ຫຼື Slave ປົກກະຕິຈະມີການລະບຸຂອງການ Set Jumper ຢູ່ເທິງໜ່ວຍອຸປະກອນ ຫຼືຫາກວ່າບໍ່ມີ ກໍ່ສາມາດຊອກເບິ່ງໄດ້ໃນຄູ່ມືທີ່ມາກັບ Hard disk ເພື່ອໃຫ້ເຮົາສາມາດ Set Jumper ໃຫ້ຖືກຕາມທີ່ກຳນົດ ຫຼັງຈາກນັ້ນກໍ່ນຳເອົາສາຍ IDE ແລະ ສາຍໄຟມາຕໍ່ ກໍ່ສາມາດທຳງານໄດ້ ຫຼື ຖ້າຫາກບໍ່ຕ້ອງການລະບຸເອງ ເຮົາກໍ່ສາມາດກຳນົດໃຫ້ເປັນ CS (Cable Select) ຊຶ່ງຈະເປັນການລະບຸທີ່ໂຕ Connector ຂອງສາຍ IDE ແທນ ຖ້າຫາກອຸປະກອນໂຕໃດຕໍ່ຢູ່ກັບ Connector ທີ່ເປັນ Master ອຸປະກອນໂຕນັ້ນກໍ່ຈະກາຍເປັນ Master ໂດຍອັດຕະໂນມັດ ແຕ່ສຳລັບ SATA ບໍ່ຈຳເປັນຕ້ອງກຳນົດ Jumper ເພາະວ່າ Hard disk ໜຶ່ງໜ່ວຍ ໃຊ້ Port SATA 1 Port.
Hard disk ແບບ SATA ຈະເປັນສາຍເສັ້ນດຽວ ທີ່ດ້ານໜຶ່ງຈະເຊື່ອມຕໍ່ເຂົ້າກັບ Mainboard ແລະ ສ່ວນປາຍອີກດ້ານໜຶ່ງຈະເຊື່ອມຕໍ່ເຂົ້າກັບ Hard disk ແບບ SATA ຂໍ້ດີຂອງການເຊື່ອມຕໍ່ແບບນີ້ກໍ່ຄື ຄວາມເປັນລະບຽບຮຽບຮ້ອຍຂອງສາຍ ເພາະວ່າສາຍດັ່ງກ່າວມີຂະໜາດນ້ອຍ ເຮັດໃຫ້ການຈັດວາງສາຍໃຊ້ເນື້ອທີ່ໃນ Case ໜ້ອຍ.
ເບີ່ງຄືວ່າ (Microsoft) ຈະໄດ້ຢືມແນວຄວາມຄິດເມື່ອຄັ້ງທີ Steve JOBS ປ່ຽນແປງຜະລິດຕະພັນຕ່າງໆຂອງ Apple ໃຫ້ເຫຼືອໜ້ອຍທີ່ສຸດ ເພື່ອໃຫ້ລູກຄ້າຕັດສິນໃຈໄດ້ງ່າຍ ເນື່ອງຈາກກ່ອນໜ້ານີ້ Windows ຈະມາພ້ອມກັນຫຼາຍ ເວີເຊິນໃຫ້ລູກຄ້າເລືອກຈົນສັບສົນ ເຊັ່ນ Starter, Home, Basic, Home Premium, Ultimate, etc. ແຕ່ ບັນຫານີ້ຈະບໍ່ເກີດຂຶ້ນກັບລະບົບ ປະຕິບັດການຮຸ່ນໃໝ່ ກໍຄື Windows 8 ທີ່ຈະເປີດໂຕ ໄລຍະໄຕມາດທີ່ສາມຂອງ ປີນີ້...
ບັນຫາໂຕເລືອກທີ່ຫຼາຍເກີນໄປຂອງ Windows ຍັງເປັນແຮງຊຸກຍູ້ໃຫ້ລູກຄ້າໃໝ່ຫັນໄປໃຊ້ Mac ແທນ ຊຶ່ງຫຼັງຈາກທີ່ Microsoft ເບິ່ງເຫັນບັນຫາດັ່ງກ່າວແລ້ວ ບໍລິສັດຈຶ່ງໄດ້ວາງກົນລະຍຸດໃໝ່ໃຫ້ກັບ Windows 8 ໂດຍການເຮັດໃຫ້ ມັນມີພຽງ 3ເວີເຊິນເທົ່ານັ້ນ.
Windows 8 ຖ້າເອິ້ນສັ້ນໆພຽງເທົ່ານີ້ ແມ່ນໝາຍເຖິງ Windows 8 ສຳລັບຮາດແວຄອມພິວເຕີທີ່ທຳງານດ້ວຍ Processor x86 ທັງ Desktop ແລະ Notebook ໂດຍຈະມາພ້ອມກັບຄຸນສົມບັດທີ່ຈຳເປັນສຳລັບຜູ້ໃຊ້ ຊຶ່ງລວມທັງ Interface ໃໝ່ ເຊັ່ນ Metro UI ທີ່ເພີ່ມຂຶ້ນມາ ນອກຈາກ Desktop UI ອີກດ້ວຍ.
Windows 8 Pro ສຳລັບເວີເຊິນ Pro ແມ່ນເໝາະສົມກັບຜູ້ໃຊ້ທີ່ຕ້ອງການປະສິດທິພາບການທຳງານທີ່ເໜືອກວ່າ ໂດຍສະເພາະກຸ່ມທຸລະກິດ ເນື່ອງຈາກມີ Function ເຊັ່ນ ການເຂົ້າລະຫັດ Virtualization ແລະ ການຈັດການ PC ຈະເວົ້າໄປແລ້ວ Windows 8 Pro ໜ້າຈະເອິ້ນວ່າ Windows 8 Enterprise ຫຼາຍກວ່າ ແຕ່ຖ້າຫາກໃສ່ຊື່ນີ້ ມັນກໍເທົ່າກັບວ່າຕັດກຸ່ມລູກຄ້າຕາມບ້ານ ຫຼື ທຸລະກິດຂະໜາດນ້ອຍໄປນັ້ນເອງ.
Windows 8 RT ຫຼືເປັນທີ່ຮູ້ຈັກກັນດີໃນອີກຊື່ໜຶ່ງວ່າ Windows On ARM ເວີເຊິນນີ້ ກໍຈະໝາຍເຖິງ Windows 8ທີ່ສຳລັບໃຊ້ Run ໃນອຸປະກອນ ເຊັ່ນ "ແທັບເລັດ" (Tablet) ທີ່ທຳງານດ້ວຍ Processor ARM (Qualcomm, Motorola ແລະ Nvidia) ທີ່ເໝາະກັບຜູ້ໃຊ້ທີ່ຕ້ອງການ Run Windows 8 ໃນ Tablet ໂດຍສະເພາະ RT (Run Time) ຊຶ່ງໝາຍລະບົບນິເວດການທຳງານໃໝ່ ແລະ ການໃຊ້ງານ Metro UI ໃນ Tablet.
ຂໍ້ມູນການຊີ້ແຈງເວີເຊິນຂອງ Windows 8 ນີ້ ມາຈາກ Blog ທີມພັດທະນາ Windows ສ່ວນຜູ້ທີ່ໃຊ້ Windows 7 ເມື່ອຕ້ອງການ Upgrade ຈະຕ້ອງເລືອກລະຫວ່າງ Windows 8 ຫຼື Windows 8 Pro ໃນຂະນະທີ່ Windows 8 RT ຈະຕິດຕັ້ງມາພ້ອມກັບອຸປະກອນຢູ່ແລ້ວ ກ່ອນໜ້ານີ້ມີຂ່າວລື ຫຼັງຈາກທີ່ Windows 8 Consumer Preview ເປີດໂຕອອກມາວ່າ Microsoft ຈະອອກ Windows 8 ມາໃຫ້ເລືອກນັບຕັ້ງແຕ່ Home Basic ໄປຈົນເຖິງ Professional Plus ລວມທັງໝົດ 9 ເວີເຊິນ ຊຶ່ງແນ່ນອນວ່າຜູ້ບໍລິໂພກຈະຕ້ອງຮູ້ສຶກບໍ່ດີໃຈ ການຊີ້ແຈງຂໍ້ມູນກ່ຽວກັບເວີເຊິນຫຼ້າສຸດທີ່ເຫຼືອພຽງ 3 ເວີເຊິນນີ້ ກໍໜ້າຈະເປັນຂ່າວດີສຳລັບຜູ້ໃຊ້ ແລະ ເປັນໂອກາດຂອງ Windows 8 ນັ້ນເອງ.
ໃນນີ້ຈະສະເໜີບາງຄຳສັບໄອທີ (IT = Information Technology) ພາສາອັງ (ໃນຕົວຈິງອາດມີຫຼາຍກວ່ານີ້) ທີ່ຕ່າງກັນໜ້ອຍດຽວ ແຕ່ໃຊ້ແທນກັນໄດ້...
Notebook / Laptop
ເຊື່ອວ່າຫຼາຍຄົນຄົງໄດ້ຍິນສອງຄຳນີ້ມາພໍສົມຄວນ ຊຶ່ງໃນລາຍລະອຽດເລິກໆແລ້ວຕ່າງກັນໜ້ອຍດຽວເທົ່ານັ້ນ ເພາະມີຈຸດກຳເນີດທີ່ແຕກຕ່າງກັນ (ຖ້າອະທິບາຍລະອຽດ ກໍຄົງກິນເນື້ອທີ່ຫຼາຍກວ່ານີ້) ປັດຈຸບັນສອງຄຳນີ້ມີຄວາມຄືກັນຢ່າງຊັດເຈນ ໂດຍຄຳວ່າ Laptop ມາຈາກ ຄອມພິວເຕີຕັ້ງຕັກ (ວາງເທິງຕັກໄດ້) ຊຶ່ງພື້ນຖານກໍມາຈາກ ຄອມພິວເຕີຕັ້ງໂຕະ (Desktop Computer) ທີ່ຫຍໍ້ສ່ວນລົງມາ.
ຄຳທີ່ນິຍົມໃຊ້ Notebook
Software / Program (US) , Programme (UK)
ສອງຄຳນີ້ ຄືກັນຢ່າງຊັດເຈນ ຊຶ່ງບາງຄົນກໍເອີ້ນ “ຊອບແວ” ບາງຄົນກໍວ່າ “ໂປຣແກຣມ” ຕ່າງປະເທດກໍເຊັ່ນກັນ ຄຳວ່າ “ໂປຣແກຣມ” ມີຮາກສັບມາຈາກພາສາ ເກຼັກ ແຕ່ຄຳວ່າ “ໂປຣແກຣມ” ອາດມີຄວາມໝາຍກວ້າງກວ່າ ຄື ອາດໝາຍເຖິງກຳນົດການຕ່າງໆຂອງແຜນງານ ສ່ວນຄຳວ່າ “ຊອບແວ” ໝາຍເຖິງໂປຣແກຣມ ຫຼື ສິ່ງທີ່ຖືພັດທະນາຂຶ້ນມາເພື່ອໃຊ້ກັບຄອມພິວເຕີເທົ່ານັ້ນ ສຸດທ້າຍສະຫຼຸບໄດ້ວ່າ ຄືກັນ ແລະ ໃຊ້ແທນກັນໄດ້.
ຄວາມຮູ້ເສີມ: ບາງຄົນອາດສົງໃສວ່າ ຄຳວ່າ “ແອບພຣິກເຄຊັນ” (Application) ຫຼື ຮ້ອງສັ້ນໆວ່າ “ແອບ” ນັ້ນແມ່ນໝວດຍ່ອຍຂອງຊອບແວອີກຂັ້ນໜຶ່ງ ຊຶ່ງໝວດຫຼັກໆຂອງຊອບແວ ແບ່ງອອກເປັນສອງສ່ວນນ້ອຍຫຼັກໆ ຄື ຊອບແວບໍລິຫານຈັດການລະບົບ (System Software) ເຊັ່ນ ລະບົບປະຕິບັດການທີ່ເຮົາລຶ້ງເຄີຍດີ Windows, Mac OS, Linux ຖ້າຢູ່ໃນສະມາດໂຟນ ກໍແມ່ນ iOS, Android, BlackBerry ເປັນຕົ້ນ ແລະ ອີກພາກສ່ວນໜຶ່ງຄື ພວກຊອບແວ“ປະຍຸກ” (Application Software) ເຊັ່ນ MS-Office, Internet Explorer, Adobe Photoshop ແລະ ໂປຣແກຣມອື່ນໆອີກ.
ຄຳທີ່ນິຍົມໃຊ້ Program
USB Flash Drive / Thumb Drive
ຄົນໄອທີແມ່ນຮູ້ຈັກດີ ແລະ ຂາດບໍ່ໄດ້ ຊຶ່ງສ່ວນຫຼາຍຈະມີລັກສະນະສີ່ຫຼ່ຽມນ້ອຍໆ ສຽບໃສ່ພອດ USB ເອກະລັກສະເພາະຂອງມັນແມ່ນເອົາໄວ້ໃຊ້ເປັນອຸປະກອນເກັບຂໍ້ມູນແບບພົກພາ ມີຂະໜາດນ້ອຍ ນ້ຳໜັກເບົາ ລັກສະນະໃຊ້ງານຄ້າຍຄືກັບ Floppy Disk ຫຼື ແຜ່ນ CD ແຕ່ ສິ່ງນີ້ໃຊ້ໜ່ວຍຄວາມຈຳແບບແຟຣດ ຂໍ້ດີຄື ບໍ່ຕ້ອງມີຫົວອ່ານຂໍ້ມູນທີ່ຊັບຊ້ອນ ຮຸ່ນທຳອິດທີ່ຜະລິດອອກມາມີຊື່ວ່າ Thumb Drive ສະຫຼຸບຄື ຄຳວ່າ Flash Drive ແມ່ນຊື່ທີ່ເອີ້ນຢ່າງເປັນທາງການຂອງອຸປະກອນນີ້ ແຕ່ Thumb Drive ແມ່ນຊື່ທາງການຄ້າຂອງບໍລິສັດຜູ້ຜະລິດລາຍໜຶ່ງ ນອກຈາກນີ້ແລ້ວ ກໍຍັງມີຊື່ທາງການຄ້າອື່ນອີກເຊັ່ນ Handy Drive, Data Drive, Key Drive ແລະ ອື່ນໆ.
ຄຳທີ່ນິຍົມໃຊ້ Flash Drive (ຄົນລາວສ່ວນຫຼາຍເອິ້ນສັ້ນໆວ່າ USB ເພາະໃຊ້ສຽບໃສ່ຮູ USB)
System board / Motherboard
ແຜ່ນວົງຈອນໄຟຟ້າຫຼັກຂອງເຄື່ອງຄອມພິວເຕີ ທີ່ທຸກໆເຄື່ອງຕ້ອງມີ ເຊັ່ນ ຄອມພິວເຕີ ຕັ້ງໂຕະ ຫຼື ຕັ້ງຕັກ ໄປຈົນຮອດອຸປະກອນພົກພາ (Mobile Devices)... ແມ່ນແຜ່ນທີ່ທຸກສ່ວນປະກອບໃນຄອມພິວເຕີ ຈະຕ້ອງໄດ້ເຊື່ອມຕໍ່ມາຍັງແຜ່ນວົງຈອນອັນຊັບຊ້ອນນີ້ ເຊັ່ນ ໜ່ວຍປະມວນຜົນ (CPU) ໜ່ວຍຄວາມຈຳ (RAM) ອຸປະກອນຈັດເກັບຂໍ້ມູນ (Storage Device) ລວມທັງອຸປະກອນຕໍ່ພວງຕ່າງໆ (Peripheral Device) ຖືວ່າແມ່ນຫົວໃຈສຳຄັນທີ່ຂາດບໍ່ໄດ້ແທ້ໆ ຊຶ່ງສິ່ງນີ້ມີຫຼາຍຄຳທີ່ໃຊ້ເອີ້ນ ເຊັ່ນ System board, Motherboard, Logic board ແລະ ສຸດທ້າຍແມ່ນ Mainboard.
ຄຳທີ່ນິຍົມໃຊ້ Mainboard
ไม่มีความเห็น