ການຄຸມງານເປັນໜ້າວຽກໜຶ່ງທີ່ສຳຄັນ
ການຄຸມງານເປັນໜ້າວຽກໜຶ່ງທີ່ສຳຄັນ ເພື່ອເຮັດໃຫ້ວຽກງານມີຄຸນນະພາບ ແລະ ປະສິດທິພາບ ທັງທັນກຳນົດເວລາ ເພາະວຽກດ່ວນໃຫຍ່ໆທີ່ມີຄາດໝາຍເປັນຕົວເລກຄວາມຕ້ອງການສູງ ຫຼື ຕໍ່ໜ້າວຽກງານທີ່ຈຳເປັນຕ້ອງເຮັດໃຫ້ສຳເລັດຕາມຄາດໝາຍນັ້ນ ມີຄວາມສຳຄັນຫຼາຍຕໍ່ການນັດໝາຍ ທັງມີບົດບາດຕັດສິນເຖິງການຄົງຕົວ ແລະ ຂະຫຍາຍຕົວຂອງທຸລະກິດ ຫຼື ວຽກງານນັ້ນໆ ດັ່ງນັ້ນ ຜູ້ຄຸມງານຈຶ່ງເປັນໄມ້ມືສຳຄັນໃນການຕາງໜ້າບໍລິສັດ ເພື່ອກະຕຸ້ນໜ່ວຍງານ ກຳມະກອນ ໃຫ້ເຮັດວຽກມີປະສິດທິຜົນຕາມຄາດໝາຍທີ່ເຮົາຢາກໄດ້.
ທຳມະຊາດຄົນເຮົາມັກເຮັດວຽກຢ່າງເປັນອິດສະຫຼະ ແລະ ມີຄວາມຂີ້ຄ້ານມັກງ່າຍ ເຊັ່ນ: ຢາກເຮັດວຽກງ່າຍໆ ແຕ່ໄດ້ເງິນເດືອນຫຼາຍ ຢາກເຮັດວຽກເບົາໆ ແຕ່ໄດ້ເງິນເດືອນລື່ນໝູ່ ຍ້ອນມີບາງແນວຄິດຄືແນວນັ້ນ ຈຶ່ງເກີດມີຕຳແໜ່ງການຄຸມງານເກີດຂຶ້ນ ເພື່ອຄອຍກະຕຸ້ນຜູ້ອອກແຮງງານໃຫ້ມີຄວາມຈູບຈ້າວຫ້າວຫັນຕໍ່ໜ້າທີ່ວຽກງານຂອງຕົນ ບາງຄັ້ງເມື່ອມາຢູ່ໃນຕຳແໜ່ງງານນີ້ມັກຈະເຮັດລາມປາມໄປຕາມໃຈຕົນເອງ ເພື່ອຮັບປະກັນການຢາກໄດ້ວຽກຕາມຄາດໝາຍ ໂດຍໃນບາງຄັ້ງເມື່ອເບິ່ງທາງນອກຄ້າຍກັບວ່າ: ບີບບັງຄັບຜູ້ຮ່ວມງານເກີນໄປ ຈິດໃຈຄັບແຄບເກີນໄປ ທະນົງຕົວໃນຄວາມເປັນຜູ້ຄຸມເກີນໄປ ຂາດພື້ນຖານຂອງພາວະຄວາມເປັນຜູ້ນຳ ກົງກັນຂ້າມໃນສາຍຕາຂອງຜູ້ຮ່ວມງານພັດເບິ່ງຕ່າງມຸມວ່າ “ເກີດມີຝີໃສ່ຂີ້ແຮ້” ແລະ ມີສິ່ງຂາດເຫຼືອແນວອື່ນ ຈຶ່ງເຮັດໃຫ້ບໍ່ສົມປະກອບ.
ເພື່ອເຮັດໃຫ້ການຄຸມງານເປັນໄປຕາມຂະບວນການຂອງມັນ ຕ້ອງເອົາໃຈໃສ່ຕໍ່ບາງບັນຫາດັ່ງນີ້:
ກ. ຕ້ອງກຳນົດເວລາໃນການຄຸມງານຢ່າງຈະແຈ້ງ ດ້ວຍການຄິດໄລ່ໜ້າວຽກ ບໍລິມາດວຽກ ກຳລັງແຮງງານທີ່ໃຊ້ໃນການຜະລິດ ໄລຍະເວລາໃຫ້ຖືກຕ້ອງ ພ້ອມກັບການຕິດຕາມກວດກາ ແລະ ອື່ນໆ.
ຂ. ສັງເກດເບິ່ງຢູ່ຫ່າງໆ.
ຜູ້ຄຸມງານສະໄໝໃໝ່ຕ້ອງຖືວ່າ ກຳມະກອນຄືເພື່ອນຮ່ວມງານ ຕ້ອງຄຸມຢູ່ຫ່າງໆ ແລະ ມີສາຍຕາເບິ່ງໃຫ້ເຂົ້າໃຈວ່າ ພະນັກງານຄົນໃດມີບັນຫາ ເວລາເຂົາເຮັດວຽກຕາມແຜນປົກກະຕິ ກໍ່ບໍ່ຄວນໄປຢືນເບິ່ງທາງຂ້າງເລື້ອຍໆ ເພາະຈະເຮັດໃຫ້ມີຄວາມກົດດັນບາງຢ່າງກໍ່ເປັນໄດ້ ແລ້ວຈະສົ່ງຜົນກະທົບໄປສູ່ຄຸນນະພາບ ແລະ ປະສິດທິພາບຂອງງານ.
ຄ. ກະຕຸ້ນຕາມໂອກາດເໝາະສົມ.
ສິ່ງທີ່ຜູ້ຄຸມງານຄວນລະວັງນັ້ນ ເມື່ອເວລາມອບວຽກໃຫ້ ແລ້ວຕັດຫາງປ່ອຍເລີຍ ບໍ່ສົນໃຈຕິດຕາມກວດກາ ນັ້ນຖືວ່າຜິດພາດ ບາງຄັ້ງພະນັກງານມີບັນຫາລຳບາກຍາກແຄ້ນ ກໍ່ໃຫ້ເຂົາແກ້ເອົາເອງ ນັ້ນເຫັນວ່າເປັນເລື່ອງທີ່ບໍ່ຄວນເຮັດ ຕ້ອງຕິດຕາມເອົາໃຈໃສ່ແກ້ໂດຍໄວ ບໍ່ແກ່ຍາວ ຫ້າມຫາຄົນອື່ນມາແກ້ແທນເຮົາ ໂດຍທີ່ເຮົາຜູ້ຄຸມບໍ່ທັນຮ້ອງຂໍ ບໍ່ດັ່ງນັ້ນ ຕຳແໜ່ງຜູ້ຄຸມອາດຈະຕົກເປັນຂອງຜູ້ມາແກ້ແທນໃນໂອກາດຕໍ່ໄປກໍ່ອາດເປັນໄດ້.
ງ. ຢັບຢັ້ງໄວ້ກ່ອນ.
ໃນການເຮັດວຽກນັ້ນ ມີບາງຄັ້ງກໍ່ຖືກຕ້ອງ ມີບາງຄັ້ງກໍ່ຜິດພາດ ຜູ້ຄຸມງານຕ້ອງມີສາຍຕາ ຫຼື ສະຕິໃນການຕິດຕາມກວດກາ ເມື່ອພົບເຫັນຂໍ້ຜິດພາດຕ້ອງຢັບຢັ້ງ ຫຼື ຕັດໄຟແຕ່ຕົ້ນລົມທັນທີ ເພື່ອຊອກຫາສາເຫດ ແກ້ໄຂ ແລ້ວຈຶ່ງເດີນຕໍ່ ບໍ່ຄວນປ່ອຍປະລະເລີຍ ເຊິ່ງຈະເປັນເງື່ອນໄຂໃຫ້ຄວາມຫາຍຍະນະມາເຖິງ.
ຈ. ບໍ່ຄວນມີອາລົມສັບສົນ.
ຜູ້ຄຸມງານຄວນມີອາລົມໝັ້ນທ່ຽງສະເໝີຕົ້ນສະເໝີປາຍ ເມື່ອເກີດມີບັນຫາຕ້ອງຕັດສິນດ້ວຍເຫດຜົນ ແລະ ຄວາມເປັນວິຊາການ ບໍ່ຄວນວູ່ວາມຕັດສິນຖິ້ມໂທດໃສ່ຜູ້ເຮັດ ໂດຍປາສະຈາກການສືບສວນ-ສອບສວນ ຖ້າຢາກເປັນຜູ້ຄຸມງານທີ່ເຮັດໃຫ້ລູກນ້ອງ ຫຼື ເພື່ອນຮ່ວມງານເຮັດວຽກດີຂຶ້ນ ຕ້ອງມີຂໍ້ທີ່ພວກເຂົາເຊື່ອຖື ແລະ ຍອມຮັບໄດ້ ໂດຍສະເພາະອຸປະນິໄສ ທ່າທີການເຮັດວຽກຂອງຕົນເອງ ຮູ້ເອົາໃຈເຂົາມາໃສ່ໃຈເຮົາ ຄວນມີອາລົມດີ ມີສີໜ້າເບີກບານຢູ່ຕະຫຼອດ ຄືຫຼັກສຳຄັນຂອງການເອົາຊະນະໃຈຄົນ.
ສ. ບໍ່ຄວນອະລຸ່ມອະຫຼ້ວຍກັນ.
ຖ້າຢາກເປັນຄົນຄຸມງານຄົນເຮັດວຽກທີ່ດີ ບໍ່ຄວນມີນິໄສອະລຸ່ມອະຫຼ້ວຍກັບເພື່ອນຮ່ວມງານໄປທຸກເລື່ອງ ເພາະນອກຈາກຈະກະທົບກະເທືອນຕໍ່ຕົນເອງແລ້ວ ເພື່ອນຮ່ວມງານກໍ່ຈະບໍ່ເອົາສາຍຕາເບິ່ງເຊັ່ນກັນ ຄົນທີ່ເຮັດວຽກງານຢ່າງຈິງຈັງ ໂດຍສະເພາະກັບວຽກງານບໍລິສັດນັ້ນຕ້ອງມີແບບວິທີ ເນັ້ນໃສ່ຈຸດມຸ່ງໝາຍທີ່ວຽກງານໂດຍກົງ ແຕ່ບໍ່ແມ່ນຄົນຄວາມຕ້ອງການຄົນແມ່ນຢູ່ບ່ອນໃຫ້ລູກນ້ອງເຮັດວຽກໄດ້ດີທີ່ສຸດ ມີປະສິດທິພາບທີ່ສຸດ ຈຶ່ງຈະເປັນຫົວໜ້າທີ່ທົນທານຕໍ່ການທົດສອບທຸກປະການໄດ້.
ความเห็น (0)
ไม่มีความเห็น