ค่าวฮ่ำวัยรุ่นซิ่ง
ซอบขี่รถแข่ง แป๋งเสียงลุ้มลุ้ม ป้อแม่เลยกุ้ม ตึงวัน ก๋ารบ่เซาะหา พญามันตั๋น ซอบหลับเมื่อวัน ไผหันบิ๋ดหน้า
ค่าวฮ่ำ ”วัยรุ่นซิ่ง 2546”
เทพลีลา
ยอหัตถา วันตาท่านไท้ ครูบาเหนือใต้ ขอไหว้ขอสา
ณ เวลานี้ ขอจี๊กถา ปี้น้องอาวอา ค๋ดมาใก้ใก้
ฟังหื้อดีหนา ข้าขอบอกใบ้ ขออย่าฟั่งไป หนีละ
ละอ่อนมอกแถ่ว มันแอ่วเฟอะฟะ แถมยังบ่ละ อบาย
ซอบเสียงอึกทึก หลับดึกลุกขวาย บ่กิ๋นข้าวงาย สักลายเต๋มหน้า ชอบไปสูสี ยาอียาบ้า เมรัยสุรา ค่ำเจ๊า
ตั้งก๊วนเป็นแก๊ง แป๋งเสียงเจี๊ยวจ๊าว บ่ฟังคนเฒ่า เหลือกำ
ไผป๋ะตี้ไหน จะไปสลำ เขาจะรุมยำ ตี๋นย่ำหื้อได้
บอกลูกหลานไผ จะไปก๋ายไก้ จั๋กเจ๋บตั๋วไป บ่คุ้ม
ซอบขี่รถแข่ง แป๋งเสียงลุ้มลุ้ม ป้อแม่เลยกุ้ม ตึงวัน
ก๋ารบ่เซาะหา พญามันตั๋น ซอบหลับเมื่อวัน ไผหันบิ๋ดหน้า
หาตุ๊กใส่ตั๋ว บ่กั๋วเปิ้นฆ่า แสนเวทนา ยี่งล้ำ
ซอบพกมีดปื๋น ซอบฝืนซ้ำซ้ำ ซอบแอ่วมืดค่ำ เนอนาย
ขอเจ้าหน้าที่ ไล่จี้เป๋นสาย ผาบจ๋นวอดวาย สูญหายหมดเสี้ยง
ขี่รถไปไหน แม่ใบหน้าเกี้ยง บ้านนอกในเวียง ม่วนตึ๊ก
ขอหื้อลูกหลาน ฟังสารลึกลึก เลิกแอ่วยามดึ๋ก ฟังกำ
ลุกมาเมื่อเจ๊า ฟังค่าวประจ๋ำ อี่ปู่อวยนำ จ๋ำกำหื้อได้
คนเฒ่าเปิ้นสอน เว้าวอนไจ้ไจ้ หื้อฟั่งเอาไป อย่าจ๊า
หื้อเป๋นคนดี เพื่อพลีเจ้าฟ้า เลิกเสพย์ยาบ้า มึนเมา
คนตี้เลอะเทอะ มันเซอะโง่เขลา แป๋งปั๋ญญาเบา บ่เอาเข้าบ้าน
หื้อเฮียนหนังสือ ฝึกปรืออย่าคร้าน จ๋บมาทำงาน ม่วนแต๊
ตั้งหน้าเยียะก๋าร บ่ยานท้อแท้ หัวอกป้อแม่ ชมเชย
ได้เงินเป่อเลอะ เอาเต๊อะลูกเหย มีกู้ไว้เจย ไป๊เขยอวดอ้าง
มีลูกมีหลาน สืบสานแผ่กว้าง จ้วยกั๋นกุตาง เพียบพ้อม
หมู่เฮาตังหลาย ญิงจายแวดล้อม จ้วยกั๋นแต่งต้อม สังคม
หมดโรคโศกตุ๊ก สนุกสุขสม ปากั๋นเจยจม นิยมตั้วหน้า
บ้านเมืองสงบ บ่ฮบเข่นฆ่า อายุตีฆา ว่าร้อย
ทำบุญสุนตาน ลูกหลานใหญ่น้อย เมินไปจ้อยจ้อย ดีเอง
เขียนบ่เก่ง บรรเลงเต้าอี้ เต้านี้เล่าสู่กั๋นฟัง ก่อนแหล่นายเฮย
****
เทพลีลา
ชมรมกวีล้านนาหละปูน
อาศรมคนยองหละปูน
26 สิงหาคม 2546
คำสำคัญ (Tags): #หื้อเป๋นคนดี เพื่อพลีเจ้าฟ้า เลิกเสพย์ยาบ้า มึนเมา คนตี้เลอะเทอะ มันเซอะโง่เขลา แป๋งปั๋ญญาเบา บ่เอาเข้าบ้าน
หมายเลขบันทึก: 464472เขียนเมื่อ 11 ตุลาคม 2011 20:15 น. ()ความเห็น (0)
ไม่มีความเห็น