ค่าวฮ่ำรำลึกวันมหิดล

             ค่าวฮ่ำซาวสี่กันยาวันมหิดล 

                                            เทพลีลา

                คารวะ   มนนบน้อม   ครูฝึกค่าวก้อม   ห้อมล้อมหนไหน

มาฮอดวันนี้    ข้านี้จั๋กไข     ยังความเป็นไป    เจื๊อไขป้อเจ้า

มหิตลา    ปู๋จาต้านเต้า   ซาวสี่นานเนา   แต๊ตั๊ก

         กึ๊ดเติงความหลัง    เมื่อยังเยาว์นัก     ป้อจั๋กไค่ได้   ปริญญา

จึ่งมุ่งอ่านเขียน   ฮ่ำเฮียนศึกษา   เปื้อหวังปริญญา    ฮักษาผู้ด้อย

มุ่งสู่เมืองไก๋    หัวใจ๋เจ้าน้อย    มาไก๋จอยวอย    เจ้นล้ำ

          เฮียนวิชาหมอ     พระหน่อเลิศล้ำ   โศกตุ๊กเจ๊าค่ำ     อดเอา

แป๋งใจ๋นั๋กแน่น  หมื่นแสนขุนเขา  สังวาลย์บรรเทา  หื้อเจ้าแม่นมั่น

จ๋นมีบุตต๋า    ธิดาว่าอั้น     ป้อเจ้าดึงดัน    ป้อกปิ๊ก

          ป้อแสนดีใจ๋    หัวใจ๋ระริก    ได้ปิ๊กสู่บ้าน    เมืองไทย

ตั้งใจ๋ไว้แล้ว    บ่แค้วคาดไก๋    เมืองศิวิไล    เจียงใหม่เมืองมั่น

เสียดายนักหนา    วสาป้อสั้น    ฮักษาบ่ตัน   โรคฮ้าย

       ขออธิษฐาน   วิญญาณดีฮ้าย    ยังอยู่แหวกว่าย    ตังใด

บ่หื้ออาฆาต   มาดร้ายไผไผ   ขอแผ่บุญไป    สดใสกู้ผู้

ซาวสี่กั๋นยา    ปากันมาจู้    จ้วยกั๋นอุ้มชู    หมอไว้

       ไค่ขอเจิญจวน    หมู่มวลปี้ไท้    สละรายได้    ฮอมมา

บรรยายมา    ขอลาเต้าอี้    เต้านี้สู่กันฟัง    ก่อนแหล่นายเฮย. 

                        ****************

                                               เทพลีลา

                                     ชมรมกวีล้านนาหละปูน

                                  อาศรมคนยองหละปูน

                                      10 สิงหาคม  2549